Maika 3

AMaika ạpharanaan buḍiemiom Ịzirel

1Ịnaghanan, nyina ạbuphe ọdaaghi bọ Ịzirel! Nyina ẹkpe ni ọmoogh ịyaar oḍighinom iiḅi ịiruen, 2kụ nyina ẹḅile kụ ekel ịyaar lọ ẹnighe kụ ẹpomoghian ọlo ị́nighe. Nyina ẹkpan ruzu awe ạmi eye kụ ẹkanyan iphulupul ạbidi ẹsighe loor ịḅarara. 3Nyina ẹba we ạmi. Nyina ẹkpan ruzu ạbidi, kụ ebunughi ịḅarara ạbidi kụ eegbo bịdi mụdi iphulupul ịnam dị kọsa ologhi aguugh. 4Amem retu ni dị nyina kemoghi emitiom epoghom Ọmoogh-we phọ, kụ ọdi inyina kị́naghanan. Ọdi kạ́naghanan ịiḅereghi anyina loor esi dị nyina mẹpioman.

5Ariil dị oguanaan ọngo ẹepho weye lọ ọkpe bịdi ikpoki mookeleghi aweye ạmi kụ ọngo oḅio-kakaph mọ ẹgham retu bụdi bịdi ịyaar ụ́kpe. Riil phọ ạbuen Ọmoogh-we phọ ạḅeni mọ, 6“Riil, aḍio anyina remunughan, erumuḍio phọ remeelom ẹmhu anyina. Loor esi dị nyina íḍiemiom weye ạmi igey, nyina kẹ́miin mun uḍien, ḅịle nyina kétue mun ẹkaaph ịyaar lọ kemite.” 7Bụphe kọmiin bọ ịlo kemite kọmoogh ni roofola mem dị ịpe bịdi ọghaaph bọ kụ ímite. Bịdi kọmoogh umugholoor loor esi dị Ọmoogh-we phọ bịdi ọ́naghanan.

8Kụ esi ạmi, Ọmoogh-we phọ amuzeḍiom uwaloor ọdi rꞌịikpo ọdi, kụ ụngo ịmi ịitughian iiḅi ịiruen ḅịle rꞌoḅio ọḅeni awe phọ Ịzirel ịkaraph ạbidi. 9Iler rụru ẹnaghan, nyina ạbuphe ọdaaghi bọ Ịzirel, nyina ạbuphe oghel bọ egey eḍighinom ịyaar kụ ekiton igey etene ịkaraph. 10Nyina epighi rẹlogh ẹmha Ẹnaan, Jeruselem, ạnyu ọzeeghi awe rꞌoogbo ịkaraph ịiruen. 11Bụphe ọda bọ ẹmha phọ role ghan oti ọman; ariil ạrikia phọ ọgba ologh phọ omitiom, pọ kọkpe ikpoki bịdi; ariil phọ kụ ọghaaph ịlo bịdi ọmiin, pọ kọboor ikpoki — kụ oomo phọ ạbidi ọḅem mọ Ọmoogh-we phọ odianaan rꞌạbidi. “Ịyaar lọ ị́nighe iyoor kị́teeny,” bịdi ọḅem, “Ọmoogh-we phọ odianaan rꞌayoor.”

12 # Jer 26.18 Esi ịduon phọ, loor ẹmhu phọ anyina, Zạyon koḅeph ịdipho ozo, Jeruselem keten egu asighiigh kụ eegbolom Otu Ịiḅereghi phọ keten ẹekpua.

Currently Selected:

Maika 3: ẠḌI

Highlight

Copy

Want to have your highlights saved across all your devices? Sign up or sign in

Abuan Language Development and Literacy Society

Ayama-Abua, Rivers State, Nigeria

Published by

NBTT

Nigeria Bible Translation Trust

No. 7 Old Airport Road

P.O. Box 790, Jos Plateau State, Nigeria

ISBN: 978-978-966-354-5

In cooperation with

MIDI BIBLE

Ch. de Praz-Roussy 4b, 1032 Romanel-sur-Lausanne, Switzerland

The New Testament in Abuan was originally published

in 1978 by The Bible Society of Nigeria with © UBS

Learn More About Ạḍinya Iigbia