Mạk 11
11
Ọsaram Jịzos osiemi Jeruselem
(Matiu 21.1-11; Luk 19.28-40; Jọn 12.12-19)
1Mem dị moru otuman Jeruselem ẹpe ạramha phọ aBetfagi rꞌaBetani, bịdi uru ni osi Eegum Ọlivs. 2Kụ ạJizos arom ịyal ạbumatuan ọdi mọ, “Ịki ẹmha phọ ẹpe nyina rẹmiin bọ. Nyina esi, nyina kẹmiin ni onyugheel ẹnam adool dị ọkpooghi, dị oye kőḍigh ghan. Ịkatan ẹsighe iruom sịen. 3Kụ oye lọ ipuru inyina mọ, ‘Ịdipho nyina reḍighi ghan ika?’ ịḅeni mọ Ọmoogh-we phọ ạmoogh ni ịyaar oḍighinom ọdi kụ kạnuun ni aḅulemi.”
4Kụ bịdi ọghi kụ ọmiin onyugheel ẹnam adool sịphe eten phọ dị ọkpooghi ọnhu-aḍibuo oniin otu. Bịdi odi rọkatan ghan, 5kụ buniin ạbudi ọmeregha sịphe phọ upuru ni bịdi mọ, “Iḍighi ika kụ nyina rẹkatan bọ ẹnam adool phọ?”
6Kụ ạbumatuan phọ ọphagharanaan ịdipho ạJizos ạḅem bọ, kụ awe phọ umeera ni mọ bịdi ọpham ọḍuanam. 7Kụ bịdi ọsighe ẹnam adool phọ oruom Jịzos, kụ ọkporonaan rụsuoma ạbidi ozuughiom ọman ẹnam mọ, kụ ọdi aḍigh. 8Kụ ịbadi awe ụkporonaan kẹn ni rụsuoma ạbidi ọdeeghi oḅodo phọ, kụ buniin oḍigh elegheḍum ọgba rịphiph ireeny kụ oru ọdeeghi oḅodo phọ. 9#Ạsuo 118.25, 26Kụ bụphe oḍia bọ rꞌạbuphe ọrol bọ ọman phọ ụlooghi ghan mọ, “Iboom ni Ẹnaan! Ẹnaan ẹseph ni nyọon phọ ratumom bọ ḍien Ọmoogh-we phọ! 10Ẹnaan ẹseph ni ọmar phọ ọpo ratu bọ, ọmar aDevid, ogbogh ọde phọ ayira! Iboh ẹrolonaan ni Ẹnaan ẹpe kꞌạke!”
11Kụ ạJizos amite Jeruselem, kụ ạghi aḍigh sịphe Otu Ịiḅereghi phọ, kụ ạnmanaghian oomo ạraraar phọ akitonom kụ rẹwepheghian kụ ọdi rꞌaḍioph rꞌịyal ạbumatuan phọ ọḅile oḅula Betani.
ẠJizos asu ọnhu oreeny dị oghol mọ ạfig
(Matiu 21.18-19)
12Kụ rẹḅaal bịdi ọḅile ọḍua Betani rọki Jeruselem, kụ ọkoony asiph ni Jịzos. 13Kụ ạrol egher ạmiin oreeny dị oghol mọ ạfig dị marigheel ọnam, kụ ạghi ophogh mọ amuum ni, kụ asi sịphe azin phọ kụ ạmiin rịnya bịn, ịdi eḍighi bọ kámem iimuma. 14Kụ ọdi ạḅeni oreeny phọ mọ, “Oye kále mun iimuma ạna,” kụ ạbumatuan phọ ọdi ọnaghan.
ẠJizos ạki aḍigh Otu Ịiḅereghi phọ
(Matiu 21.12-17; Luk 19.45-48; Jọn 2.13-22)
15Kụ bịdi rosi Jeruselem kụ ạJizos aḍigh Otu Ịiḅereghi phọ, kụ amiigh ophorogh ạbuphe romuul bọ ḍighi sịphe phọ, kụ agborion ịdaabili ạbuphe roonmeeghi bọ ikpoki phọ, rꞌạsigada ạbudi roboologhi rụkurughozo. 16Kụ ómeera mọ rꞌoniin arool dool atenom ogiga Otu Ịiḅereghi phọ. 17#Azay 56.7; Jer 7.11Kụ ạtughemi mọ, “Ọge ni sịphe Ạḍinya Iigbia phọ mọ Ẹnaan ẹḅem mọ, ‘Otu ạmi kokol mọ Otu Ịiḅereghi oomo areelhe,’ kụ nyina mẹḅile ekiton eḍighi otu ạruḅa.”
18Kụ ạbuo ạrumhu ariil ạrikia phọ rꞌạbutughemia iilogh phọ rọnaghan ịphen phọ, kụ ọwa eten ịlo oghiigh ạJizos. Kụ bịdi ughiilaan ni nyọdi, ịdi eḍighi bọ ịtughemi phọ ọdi iḍighi ni iikia esi oomo awe phọ.
19Kụ aḍughul reghul, kụ ạJizos rꞌạbumatuan phọ ọdi ọḍua ẹmha phọ.
ẠJizos ạsighe oreeny dị oghol mọ ạfig ạtughemiom
(Matiu 21.20-22)
20Kụ ḍịroor ạḍieri phọ aḍio phọ, bịdi otelhe roten kụ ọmiin dị oreeny phọ oghol bọ mọ ạfig phọ manyororo kꞌazin phọ kꞌạrinya phọ. 21Kụ aPita ạatughian ni ịpe emite bọ, kụ ạmagh Jịzos ạḅeni mọ, “Ọtughemia, pogh aani. Oreeny phọ nạ asu bọ ọnhu phọ manyororo.”
22Kụ ạJizos ạphagharanaan bịdi mọ, “Ịmoogh omeeraam esi Ẹnaan. 23#Mat 17.20; 1 Kọr 13.2Mị ạkar rịḅeni ghan inyina mọ oye lọ ạḅeni ẹeḅaraph phọ ẹphen mọ, ‘Tuphuronu ameel asuma ọphiiny,’ dị ologhi ọdi rạ́bal ịyal kụ ạkaraghi ni ameeraam mọ ịpe ọno ạḅem bọ emite, pọ Ẹnaan keḍighi ni ẹngo nyọdi. 24Esi ịduon phọ kụ mị rịḅeni inyina mọ ịyaar lọ nyina ẹlom esi ịiḅereghi kụ emeeraam mọ nyina kẹmoogh ni, pọ keḍighi ni ẹlo anyina. 25#Mat 6.14, 15Kụ mem lọ nyina ẹmeera ọoḅereghi, ịsar ghan ịkaraph lọ oye iḍighi inyina ẹwilenaan, ọbo Ọde phọ anyina odi bọ kꞌạke ạsar aani ịkaraph anyina ịwilenaan. [ 26Nyina ị́bilenaan bụnon, pọ Ọde phọ anyina odi bọ kꞌạke phọ ịpe anyina kạ́bilenaan.]”
Aḍipuru olegheriom ịikpo phọ ịpe ạJizos ạsighe bọ kụ raḍighinom
(Matiu 21.23-27; Luk 20.1-8)
27Kụ bịdi ụḅile ni osi Jeruselem. Kụ ạJizos ratelhe yogh sịphe Otu Ịiḅereghi phọ, kụ ạbuo ạrumhu ariil ạrikia phọ rꞌạbutughemia iilogh phọ rꞌikumoor awe phọ uru ni ọteeny nyọdi, 28kụ opuru mọ, “Nạ ụsighe ịghen ịikpo kụ raḍighinom ghan bọ ịphen phọ? Ạnhian kụ ạngo bọ nyịna ịikpo oḍighinom ịphen phọ?”
29Kụ ạJizos mọ, “Mị kipuru aani inyina ḍiniin aḍipuru ạgbagh, kụ nyina ẹphagharanaan, pọ mị kịḅeni ni inyina ịikpo phọ mị ạsighe bọ kụ raḍighinom ghan bọ. 30Ịḅeni ịmi. Ịikpo phọ ạJon awurom ghan bọ we mụum mọ ịḍua ẹghen kụ eru bọ — esi Ẹnaan ḍụghum, kụ esi oye?”
31Kụ aḍipuru phọ ạḍien ẹsighe ọogbaghanaan ịlo kọpagharanaan ẹlogh ogbo phọ ạbidi mọ, “Yira ọḅem mọ ịḍua esi Ẹnaan, pọ ọdi kạḅem mọ, ‘Iḍighi bọ ika kụ nyina nyọdi ímeeraam bọ?’ 32Kụ yira ọḅem mọ, ‘Ịḍua esi awe,’ pọ kụnughe ni iyira ẹka.” Bịdi ughiilaan ni we phọ, ịdi eḍighi bọ oomo awe mọsighenom mọ ạJon phọ oyil Ẹnaan ni. 33Kụ bịdi ọphagharanaan Jịzos mọ, “Yoor úlegheri,” kụ ạJizos ạḅeni bịdi mọ, “Mị kẹn inyina rị́ḅeni ịikpo phọ mị ạsighe bọ kụ raḍighinom ghan bọ ịphen phọ.”
Currently Selected:
Mạk 11: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
