Maika 5

1Weye aJeruselem, iikpomoghi weye ẹgham anyina! Mukoom iyira! Bịdi rozuom oḍiemiom Ịzirel.

Ẹnaan eguanaan omitiom oye dị kạḍua Bẹtilihem atu kụ ạda

2 # Mat 2.6; Jọn 7.42 Ọmoogh-we phọ ạḅem mọ, “Bẹtilihem Efrata, nạ eniin ẹmha dị eghom iboom sịphe Juda, kụ aloor ạna kụ ẹdi mị kamitiom oye dị kạda Ịzirel, dị ẹemara ẹemara ọdi emiigh kꞌageedi.”

3Ọmoogh-we phọ kakel weye ọdi ạngo mụlogh-ḍien ạbidi tụtu ạnir dị kạmar mạmar mọony olephiri ọdi. Pọ kụ amem dị awe phọ ọdi dị odi dọl iiruen kotu ọḅophan rꞌawe ạbidi. 4Mem dị ọdi aru, ọdi kạdaam weye ọdi rꞌịnyaam dị ẹḍua esi Ọmoogh-we phọ rꞌesi igbogh Ọmoogh-we Ẹnaan phọ rꞌaloor. Awe ọdi kọtol rꞌẹepho loor esi dị awe oomo aḅirini phọ kologhoma igbogh phọ ọdi, 5kụ ọdi kạsighe ẹepho atu.

Ọtagharan rꞌọliom

Mem dị awe Asiria ozuom eelhe ayoor ẹgham kụ ọphueghi ịikpara ariisi ayoor, yoor kotom ni buḍiemiom ịnyaam ayoor eenan ạbidi, 6#Emi 10.8-11Esi ạraraar ẹgham bịdi kọkpar opu Asiria, kụ bịdi ụphel iyoor ḍịghaagh Asiria mem dị bịdi oḍigh eelhe ayoor ẹgham.

7Awe Ịzirel lọ okpetenaan kọkigh ịdipho ooto kꞌỌmoogh-we phọ dị rạngo ịnyaam ịbadi areelhe, ịdipho oyiririph ạnyu ịizupha dị repoph. Bịdi koḍuom ologhi esi Ẹnaan, kési oye. 8Bụphe kosugha bọ sịphe areelhe phọ kọkigh ạnam-dịka dị rẹwa eḍien olhe esi ẹekpua ḅịle mꞌesi ạroogho: ọdi aateneghian rꞌiyool-ịga phọ, azuom bịdi bịn atunyi bịdi — kụ oḍuom ologhi ọloghonaan ạḍighaagh kạ́tol. 9Ịzirel kọkpar opu bụmulogh-ḍien ạbidi kụ opiemi oomo ạbidi.

10Ọmoogh-we phọ ạḅem mọ, “Mem mọ ọpo mị kạsighiogh ni rụsu anyina kụ aagulemi rughuugh-ude anyina. 11Mị kapiemi rạmha phọ edi bọ de phọ anyina kụ ạpueghi riisi ịnyaam mọ anyina. 12Mị kạpueghi rụgba ịiḍaany phọ nyina reḍighinom ghan bọ kụ rꞌoniin oyil ịmiin inyina kísughanaan. 13Mị kapiemi ịkaaneen ạrumugh anyina rꞌạroko asighiigh ariisi ạrikia anyina; nyina kéeseeny mun rạraar phọ nyina rꞌaloor kụ eḍighi yogh bọ. 14Mị kanyuughi aler igbudu um-ạke Asera sịphe ade phọ anyina, kụ apiemi rạmha anyina. 15Kụ rꞌogbogh ophin ologhi ạmi mị kaḅulemian oomo areelhe dị ịmi kụ́naghanan.”

Currently Selected:

Maika 5: ẠḌI

Highlight

Copy

Want to have your highlights saved across all your devices? Sign up or sign in

Abuan Language Development and Literacy Society

Ayama-Abua, Rivers State, Nigeria

Published by

NBTT

Nigeria Bible Translation Trust

No. 7 Old Airport Road

P.O. Box 790, Jos Plateau State, Nigeria

ISBN: 978-978-966-354-5

In cooperation with

MIDI BIBLE

Ch. de Praz-Roussy 4b, 1032 Romanel-sur-Lausanne, Switzerland

The New Testament in Abuan was originally published

in 1978 by The Bible Society of Nigeria with © UBS

Learn More About Ạḍinya Iigbia