Nẹhum 1
1
1 #
Azay 10.5-34; 14.24-27; Zẹf 2.13-15 Ḍịen kụ adom dị egbolomaam Nineve, ọghaaph uḍien dị ạNehum ọlo ẹmha dị oghol mọ Elkos kụ ạmiin.
Ophin ologhi Ọmoogh-we phọ esi aNineve
2Omuton Ọmoogh-we Ẹnaan phọ, ọnon dị aaleeny nyọdi ólho.
Ọdi rạliom ghan bụdi úmeera mọ ọdi bịn kụ Ẹnaan.
Esi ophin ologhi ọdi kụ ẹdi ọdi raḅulemian ghan bịdi.
3Ọmoogh-we phọ ịyaar rẹ́nuun ghan kephin ologhi,
Ọdi ạmoogh ni ịikpo
kụ kạ́bilenaan ọliom ọpo aḍighiton eephanaan bọ.
Esi lọ Ọmoogh-we phọ arelhe, oghim akim;
ọotu phọ kụ ophugh dị ạrada ọdi emitiom ghan!
4Ọdi ạto, kụ ạbazi phọ ạkaraghar!
Ọdi aḍighi ịdi ạriphiiny phọ, ạmuum amineen.
Ireeny eḍum ạBasan ekeel ọnam,
Eegum ạKarmel ekiton ekelele,
kụ ạsifalaway ạLebanon enme ḍizu.
5Ạraaḅaraph ekpeghekpeghe egbodo Ọmoogh-we phọ;
aroogbolom ẹgbo ghisigh ọdi.
Ade phọ epiigha mem dị Ọmoogh-we phọ aru amite;
aḅirini phọ rꞌoomo awe ọdi opiigha.
6Mem dị ophin ologhi odianaan nyọdi,
ạnhian kụ kakpetenaan?
Ọdi raakuom ghan ophin ologhi ọdi mụdi anem ạnian;
asighiigh eetughuḍian eten ophugh ghisigh ọdi.
7Ọmoogh-we phọ ạnighe ni;
ọdi raakpereghi ghan weye ọdi mem ịiḅaghami;
ọdi rạmaar ghan kạpham bụphe okiton bọ oru esi ọdi.
8Ịdipho aḍigbogh aḍigho dị rekil kụ ịdi ọdi aphiemi bụmulogh-ḍien phọ ọdi;
ọdi aḍeenaan eten aḍuugh ạbidi bụphe ọḅem bọ mọ eeye egbodo ọdi.
9Eeghe ịkaraph ịitughian kụ ẹdi nyina ẹmooghom Ọmoogh-we phọ?
Ọdi kiphiemi ni inyina.
Oye ólho dị kạmeera ghisigh ọdi kụ ạḅem mọ eeye amuneni ịyal amem.
10Ịdipho iitoor dị ẹkula rꞌịpherepher dị ẹgharaghar,
nyina awe dị amiim rạyegheyeghemi kịsu ni inyina nịan opiemi.
11Loor ạna, Nineve, kụ ẹdi oye ạḍua amite rꞌịbadi ịkaraph igbiighi, dị ạmooghom ẹkaraph ezue Ọmoogh-we phọ. 12Ịphen kụ ịdi Ọmoogh-we phọ ạḅeni weye phọ ọdi Ịzirel: “Ghạlamo ịduon awe Asiria ọkpar bọ ni kụ oḍiza, kopiemi ni bịdi. We ạmi, mị iseere inyina dọl ịminimiin, kụ mị káḍighi mun ịdipho. 13Nyịidipho mị kakunughi ịikpo phọ Asiria esi anyina kụ aagbo izime phọ ịpham bọ inyina.”
14Ịphen kụ ịdi Ọmoogh-we phọ mạto esi awe phọ Asiria: “Bịdi kọ́moogh ẹemara ẹemara dị komeera ḍien ạbidi. Mị kapiemi ni ịkaaghineen ạrumugh phọ edi bọ ruutu ịiḅereghi aruru phọ ạbidi. Mị raguphanaan oḍi weye Asiria — bịdi ụ́kpe ọrol!”
15 #
Azay 52.7
Ipogh, otelhedom ạḍua ni ạnyu ạraaḅaraph phọ ratu rꞌooḅi ọghaaph! Ọdi odi eten dị ratu ọghaaph oleenye ọkpar opu! Weye aJuda, ile rạyaal phọ anyina kụ ẹngo Ẹnaan ịpe nyina eghiran bọ nyọdi. Ạbukaraph awe kóḍigh mun de anyina rꞌẹekpara ekpeḍien. Moogulemi bịdi kpel kpel kpel.
Currently Selected:
Nẹhum 1: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
