Mạk 2
2
ẠJizos aakonom oye dị ạḍighaagh rꞌaḍuwol emugh
(Matiu 9.1-8; Luk 5.17-26)
1Kụ ạJizos ạḅile aḅula Kạpaniom mem dị ịyal-ikpo aḍughul-otu meten, kụ ọnaghan mọ ọdi marigheel. 2Kụ awe dị ookpomoghan bọ ụphughan ni, dị rꞌesi ọrol ị́tol, ghạlamo rꞌọnhu aḍibuo otu phọ ni. Kụ ọdi odi rạkaaph ghan ọghaaph phọ Ẹnaan kạḅeni bịdi, 3bịn ọsighe oye dị ạḍighaagh rꞌaḍuwol emugh oruom nyọdi, dị inya awe kụ orool. 4Bịdi ụ́moogh eepoogh oḍighom ọteeny ạJizos, loor esi aḍita awe phọ, kụ bịdi ọtuugh pạ ạJizos ạrol bọ kụ ogbonyon ạnyu-otu phọ, kụ ọkpaaghi ẹmina phọ rꞌoye phọ ạmina bọ oseere. 5Mem dị ạJizos ạmiin bọ omeeraam mọ ạbidi, ạḅeni ni oye phọ aloor phọ ị́nighe bọ mọ, “Mọony ạmi, mọsar ịkaraph ạna ọwilenaan nyịna.”
6Kụ buniin ạbutughemia iilogh phọ ụrol aani ni ude pạ phọ, dị rọotughian ghan pạ iloghi phọ ạbidi mọ, 7“Oye phọ ọphon ạmaken rạkaaph ika? Ịphen phọ pọ ọopu Ẹnaan. Ạnhian kụ katue ạsar ịkaraph ạbilenaan, emuton Ẹnaan bịn?”
8Egina amem bịn ạJizos aloghoma loor ọdi mọ ịduon kụ ịdi bịdi rọotughian, kụ apuru bịdi mọ, “Iḍighi bọ ika kụ ịitughian phọ ịphen kụ edi bọ iloghi phọ anyina? 9Ịghen kụ idugh epu ịlo ọḅeni oye phọ aloor phọ ị́nighe bọ mọ, ‘Mọsar ịkaraph ạna ọwilenaan nyịna,’ rꞌọḅeni mọ, ‘Ḅetenu ạsighe ẹmina phọ ạna arelhe’?
10“Ọbo nyina elegheri mọ Ọony phọ Oye ạmoogh ni ịikpo sịen aḅirini phọ ọsar ịkaraph ọwilenaan, kụ mị kạḅeni bọ oye phọ ạḍighaagh rꞌaḍuwol phọ emugh bọ mọ, 11‘Mị rạḅeni ghan nyịna mọ ḅetenu ạsighe ẹmina phọ agheel kꞌạna.’” 12Egina amem bịn ọdi aḅetenu ạsighe ẹmina phọ ọdi, kụ oomo ạbidi ọmiin dị ọdi aten rakeel. Pọ kụ amem dị eḍigh iikia esi ạbidi, kụ oboom Ẹnaan ọḅem ghan mọ, “Kꞌekulha yira kọ̋miin ghan ọdo phọ ịphen.”
ẠJizos ạmagh Livai
(Matiu 9.9-13; Luk 5.27-32)
13ẠJizos ạḅile kẹn ạḍua ạghi ẹpe oogbom Ọphiiny aGalili, kụ oomo awe phọ ookpomoghan okoom nyọdi, kụ ọdi ạtughemi bịdi. 14Ọdi atelhe raten, kụ ạmiin Livai ọony Ạlfios dị ạrol ude pạ otu phọ rọbonyi ghan bọ iisogh phọ, kụ ạḅeni nyọdi mọ, “Ụdaph ịmi.” Kụ ọdi aḅetenu ạdaph Jịzos.
15Kụ ịphen reten, kụ ạJizos ạtol ude kꞌaLivai rale ghan eḍien rꞌịbadi ạbuphe rọbonyi ghan bọ iisogh phọ, rꞌabuḍighinom ịkaraph, rꞌạbumatuan phọ ọdi — awe phọ ọdaph bọ nyọdi ụbugh ni. 16Kụ ạbutughemia iilogh ạbuo aFarisi phọ rọmiin mọ ạJizos ạḅophoghan rꞌabuḍighinom ịkaraph rꞌạbuphe rọbonyi ghan bọ iisogh phọ ralian eḍien, kụ opuru bụmatuan phọ ọdi mọ, “Uḍighi ika kụ ọdi rꞌọdo phọ awe phọ ạbuen kụ rolian bọ eḍien?”
17Kụ ạJizos ạnaghan ịpe bịdi rọkaaph bọ, kụ ạḅeni bịdi mọ, “Bụphe úmoon bọ kụ ropir ghan oyil, kạ́buphe omoon bọ. Mị ụ́tuan ọmagh abugey kụ aru bọ. Mị uru ghụn ni ọmagh abuḍighinom ịkaraph phọ.”
Aḍipuru ịlo ọtuan ịiḅereghi ọrol ạdol ọkoony
(Matiu 9.14-17; Luk 5.33-39)
18Ạbumatuan phọ ạJon rꞌaFarisi phọ rọtuan ghan ni ịiḅereghi kọrol dọl ọkoony. Kụ awe oru opuru Jịzos mọ, “Uḍighi ika kụ ạbumatuan ạJon rꞌạbumatuan aFarisi phọ rọtol ghan bọ ni dọl ọkoony, kụ ạbumatuan phọ ạna ọkoony rọ́tol aani ghan bọ?”
19Kụ ạJizos ạsighe ḍidogh kụ apuruom bịdi mọ, “Awe dị odi kꞌọyogo kọtol li ọkoony ḍụghum, dị olhom ọnyani phọ odi ni sịphe? Ịdipho olhom mọ odi aani bọ ni rꞌạbidi, ọkoony kạ́tol. 20Kụ amem retu ni dị kọboor bịdi olhom mọ, kụ bịdi ogbi nụun ọrol aani ạdol ọkoony.
21“Oye ólho dị kạsighe ọpherepe omoom ukpe kụ apuom ogbaany ạsuoma. Apuom, pọ omoom mọ kạpogha ni ạḍua, kụ ukpe phọ aaguronu. 22Oye ólho dị kạsighe igbaany ạsikarama kụ aakoom mumoom amiim ịya. Aḅulughi, pọ ạsikarama phọ keḅomoghian ni, bịn amiim mọ rꞌạsikarama phọ epeeghu. Amumoom amiim rꞌimoom ạsikarama kụ ịḅophan.”
Aḍipuru ịlo aḍio ophooghian phọ
(Matiu 12.1-8; Luk 6.1-5)
23 #
Dut 23.25
Ḍiniin aḍio ophooghian dị ạJizos rꞌạbumatuan phọ ọdi otelhe roten ozo ịbiakpa, ạbumatuan phọ ọdi umiigh ni ọkuughi ịbiakpa phọ. 24Kụ aFarisi phọ ọḅeni nyọdi mọ, “Mịin aani, bịdi roḍighi ugbini ugbini ḍio ophooghian phọ.”
25Kụ ạJizos apuru mọ, “Nyina kạ̋al ghan ịpe aDevid aḍighi bọ, mem mọ ọkoony asiph bọ nyọdi rꞌạbuphe ọdaph bọ nyọdi, kụ bịdi ịyaar olhe phọ ụ́moogh bọ? 26#Lịv 24.9#1 Sạm 21.1-6Ịdi ọdi aḍigh otu Ẹnaan phọ, mem mọ Ạbayata kụ uwo ẹmhu oyil ạrikia phọ, kụ alhe eḍien phọ oseere bọ sịphe ạdol iigbia phọ, kụ ạngaani bụphe ọdaph bọ nyọdi, nyẹpe omuton bụpinyon rịkia phọ ị́kpe bọ dị ọnon oye kale.”
27Kụ ọdi ạḅeni bịdi mọ, “Ụ́tuan ḍio ophooghian kụ ọlhem bọ oye, ụtuan oye kụ ọngo bọ ḍio ophooghian. 28Ịduon kụ iḍighi kụ Ọony phọ Oye kụ ạmooghom ni ḍio ophooghian phọ.”
Currently Selected:
Mạk 2: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
