Mạk 7
7
Ịtughemi awe aḍiodiidi
(Matiu 15.1-9)
1Kụ aFarisi phọ rꞌabuniin ạbutughemia iilogh phọ, dị ọḍua ẹpe Jeruselem kụ oru, ukoom ni Jịzos. 2Bịdi ụmiin ni dị abuniin ạbumatuan phọ ọdi roliom ghan eḍien rꞌịipuan pụupuan ạraghaagh, ịduon phọ pọ ạraghaagh dị úutola ịpe aFarisi phọ ọḅem bọ mọ awe oḍighi ghan phọ.
3Kụ ạri aFarisi rꞌoomo ạbueri aJu phọ ọtuan ni eḍighinom ịyaar aḍiodiidi phọ kụ róle ghan eḍien dị rạghaagh ụ́kuami uutola. 4Ḅịle kẹn, ọḍua ḍighi origheel bịdi róle ghan eḍien dị ụ́pur uutol. Ẹnon ọdo eḍighinom ịyaar bịdi rooko ghan kẹn ni, ọkuami ootologh ạrogo rꞌịnyoki rꞌasuugh rꞌạrimina.
5Kụ aFarisi phọ rꞌạbutughemia iilogh phọ opuru Jịzos mọ, “Uḍighi ika kụ ạbumatuan phọ ạna róoko aani ghan bọ eḍighinom ịyaar aḍiodiidi phọ kụ roliom ghan bọ eḍien rꞌịipuan pụupuan ạraghaagh phọ?”
6 #
Azay 29.13
Kụ ọdi ạphagharanaan bịdi mọ, “Azaya ọ́pioman ịmiin phọ dị ạmiin bọ ịlo anyina kụ ạge bọ, mọ nyina awe ịyal asinem, kụ ạḅem mọ,
“‘Ẹnaan ẹḅem mọ awe phọ ạbuen ọsighe ịidoronhu ạbidi bịn kụ rughueniom ghan ịmi,
iloghi ạbidi ịkelan ni ịmi iboom.
7Ị́kpianaan dị bịdi ruuseeny ghan ịmi
kụ kọtughemi ghan iilogh phọ awe mụdi ịpe Ẹnaan.’
8“Nyina meghel iilogh phọ Ẹnaan reeko ghan eḍighinom ịyaar awe aḍiodiidi phọ.”
9Kụ ạJizos ạḅile ạḅeni bịdi mọ, “Ị́kpianaan bọ ika esi anyina ọgumom ọman iilogh phọ Ẹnaan, kụ ooko ghan eḍighinom ịyaar phọ anyina. 10#Ẹḍua 20.12; Dut 5.16; Ẹḍua 21.17; Lịv 20.9AMozis ạḅem mọ, ‘Ọde rꞌonhiin lọgh eegu,’ kụ, ‘Oye lọ alomaan ọde mꞌonhiin, oghiigh ghan ni!’ 11Kụ nyina ẹḅile rẹtughemi ghan mọ oye lọ ạmoogh ịyaar lọ kẹngo sụo ọde mꞌonhiin ọdi, kụ ạḅem mọ, ‘Ẹphen phọ ạKoban,’ ịduon phọ rẹḅem ghan mọ, ‘Nyẹen moogho oseenaan Ẹnaan,’ 12pọ ọdi káḍighinaan mun ịyaar ọde mꞌonhiin ọdi. 13Kụ loor eḍighinom ịyaar phọ ẹpe nyina rẹḅogh ghan bọ kẹngo bụnon, nyina reḍighi ghan ịdi ọghaaph phọ Ẹnaan ụ́man mun ịyaar. Kụ ịbadi ịnon ọdo ịphen phọ nyina reḍighi ghan kẹn ni.”
Ạraraar dị rẹpue ghan oye
(Matiu 15.10-20)
14Kụ ạJizos ạḅile kẹn ạmagh we phọ, kụ ạḅeni bịdi mọ, “Oomo phọ anyina, iler rụru ịnaghanam ịmi. 15Ịyaar ílho ghan dị eḍigh sịphe aloor phọ oye kụ kẹpue oye phọ. Ịpe ẹḍua bọ sịphe ologhi oye phọ kụ emite kụ rẹpue ghan bọ oye phọ. [ 16Oye lọ ạmoogh rụru ọnaghanam, ạnaghan!]”
17Kụ ọdi ạwile we phọ agheel ologhi otu, kụ ạbumatuan phọ opuru nyọdi ịlo aḍidogh phọ. 18Kụ ọdi ạḅeni bịdi mọ, “Nyina phọ kẹn edi aani ni elegheri ịyaar ịdipho ạbueri phọ. Nyina ị́naghan mọ ịyaar dị eḍigh pạ ologhi aloor oye kẹ́kar etue ẹpue oye phọ, 19ịdi eḍighi bọ réḍigh ghan pạ ologhi oye phọ, reḍigh ghan ọkuruḅaka bịn ọni oroph?” (Ịduon phọ, pọ ạJizos rạḅem ghan mọ eḍien dị oroph ogbeph ílho ghan.)
20Kụ ọdi ạḅem mọ, “Ịpe ẹḍua bọ sịphe ologhi oye phọ kụ emite kụ rẹpue ghan bọ oye phọ. 21Ịsiphe ologhi oye phọ kụ ẹdi ịkaraph ịitughian ẹḍua ghan bọ remite. Olhe ẹmha ạregelenya, imi, ọko enu, olhe ẹmha, 22ophoghogha ạraraar, ipesi, iigbegheḍiom, ọphuenaan aloor, ologhi ẹḍim, ọgba ịkaraph ạsiagba, iḅo-igbogh, rꞌiipheeny — 23oomo ịkaraph phọ ịphen ẹḍua bọ sịphe ologhi oye phọ kụ emite kụ rẹpue ghan bọ oye.”
Ịlo omeeraam dị oniin ạnir ạmoogh
(Matiu 15.21-28)
24Kụ ạJizos ạḍua ni sịphe phọ ạghi eelhe dị etuman ẹmha aTaya. Kụ aḍigh oniin otu, kụ ọ́wa mọ oye alegheri mọ ọno odi sịphe, kụ ítue iḍighi dị ọdi ạaghian. 25Kụ oniin ạnir, dị ọkaraph uwaloor ạrol ẹmhu ọnyani ọdi, ạnaghan ni ịlo ạJizos kụ aru ạteeny nyọdi mem mem mọ, kụ akpuḍian sịphe ruwol ọdi. 26Ạnir phọ ọphon phọ aḍighi ooruen ọlo aGris. Ụmar nyọdi ẹphen Finisia eelhe ạSiria. Kụ ọdi ạaḅereghian Jịzos mọ aphorogh ọkaraph uwaloor phọ loor ọnyani phọ ọno. 27Kụ ạJizos ạḅeni ạnir phọ mọ, “Eḍien dị nmụny íleeny, ụ́ngo ghan suogh, ịdi eḍighi bọ ị́kpianaan ọsighe ghan eḍien ịbam ạnmuny kụ ọngo asuogh.”
28Kụ ạnir phọ ạḅem mọ, “Oye phọ, ọkaraghi asuogh phọ ịpe edi bọ eeḍian ịdaabili phọ rẹson ghan ịpherepe eḍien ịbam ạnmuny lọ emeleghu kụ kele.”
29Pọ kụ amem dị ạJizos ạḅeni ạnir phọ mọ, “Loor ịphen nạ ạḅem bọ, keel. Ọkaraph uwaloor ọnyani phọ ạna mạḍua.”
30Kụ ạnir phọ agheel ologhi otu, kụ ạmiin dị ọnyani phọ ọdi ạmina ẹmina, dị ọkaraph uwaloor phọ mạkar bịn ạḍua.
ẠJizos aakonom ekpom ọka
31Kụ ạJizos ạḍua ni eelhe phọ aTaya akiton Saidon rꞌeelhe phọ ạDekapolis, kụ agheel ẹpe Ọphiiny aGalili. 32Kụ ọsighe oniin oye dị ạḅaaghaph, rꞌeema kẹn, oruom nyọdi kụ ọoḅereghian mọ ọdi ạḅogh aani oye phọ. 33Kụ ạJizos ạpham nyọdi atenom ọgbal, kụ ạsighe sụnugh ọdi ạlogh ologhi areḅeri oye phọ, kụ ạsin ịghor ạḅoghom nem oye phọ. 34Kụ ọdi aphogh ạnyu ạke kụ ạḅiphaan, kụ ạḅeni oye phọ mọ, “Ẹfata,” ịduon phọ pọ “Iiphoghonu yogh.”
35Pọ kụ amem dị areḅeri oye phọ eephoghonu, bịn anem mọ eḅeleghu, kụ ọdi amiigh ọḅa agey. 36Kụ ạJizos ạphur bịdi rụru mọ kụ́kaaph ịphen phọ ụḅeni oye, kụ ịdipho ọdi ạphur bọ bịdi rụru phọ, pọ ạphue ghụn ni bịn ọkuami oleenyemi. 37Ịphughanam ni kụ eḍigh ḍiigu esi ạbidi, kụ ọḅem mọ, “Ọdi maḍighi ni oomo ạraraar igey. Aḍighi dị ạbuḅaaghaph ḅạaghaph kụ ọnaghan ḍụghum, ḅịle kẹn dị arokpom ọka kụ ọḅa.”
Currently Selected:
Mạk 7: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
