Maika 2
2
Ịdi kemitenaan bụphe rọgbiphoghom rukulom
1Pọ eeghe ọdo ịminimiin dị kẹtolonaan bụphe ọmina kụ ụ́naani ọḅile rogbiighi ghan ịkaraph! Mem lọ ạḍiroor ẹḅaal, bịdi rọmoogh eepoogh bịn, bịdi oḍighi omitiom ịkaraph ịitughian phọ ạbidi. 2Mem lọ bịdi ọwa ọmoogh arere, bịdi oziton; bịdi ọwa ruutu, bịdi ọsighe. Oye lọ ạmoogh eghunotu ḅịle mꞌephua, pọ kẹ́lo ọdi.
3Kụ iḍighi kụ Ọmoogh-we ạḅem mọ, “Mị rạatughian ghan ọsighe ịiḅaghami oruom anyina, kụ nyina kétue ekpetenaan. Nyina kẹmoogh ni ịiḅaghami, kụ nyina kételhiom rꞌobaga. 4Mem dị retu, awe kọsighe ọghaaph anyina kụ oḍighinom ịyaar dị reḍeenaan igbogh ịiḅaghami, kụ bịdi kọmoor ḍụor phọ ạḍien dị keḍeenaan ologhi dị eeph esi ịdi nyina mẹmiin:
“Yoor mophe ọmuneen!
Ọmoogh-we phọ mạsighe de ayoor
kụ ạngo bụphe usiphi bọ iyoor ọḍuanam.”
5Kụ mem dị ẹteeny dị koḅulemi de phọ ọngo weye Ọmoogh-we phọ, abin kạ́tolonaan rꞌoniin ọnyo anyina.
6Awe ọgba kụ ụḅeni ịmi kụ ọḅem mọ, “Kẹ́gba ị́ḅeni iyoor. Kẹ́gba ịlo oomo ịpe. Ẹnaan kíifolomi iyoor. 7Nyina regbi mọ otonyon ni weye phọ Ịzirel ḍụghum? Ọmoogh-we phọ maroph ọkparagham phọ ọdi ḍụghum? Ọdi kạkar ri aḍighi rạraar phọ ịphen ḍụghum? Ọdi ọ́ḅaanaan weye egey eḍighinom rꞌoodugha ọnhu?”
8Ọmoogh-we phọ ạpagharanaan mọ, “Nyina rezuom weye ạmi ịdipho ạmulogh-ḍien. Awe ọḍua ẹgham origheel, oḍuom ologhi mọ bụno mokpetenaan ẹpe ologhi otu, pọ ịsiphe kụ ẹdi nyina edi rekori omi asikoti ạbidi ọsighe rạman ạbidi. 9Nyina eporogh nmạriir aweye ạmi ẹsighe ruutu phọ bịdi ọphomoghian bọ, kụ nyina meḍighi ịdi ạḍiseph ạmi nmụny phọ ạbidi kẹ́teeny mun kꞌagee-pọ. 10Iḅerenu ẹḍua; ạdol ẹepho ílho mun sịen. Ịkaraph anyina mẹphue esi phọ ẹphen ẹḅogh ẹngo oogulemi.
11“Awe phọ ạbuen rọwa ọdo oyil dị ratelhe yogh rꞌọkpe rꞌiikeleghian kụ ạḅem mọ, ‘Mị ạmiin mọ amiim, muphoneen rꞌạmughologhol, kakil kụ atu esi anyina.’
12“Kụ ọlo, mị kiikpomoghi inyina, oomo anyina awe phọ Ịzirel osugha bọ. Mị kịsighe inyina aakpomoghi ịdipho iyool-ịga dị retigheel ọteeny aḍita ạbidi. Ịdipho esi ạroogho dị iyool-ịga emuza, de phọ anyina awe kọḅile ni omuza.”
13Ẹnaan kekughuron eten ẹngo bịdi kụ eḍiemiom bịdi omite esi ạdol iiruen. Bịdi kọka rughuugh ẹmha phọ omite ọtol dọl ẹereegh. Ọdaam ạbidi Ọmoogh-we phọ rꞌaloor kaḍiemiom bịdi amitenom.
Currently Selected:
Maika 2: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
