Nehemaya 4
4
ANehemaya ạkpar apu bụo osophoghom oḍighi phọ ọdi
1Mem dị ạSanbalat ạnaghan bọ mọ yoor awe aJu phọ momiigh ọḅile ọlogh iikpe phọ, ịghagh iloghi ọdi ịbugh ni, kụ ọdi amiigh ọmilogh ayoor. 2Ghisigh ạbumatuan ọdi rꞌawe ẹgham aSameria, ọdi ạḅem ni mọ, “Eeghe kụ ẹdi ighiil awe aJu phọ ạbuen phọ ogbi mọ bụno roḍighi? Bịdi ọotughian ọḅile ọlogh ẹmha phọ ḍụghum? Bịdi rogbi ghan mọ esi ọphinyon ạrikia kụ ẹdi bụno kọman oḍighi phọ ḍio ḍụghum? Bịdi rogbi ghan mọ bụno kotue ni ọsighe egu ịzeghe dị ạnian melhe otene sighiigh ọloghom otu?”
3ATobaya ạrol ọogaany ọdi kụ ạḅem aani mọ, “Eeghe ọdo iikpe kụ ẹdi bịdi kotue ọlogh? Ghạlamo ẹekpako bịn kenyu ni elereghi!”
4Mị ạaḅereghi, “Nạghan ịdi bịdi rụmilogh iyoor, Ẹnaan. Ạreer phọ ạbidi azuoghom ni rụmhu ạbidi! Oomo aruphua lọ bịdi ọmoogh ephiom ni bịdi, ḅịle ọsighiogh ni bịdi ogheelom eeruen ẹmha ịdipho ạrebene. 5Kạ́bilenaan sịpioghom ạbidi ḅịle kábula ịkaraph ạbidi, ịdi eḍighi bọ bịdi mụgilaam iyoor phọ rọlogh bọ iikpe phọ.”
6Kụ yoor ọlogh iikpe phọ ọghiom, kụ mọony amem bịn esi oolemi-odi aḍiphoph phọ, ịdi eḍighi bọ awe phọ ụmoogh ni ẹephua okumuan.
7ẠSanbalat, aTobaya rꞌawe Arebia, Amon rꞌẠsdod ọnaghan bọ mọ yoor rọki ni ghisigh esi ọḅile ọlogh iikpe phọ aJeruselem kụ mọ aropholopool phọ ẹrol bọ iikpe phọ reḍuan kemineen, kụ bịdi ọmoogh igbogh ịghagh iloghi. 8Kụ bịdi oopuruan oru ozuom aJeruselem ẹgham ọowalami ạraraar, 9kụ yoor ọoḅereghi Ẹnaan phọ ayoor, kụ yoor ọson we okori ghan ạbidi dulhe rꞌootaany.
10Awe aJuda phọ ụmoogh ni ḍụor dị ọmoor ghan mọ:
“Yira modugh orool asidool;
Egu ịpherepe asighiigh orool dị edi ẹbugh ni.
Yira kọlogh bọ ika iikpe phọ rodon?”
11Ẹpomoghian phọ ayoor ugbi mọ yoor kọ́miin bịdi, ḅịle kólegheri ịlo remite tụtu bịdi uzuom iyoor, ọḅile ụze iyoor bịn oḍighi phọ ayoor aphe. 12Kụ ọlo amem etum mem awe aJu dị odi igbo ẹpomoghian phọ ayoor uru ghan ni ụphur iyoor rụru ịlo ịpe ẹpomoghian phọ rugbiighinaan bọ iyoor. 13Esi ịduon phọ, mị aakolobian we phọ ịlo ẹgham rꞌarolhool rꞌịsoph rꞌạsikumugh, kụ mị asereghi bịdi ọman iikpe, ọto atum ọto, tọrobo esi lọ kọ̋lhogh ọman.
14Mị ụmiin mọ aruugu rasiph we phọ, kụ mị ạḅeni bịdi rꞌabuḍiemiom mọ rꞌạbuo iiḍighi phọ ạbidi mọ, “Kékiilaan ẹpomoghian phọ ayira. Ịitughian ịpe Ọmoogh-we phọ ạman bọ esi eegu rꞌịikpo, kụ eghol we ẹmha phọ anyina, nmụny anyina, nmạriir anyina rꞌaruutu anyina eeghi ẹgham mọ.” 15Ẹpomoghian phọ ayoor ụnaghan mọ yoor molhegheri ịitughian phọ ạbidi kụ bịdi ologhoma mọ Ẹnaan mẹphue ịitughian phọ ạbuno. Kụ oomo phọ ayoor oḅula ọḅile ọlogh iikpe phọ.
16Kụ emiigh sịphe kụ ẹghi, oolemi-odi awe phọ ạmi ukumuan ghan rukumuan, kụ oolemi-odi ọmeera ghan okori ạbidi, ụkpologhian ịinya ẹgham, buniin ọpham ịsoph, rꞌịsuaram ikpo, rꞌạsikumugh. Kụ abuḍiemiom ayoor uḅegh ni we phọ 17ọḅile bọ kọlogh iikpe phọ. Ghạlamo ạbuphe rọḅiir bọ iikpe phọ bịn ụpham ịyaar ẹgham ḍiniin ạḍighaagh kụ ọpham ịyaar arukumuan ḍịeri phọ, 18kụ tọro lọ rạlogh aani iikpe phọ ạkpua ni elhool ẹgham esin ọdi. Ọpo kapula bọ ọkuodu ọphurom ạruru phọ ạrolan rꞌạmi. 19Mị ụḅeni we phọ rꞌạbuo iiḍighi rꞌabuḍiemiom mọ ạbidi mọ, “Oḍighi phọ ạtara ni iboom dị loor ạḍidoony phọ oniin ọnyo ayira kạkelan ghan ni nyoniin sịphe iikpe phọ. 20Eḍighi ịyaar dị nyina ẹnaghan ọkuodu phọ, pọ itu eekpomoghan sịphe mị odi bọ. Ẹnaan phọ ayira keenaan ni iyira.” 21Kụ tọrobo aḍio, emiigh ḍịroor kụ ẹghi ẹteeny mem lọ ạraanaan adulhe kemite, oolemi-odi ayoor rọlogh iikpe phọ kụ ạbueri phọ ọmeera rokori ghan rꞌịsoph.
22Mem mọ ạmuen phọ, mị ụḅeni oomo ạbuphe ropogh bọ oḍighi phọ rꞌạbuphe rọloghonaan ghan bọ ḍịghaagh phọ, mọ bịdi kọtol ghan ḍughul ẹpe Jeruselem, pịdi yira okori ghan ẹmha phọ ḍughul kụ oḍighi oḍighi ootaany. 23Ghạlamo ḍughul, mị ụ́kporonaan ghan ạsuoma ạmi, ạbuphe rụdaph bọ ịmi kẹn ni, rꞌabutelhedom ạmi rꞌawe phọ rukori ghan bọ ịmi. Oomo phọ ayoor ụpham ghan rạraar ẹgham mọ ayoor rạghaagh.
Currently Selected:
Nehemaya 4: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
