Maika 6
6
Ọmoogh-we phọ ạmoogh ḍighiton rꞌỊzirel
1Ịnaghan ḍighiton dị Ọmoogh-we phọ ạmooghom rꞌỊzirel.
Ḅetenu, Ọmoogh-we, ạghaaph ịiḅaghami phọ ạna; ạraaḅaraph phọ rꞌaroogbolom mọ ẹnaghan ịpe nạ kạkaaph bọ!
2Nyina ạraaḅaraph phọ, nyina ariphighiom ade phọ, ịnaghan ọghaaph Ọmoogh-we phọ! Ọmoogh-we phọ ạmoogh ni ḍighiton rꞌawe phọ ọdi. Ọdi kạkpalham Ịzirel.
3Ọmoogh-we phọ ạḅem, “Weye ạmi, mị iḍighi inyina eeghe? Ika kụ ẹdi mị aḍighi dool esi anyina? Ịphagharanaan ịmi. 4#Ẹḍua 12.50, 51; Ẹḍua 4.10-16; Ẹḍua 15.20Mị ịsighe inyina amitiom sịphe Ijipt; mị ịtagharan inyina dọl ạrebene; mị arom Mozis, Eeron rꞌạMiriam mọ iḍiemiom inyina. 5#Igb 22.2—24.25; Jos 3.1—4.19Weye ạmi, ịitughian ịpe ạBelak ọdaam mọ ạMoab ạnya bọ oḍighi anyina rꞌịpe ạBelam ọony phọ aBior ạphagharanaan bọ nyọdi. Ịitughian ịpe emite bọ ẹpe eten phọ emiigh sịphe arugbogo phọ ẹpe Akasia kụ esi Gịlgal. Ịitughian rạraar phọ ịphen bịn nyina kelegheri ni mọ mị uḍighi ịlo ọphelom anyina.”
Ịdi Ọmoogh-we phọ ạwa
6Mị katuomaan eeghe Ọmoogh-we Ẹnaan phọ kꞌạke, mem lọ mị aru ooseeny ọdi? Mị kạpam ọkaraghi igey ạnmuny ạsinam kụ ạsu esi ịyaar aghuḍum dị mị kạngo nyọdi ḍụghum? 7Kẹḅeeraan ni Ọmoogh-we phọ eḍighi ịyaar lọ mị aruomaan nyọdi sịmuunir idughuna ḅịle rꞌạmunum-ọliv dị rakiil kụ eekuna ị́tol? Mị kạngo nyọdi ọkpana ọony phọ ạmi ọkpiom ịkaraph ạmi ḍụghum? 8Eeye. Ọmoogh-we phọ mụḅeni ni iyira ịdi ẹnighe. Ịdi ọdi rạwa esi ayira ịduon: oḍighi ịlo ẹkpianaan, oḍeenaan ẹphomoghian oomo amem, rꞌosooromi aloor kụ ọrolan rꞌẸnaan ayira.
9Ẹkpe ni ọlogh eghuan Ọmoogh-we phọ. Ọdi ạmagh ẹmha phọ mọ, “Ịnaghan, nyina awe phọ ookpomoghan bọ ẹmha phọ. 10Ologhi aruutu ạbukaraph awe, aruphua edi ni dị bịdi ọmoogh ịkaraph areten. Bịdi rọtoom ghan ọtoom iigbegheḍiom, ịyaar dị mị aghel. 11Ika kụ ịdi mị kạsar ạbilenaan weye dị rọtoom ghan ọtoom iigbegheḍiom rꞌịlo ẹemor dị ị́nighe? 12Awe ikpoki anyina rọkpiloghom ghan bụphe ị́nighenom bọ, kụ oomo anyina awe ọkpe. 13Loor ẹmhu ịkaraph phọ anyina — pọ kụ ịyaar phọ mị mamiigh ọphue rꞌoogulemi anyina. 14Nyina kele ni, kụ kẹ́per — ọkar agey, ọkoony kisiph inyina nịiniin. Nyina kẹpam ni rạraar ẹḍuanam kụ nyina kétue eekpomoghi. Tọrobo ịyaar lọ nyina eeko kopiemiom ẹgham. 15Nyina kẹzuph ni ịbiakpa, kụ kẹ́ku ịizupha phọ. Nyina kemiim ni mụnum loor ọliv, kụ kétue eḍighinom ịyaar. Nyina kẹsa ni miim, kụ kẹ́pughol. 16#1 Ạbud 16.23-28; 1 Ạbud 16.29-34; 21.25, 26Ịphen kemite ni loor esi dị nyina mẹdaph ẹkaraph eḍighinom Ọmri ọdaam mọ rꞌEhab ọony phọ ọdi. Nyina edimom iilogh ạdol ạbidi. Esi ịduon phọ, mị kiphiemi ni inyina, kụ tọrobo oye kighel inyina. Awe tọrobo ekpisi kiphogh inyina ọḅitonaan.”
Currently Selected:
Maika 6: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
