Mạk 8
8
ẠJizos ạperemi eḍien inya ọonir awe
(Matiu 15.32-39)
1Ịphen phọ eten bọ íbia bịn aḍiboom aḍita awe ụḅile ni oru ookpomoghan. Mem dị bịdi ụ́moogh mun ịyaar ole, ạJizos ạmagh ni bụmatuan phọ ọdi aakpomoghi, kụ ạḅeni bịdi mọ, 2“Igbiririph awe phọ ạbuen risiphanaan ni ịmi, ịdi eḍighi bọ bịdi mụrolan ịmi ịraar aḍughul-otu, kụ ụ́moogh mun ịyaar ole. 3Mị ạḅem mọ bịdi ogheleghu iloghi aruutu ạbidi, bịdi komuzaan ni ḍuugh ẹpe eten, ịdi eḍighi bọ ịbadi ạbidi ụḍua ni rikpisi dị ẹkelogh kụ oru.”
4Kụ ạbumatuan phọ ọdi opuru nyọdi mọ, “Iḍighen sịen ẹdala phọ kụ ẹdi kọmiin eḍien dị kẹgbaanyan kꞌạbuen kꞌạbuen phọ?”
5Kụ ọdi apuru bịdi mọ, “Nyina ẹmoogh bọ ika iiḅoghoḍi ạbred?”
Kụ bịdi mọ, “Oḍual.”
6Kụ ọdi ạḅeni we phọ mọ ọrologhu ude. Kụ ạsighe oḍual iiḅoghoḍi ạbred phọ kụ, rọngo ḍịseph Ẹnaan, kụ ạparion kụ ạngo bụmatuan phọ ọdi mọ odiemi ḍita awe phọ, kụ ạbumatuan phọ ọtuugh odiemi. 7Bịdi ụmooghom kẹn ni ịphurukpu ạnmuny ina, kụ ạJizos, rọngo ḍịseph Ẹnaan, kụ ạḅeni bụmatuan phọ ọdi mọ odiemi we phọ. 8-9Oomo phọ ạbidi ule ni ẹpherogh — awe phọ ụghiom ni inya ọonir. Kụ ạbumatuan phọ ọson ipoḍi phọ esugha bọ, kụ emuza oḍual arugunum. 10Kụ ạJizos ạḅeni we phọ mọ ogheleghu, kụ mem mem mọ bịn ọdi rꞌạbumatuan phọ ọdi oḍigh oghuugh phọ, kụ ọghi ẹpe eelhe aDalmanuta.
AFarisi phọ ọwa mọ ạJizos ạngo bụno eḍeenaan
(Matiu 16.1-4)
11 #
Mat 12.38; Luk 11.16 Buniin aFarisi phọ uru ni kụ omiigh ọogbaghanaan rꞌạJizos. Bịdi ụwa ghan ịlo ọdegh ọdi ophogh, kụ opuru nyọdi eḍeenaan kꞌạke. 12#Mat 12.39; Luk 11.29Kụ ạJizos ạḅiphaan kụ ạḅem mọ, “Oghiil phọ ọphon ụtuan aani eeghe kụ ropuru ghan bọ eḍeenaan phọ? Mị ạkar rịḅeni ghan inyina mọ eḍeenaan dị kọngo oghiil phọ ọphon ílho.”
13Kụ ọdi ạwile bịdi, kụ ạghi aḍigh oghuugh phọ, kụ amiigh ọḅeeny ạḍieri phọ ạḍighaagh ọphiiny phọ.
Aḍidogh ịlo ayist aFarisi phọ rꞌọpo ạHerod
(Matiu 16.5-12)
14Ạbumatuan phọ mowula ọpham eḍien ọghimom, kụ bịdi ọmoogh eniin eeḅoghoḍi ạbred bịn sịphe ologhi oghuugh phọ. 15#Luk 12.1Kụ ạJizos ạphur bịdi rụru mọ, “Igona loor anyina esi ayist aFarisi phọ rꞌayist ạHerod.”
16Kụ bịdi omiigh ọghaaphan sịphe ogbo phọ ạbidi mọ, “Ọdi ạḅem ịduon, ịdi eḍighi bọ yira ụ́moogh ạbred.”
17Kụ ạJizos alegheri ni mọ bịdi kọ̋naghanan mọ ọno rạkaaph ghan ịlo ịtughemi awe phọ ạbuen, kụ apuru bịdi mọ, “Iḍighi ika nụun kụ nyina ẹḅile bọ rẹkaaph ghan ịdi nyina ạbred ị́moogh? Nyina ke̋lhegheri, ḅịle kẹn kẹ̋naghanan kꞌạnyiidipho. Oḍueghi yogh ni iloghi phọ anyina. 18#Jer 5.21; Izik 12.2; Mạk 4.12Nyina ẹmoogh bọ ni riḍien, nyina eten rẹ́miin. Nyina ẹmoogh bọ ni reḅeri, nyina ḍụghum rẹ́naghan. Nyina mewula 19mem mọ mị ạparion bọ oogh iiḅoghoḍi ạbred phọ, ạngo oogh ọonir awe phọ ḍụghum? Ipoḍi phọ nyina ẹson bọ emuza bọ ika ạrigiel?”
Kụ bịdi mọ, “Ḍioph rꞌịyal.”
20Kụ ạJizos ạḅile apuru mọ, “Kụ mem mọ mị ạparion bọ oḍual iiḅoghoḍi ạbred phọ ạngo inya ọonir awe phọ, ipoḍi phọ nyina ẹson bọ emuza bọ ika arugunum?”
Kụ bịdi mọ, “Oḍual.” 21Pọ kụ amem dị ọdi ạḅile apuru bịdi mọ, “Nyina kẹ̋naghan nịiniin ḍụghum?”
ẠJizos aakonom oye ikpom ariḍien ẹpe Betsaida
22Kụ bịdi uru ni osi Betsaida, kụ abuniin awe ọsighe oye ikpom ariḍien oruom Jịzos, kụ ọoḅereghian mọ ọdi ạḅogh. 23Kụ ạJizos ạpham ḍịghaagh oye phọ arelhiom nyọdi ạḍuanam sịphe ẹmha phọ. Kụ romuurom riḍien oye phọ ịghor kụ ạzu, kụ apuru mọ, “Nạ rạmiin ni ịyaar?”
24Kụ oye phọ aphogh ạnyu, kụ ạḅem mọ, “Mị rạmiin ni we, kụ bịdi ọkigh ireeny dị retelhe yogh.”
25Kụ ạJizos ạḅile kẹn ạsighe rạghaagh ọdi ạzu riḍien oye phọ. Pọ kụ amem dị oye phọ ạkuami aphogh akiririom, kụ ariḍien phọ ọdi emoon, kụ ọdi ạmiin oomo ạraraar phọ agey. 26Kụ ạJizos ạḅeni nyọdi mọ, “Nyeene agheel ologhi otu, úkir ghan ẹmha!”
APita ạḅem mọ ạJizos kụ aMesaya phọ
(Matiu 16.13-20; Luk 9.18-21)
27Kụ ạJizos rꞌạbumatuan phọ ọdi ụḍua ni rọki rạmha phọ aSizaria Filipai. Kụ ẹpe eten phọ, ọdi apuru bịdi mọ, “Ịḅeni ịmi. Awe rọḅem ghan mọ mị ạnhian?”
28 #
Mạk 6.14, 15; Luk 9.7, 8 Kụ bịdi mọ, “Buniin rọḅem ghan mọ ạna ạJon oburogh mụum mọ, buniin mọ Ilaija, kụ buniin mọ oniin oyil phọ Ẹnaan.”
29 #
Jọn 6.68, 69 Kụ ạJizos apuru bịdi mọ, “Nyina rẹḅem aani ghan mọ mị ạnhian?”
Kụ aPita mọ, “Nạ kụ aMesaya phọ.”
30Kụ ạJizos ạphur bịdi rụru mọ, “Ịphen phọ kẹ́kaaph ẹḅeni oye.”
ẠJizos ạkaaph akol ịminimiin rꞌaḍuugh phọ ọdi
(Matiu 16.21-28; Luk 9.22-27)
31Kụ ạJizos amiigh ọtughemi ạbumatuan phọ ọdi mọ, “Ọony phọ Oye kạmiinom ni iboom ịminimiin. Ikumoor awe phọ rꞌạbuo ạrumhu ariil ạrikia phọ rꞌạbutughemia iilogh phọ komutonaan ni nyọdi, kokiigh ni nyọdi, kụ esi ịraar aḍughul-otu ọdi kaḅetenu ni esi aḍuugh phọ.” 32Kụ ọdi óopuki ẹghaaphom mọ. Kụ aPita ạsighe nyọdi atenom ọgbal, kụ ạḅaam. 33Kụ ạJizos akiton asoman bụmatuan phọ ọdi, kụ ạḅaam Pita kụ ạḅeni mọ, “Setan, ḍụa sịen ghisigh ạmi. Ịitughian phọ ạna, ịitughian awe, kị́itughian Ẹnaan.”
34 #
Mat 10.38; Luk 14.27 Kụ ạJizos ạmagh ḍita awe phọ rꞌạbumatuan phọ ọdi mọ oru, kụ ạḅeni mọ, “Oye lọ rạwa ọdaph ạmi asooromi loor ameeraam ḍuugh, kụ aḅeton osuom arusu phọ ọdi arool, kụ ụdapham ịmi! 35#Mat 10.39; Luk 17.33; Jọn 12.25Oye lọ ạmaghami ghuḍum mọ ọdi ịyaar kapiemi ni, kụ oye lọ ghuḍum mọ ọdi ụ́maghami ịyaar loor ẹmhu ạmi rꞌooḅi ọghaaph phọ kạmoogh ni ghuḍum. 36Oye kạsighe bọ eeghe ạsuo dị ạmoogh ẹelha aḅirini phọ ạmadan kụ aphiemi ghuḍum mọ Ẹnaan ẹngo bọ nyọdi? 37Kạsighe bọ eeghe kụ aanmeneniom kẹn ghuḍum mọ Ẹnaan ẹngo bọ nyọdi? 38Oye lọ ughiilom ịmi umugholoor, sịen ọkaraph oghiil phọ ọphon Ẹnaan úlegheri bọ, pọ Ọony phọ Oye kạḅile ni akiilom aani nyọdi umugholoor, mem dị ọdi kạpam rụukpaany phọ Ẹnaan kụ atu rꞌigbogh Ọde phọ ọdi.”
Currently Selected:
Mạk 8: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
