Mạk 12
12
Aḍidogh ạbuo oḍighi ozo
(Matiu 21.33-46; Luk 20.9-19)
1 #
Azay 5.1, 2 Kụ ạJizos ạsighe sidogh kụ ạḅeniom bịdi mọ, “Oniin oye ạzuph ozo ireeny amiim, kụ aghoony akitonom, kụ aguph esi omiim ghan iimuma phọ, kụ ạlogh ogbogo dị kọtol ghan okori ozo phọ, kụ ạḅogh ozo phọ ạlogh ḍịghaagh abuḅephom iizo mọ oḍighinaan nyịno, kụ ạḍua agheel ẹnon ẹmha. 2Kụ rẹteeny mem ibugha phọ, kụ arom nyoniin ẹbene mọ ạghi ạteeny bụphe roḍighi ghan bọ ozo phọ aphin bin mụo ọno. 3Kụ bịdi osiph ẹbene phọ okuphogh, kụ ophorogh rꞌoopho ạraghaagh. 4Kụ uwozo phọ ạḅile arom ọnon ẹbene, kụ osiph nyọon ọgur ẹmhu ạay kụ osiphe umugholoor. 5Kụ ọdi ạḅile arom ọnon, kụ bịdi oghiigh nyọpo, kụ ạḅile arom ḍita ạbunon, kụ bịdi okuphogh buniin ọze buniin. 6Ọdi ạmoogh oniin dị asugha, ogina ọony ọdi, kụ ruukuna phọ arom nyọdi kụ ạḅem mọ, ‘Bịdi kokueni ni mọony phọ ạmi.’ 7Kụ bụphe roḍighi bọ ozo phọ oopuruan mọ, ‘Tọ, ọphon kụ kale bọ erua phọ ọdi. Itu oghiigh nyọdi ọbo ozo phọ aḍighi ọlo ayira!’ 8Kụ bịdi osiph nyọdi oghiigh kụ ọghogh ọḍuanam pạ ozo phọ.
9“Uwozo phọ kaḍighi bọ ika nụun? Ọdi katu ạze bụen phọ, kụ ạḅogh ozo phọ ạlogh ḍịghaagh ạbunon. 10#Ạsuo 118.22, 23Nyina kạ̋al aani ghan ịphen phọ ọge bọ pạ ạḍinya iigbia phọ mọ,
“‘Ẹko phọ ạbuloghom ruutu phọ oghel bọ kụ mẹḅile eḍighi ẹko ogbo.
11Ọmoogh-we phọ kụ aḍighi ịduon kụ eḍighi ni iikia riḍien ayira’?”
12Kụ ạbuo ạrumhu aJu phọ oogonoghian Jịzos osiph, ịdi eḍighi bọ ulegheri ni mọ aḍidogh phọ ẹkpulughiom bụno, kụ bịdi ughiilaan ni we phọ kụ ọwile nyọdi ọḍuaghu.
Aḍipuru ịlo osogh ghan iisogh
(Matiu 22.15-22; Luk 20.20-26)
13Kụ urom ni buniin aFarisi phọ rꞌạbudi ọmoogh mụḅoph rꞌạHerod, mọ ọghi ọnaghan ḍụghum ọnhu ọdi, ọbo osiph nyọdi. 14Kụ bịdi oru kụ ọḅeni nyọdi mọ, “Ọtughemia, yoor olegheri ni mọ nạ oye aruukuan ni. Nạ rápogh ghan oye kạmagh mọ ịyaar ri. Esi ạna oye oye ópu. Nạ ạkar ri rạtughemi ghan reten phọ Ẹnaan. Iilogh phọ ayira emeeraam ni mọ yira osogh ghan iisogh phọ aSiza uwo ẹmha phọ aRom ḍụghum? Osogh ghan ni kụ kúsogh?”
15Kụ ạJizos ạmiin ikeḍi phọ ạbidi, kụ apuru mọ, “Nyina rịdegh ghan ịmi eeghe? Ịsighe opoḍi asilva ịngo mị upogh.”
16Kụ bịdi ọngo nyọdi nyoniin, kụ ọdi mọ, “Ẹphen phọ ẹkigh ẹmhu ạnhian? Ọge sịen phọ ịlo ạnhian?”
Kụ bịdi mọ, “ASiza.”
17Kụ ạJizos ạḅeni bịdi mọ, “Isogh ịlo aSiza ẹngo Siza esogh ịlo Ẹnaan ẹngo Ẹnaan.”
Kụ bịdi omaghagha yogh.
Aḍipuru ịlo oḅetenu esi aḍuugh phọ
(Matiu 22.23-33; Luk 20.27-40)
18 #
Iiḍ 23.8
Kụ buniin aSadusi phọ uru ni ọteeny Jịzos. Kụ ạri awe phọ ạbuen úmeeraam mọ oye kạḅile ni aḅetenu esi aḍuugh. Kụ ọmagh nyọdi opuru mọ, 19#Dut 25.5“Ọtughemia, aMozis ạlogh ni ologh kụ ạge ụngo iyira mọ oye aphin ạnir kụ ạwile amugh kụ mọony ọ́mar, pọ umor ọdi ale ạnir phọ erua amiteghomonaan nmụny. 20Eniin amem oḍual abumor ụrol li, kụ okumoor phọ aphin ạnir kụ amugh kụ nmụny ọ́mar. 21Kụ ọpo atum bọ pạ ale ạnir phọ erua kụ amugh kẹn kụ nmụny ọ́mar; kụ ọpo amuneniom bọ ịraar phọ, eḍighinom mọ eniin. 22Oomo oḍual abumor phọ ophin ogina phọ ạnir phọ kụ omuughu kụ nmụny ụ́maraghi, kụ ruukuna phọ ạnir phọ amugh aani. 23Ụḅeni iyoor, mem oḅerenu esi aḍuugh phọ, ạnir phọ kaḍighi ọlo ạnhian? Ịdipho oḍual abumor phọ kụ mophin ghan bọ ni nyọdi.”
24Kụ ạJizos ạphagharanaan bịdi mọ, “Ịmiin ịdi nyina rẹpioman ghan bọ. Nyina ị́naghanan Ạḍinya Iigbia phọ, ílegheri kẹn ịikpo phọ Ẹnaan. 25Mem oḅerenu esi aḍuugh phọ, apinien kạ́tol. Awe kọkighogh rụukpaany phọ Ẹnaan. 26#Ẹḍua 3.6Kụ ịlo oḅerenu esi aḍuugh phọ, nyina kạ̋al ghan sịphe ạḍinya phọ aMozis, sịkpigh phọ ịpe ẹghaaph bọ ịlo ekpu eḍum ọnuza phọ, mọ Ẹnaan ẹḅeni nyọdi mọ, ‘Mị Ẹnaan Ebraham rꞌẠizik rꞌạJekob’? 27Ịkiom ologhi mọ Ẹnaan ẹḅem ni ẹkpaariom mọ ọno kụ Ẹnaan phọ ạbidi ni; ghạlamo ịdipho bịdi momuughu bọ ni, pọ bịdi odi ni. Nyina ẹkar ri ẹpioman.”
Ọkaraghi ogbogh ologh phọ
(Matiu 22.34-40; Luk 10.25-28)
28Oniin ọtughemia iilogh phọ ạrol aani ni sịphe, dị ạnaghan ọogbaghanaan phọ ạbidi. Kụ ọdi ạmiin ni mọ ạJizos ạphagharanaan ni Sadusi phọ igey, kụ aru ạteeny nyọdi apuru mọ, “Ọghen kụ ọkaraghi ogbogh sịphe oomo iilogh phọ?”
29 #
Dut 6.4, 5 Kụ ạJizos ạḅem mọ, “Ọkaraghi ogbogh phọ, ọphon mọ, ‘Weye Ịzirel, mịmagh! Ọmoogh-we Ẹnaan phọ ayira bịn kụ Ẹnaan. 30Ịpomoghian nyọdi rꞌoomo ologhi anyina, rꞌoomo uwaloor anyina, rꞌoomo ịitughian anyina, rꞌoomo ịnyaam anyina.’ 31#Lịv 19.18Ọpo amuneniom bọ ịyal phọ, ọphon. ‘Ịpomoghian ọnon oye ịdipho aloor phọ anyina.’ Ọnon ologh dị ạḅile ạbugh apu ịphen phọ ólho.”
32 #
Dut 4.35
Kụ ọtughemia iilogh phọ ạḅeni Jịzos mọ, “Ọtughemia, maḍighi. Ịphen nạ ạghaaph bọ ịne phọ ni. Ọmoogh-we bịn kụ Ẹnaan. Emuton nyọdi ọnon ólho. 33#Hos 6.6Kụ ọphomoghian ọdi rꞌoomo ologhi ạna rꞌoomo ịnyaam ạna, rꞌọphomoghian ọnon oye ịdipho aloor phọ ạna — ịphen phọ epu iboom ịkpuy rꞌạrikia.”
34 #
Luk 10.25-28
Kụ ạJizos ạnaghan bọ mọ ọdi ạkuami ni ạpagharanaan phọ, ạḅeni ni mọ, “Nạ ọ́kelan mun ọmar phọ kꞌẸnaan.”
Kụ ịphen reten bịn oye óḅom mun ẹmhu ọḅile opuru nyọdi ịyaar.
Aḍipuru ịlo aMesaya phọ
(Matiu 22.41-46; Luk 20.41-44)
35Kụ ạJizos odi sịphe Otu Ịiḅereghi phọ rạtughemi, kụ apuru ḍipuru mọ, “Uḍighi ika kụ ạbutughemia iilogh phọ rọḅem ghan bọ mọ aMesaya phọ ọony aDevid? 36#Ạsuo 110.1Uwaloor Iigbia phọ aḍighi dị aDevid rꞌaloor ọdi ạḅem mọ,
“‘Ẹnaan phọ ẹḅeni Ọmoogh-we ạmi mọ:
Tọl ḍịghaagh elhiom ạmi,
tụtu ẹteeny mem dị mị kaḍighi bụmulogh-ḍien phọ ạna ịkasi ọkpasaghiom aruwol.’
37“ADevid rꞌaloor ọdi aghol Mesaya mọ Ọmoogh-we, kụ ịḅile bọ eḍighi ika kụ ọdi katu bọ mọony aDevid?”
ẠJizos ạpur rụru ịlo ạbutughemia iilogh phọ
(Matiu 23.1-36; Luk 20.45-47)
Kụ aḍita phọ ọrol bọ ụnaghanan ni Jịzos rꞌọḅaal ologhi. 38Mem mọ dị rạtughemi bọ, ọdi ạḅem mọ, “Igona loor anyina esi ạbutughemia iilogh phọ ẹḅeeraan bọ orelhiom ghan igudaguda iinmenan phọ rꞌomeregha ịimaghaghan eghuan ẹpe asiḍighi phọ, 39rꞌọrologhu ghan igbogh ạsidol ẹpe arubughotu phọ rꞌariisi eghuan mem amalhe. 40Bụen kụ rọpueghi ghan bọ rạraar arukpukele ạnmariir phọ, kụ okue bọ rọoḅereghi ghan ịidoony ịiḅereghi phọ. Ịdi kọliom bịdi kẹloghori ni iboom.”
Ịlo inmo dị ekpukele ạnir ạlogh ologhi eekoom ikpoki phọ
(Luk 21.1-4)
41Kụ ịdipho ạJizos ạrol bọ atuman eekoom ikpoki Otu Ịiḅereghi phọ, ọdi ạmiin ni ịdi awe phọ rọloghoḍi ikpoki sịphe phọ. Ịbadi ạraalha ụlhoghoḍi ni iboom ikpoki. 42Kụ oniin uwekulom ekpukele ạnir aru ni ạlogh aani ịyal ịkpirikpiri ikpoki dị ẹman egbem ạkobo. 43Kụ ọdi ạmagh bụmatuan phọ ọdi aakpomoghi kụ ạḅeni mọ, “Mị ạkar rịḅeni inyina mọ ịphen ạnir phọ ọphon ạlogh bọ ologhi eekoom ikpoki phọ ẹbugh ni epu dị ọḅophoghi oomo ịpe ạbueri phọ, 44ịdi eḍighi bọ oomo ạbueri phọ ọlogh ịdi mepeel sịphe ẹelha phọ ạbidi, kụ ạnir phọ ọphon ạlogh ni oomo phọ ịpe ọdi ạmoogh bọ bịn ạmadan.”
Currently Selected:
Mạk 12: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
