Maika 1
1
1 #
2 Ạbud 15.32-38; 2 Krọ 27.1-7;
2 Ạbud 16.1-20; 2 Krọ 28.1-27;
2 Ạbud 18.1—20.21; 2 Krọ 29.1—32.33 Mem dị aJotam, Ehaz rꞌạHezekaya oḍighi bụdaam aJuda, Ọmoogh-we phọ arom ni dom mọ aḍien Maika ọpo ẹmha aMoreset. Ọmoogh-we phọ agananami ni oomo ạraraar phọ ịphen dị egbolomaam Sameria rꞌaJeruselem aḍeenaan Maika.
Omoghinaan aSameria rꞌaJeruselem
2Ịnaghan ịphen, nyina oomo areelhe;
ịnaghan ịphen, oomo ạbulo odi sịen aḅirini phọ!
Ogbogh Ọmoogh-we phọ kạkaaph ni ịkaraph anyina,
Ịnaghan. Ọdi ạtol otu ịiḅereghi ọdi ẹpe kꞌạke kụ rạkaaph.
3Ọmoogh-we phọ ạḍua esi iigbia ọdi kụ ratu;
ọdi kasoor atu kụ atelhe ạnyu ạraaḅaraph phọ.
4Kụ ạraaḅaraph phọ kẹgbo ni
ịdipho oba dị ophoghomiom nịan;
bịdi keekuan esumughu riḍiiny
ịdipho ạmuum dị ạḍua eegbolom kụ raakuan.
5Oomo ịphen kemiteghu ni loor esi dị awe phọ Ịzirel moḍighi ịkaraph ọḅile ọḅaar ẹmhu esi Ẹnaan. Ạnhian kụ ẹdi kọkpalham ọḅaar ẹmhu phọ Ịzirel? Sameria, ẹkpana ẹmha rꞌaloor! Apum odianaan ạnhian esi ooseeny ghan ịkaaghineen ạrumugh phọ edi bọ sịphe Juda? Jeruselem rꞌaloor! 6Esi ịduon phọ, Ọmoogh-we phọ ạḅem mọ, “Mị katene Sameria eḅum asighiigh sịphe ạḍiyaghaghaany ade phọ, esi dị kọzuph ghan iizin ireeny amiim. Mị kaaku ịpherepe iikpe ẹmha phọ ologhi eḍiiny, kụ aguphogh amitiom ephighiom mọ. 7Oomo ịma ịkaaghineen ạrumugh ẹmha phọ kootughuḍi kpiriph kpiriph, tọrobo ịyaar lọ ọngo nmạriir ẹkaraph erelhe ịsiphe otu iigbia phọ ạbidi ạnian kụ kepiemi, kụ oomo igbudu dị ọḅologh keten egu atopha. ASameria ạmoogh oomo ạraraar phọ ịphen osuom arusu ẹnuum ade kụ nyịidipho ạbumulogh-ḍien ạbidi kotool ọkiomaan ẹnon ekpisi.”
8Pọ kụ amem dị aMaika ạḅem mọ, “Loor ịduon phọ, mị kamoghi, ạtol dọl ọto. Oḍeenaan okururu ạmi, mị katelhiom oopho ạrada rꞌẹdaḅa. Mị kagbophoghu ịdipho aghoogh eḍum kụ ạlooghi ịdipho efagara-ẹnun. 9Kótue ookonom oḍighima ạraraar aSameria, kụ rẹki ịdi aJuda kạmiinom iniin phọ ịne. Ophiemi masi rụnhu-aḍibuo aJeruselem rꞌaloor, esi phọ awe phọ ạmi odi bọ.”
Ạmulogh-ḍien rakpekian Jeruselem
10Kẹ́ḅeni mụlogh-ḍien ayoor ẹpe Gạt ịlo emeel ayoor; kémeera bịdi ọmiin dị nyina remoghi. Awe ạBet Liafra, iikilighian loor ophugh ịlo oḍeenaan ẹ́moogh mun oḍuom ologhi phọ anyina. 11Nyina awe aSafir, ịki ekpisi ịbooghian dọl ẹdaḅa rꞌumugholoor. Bụphe odi bọ sịphe Zaanan kómite ẹmha phọ ạbidi loor oghiilaan. Mem dị nyina ẹnaghan dị awe ạBet Ezel romoghi, nyina kelegheri mọ esi ịbooghian ílho sịphe. 12Awe aMarot odi kụ rokori ghan ọloghonaan ạḍighaagh, loor esi dị Ọmoogh-we phọ maḍur ịiḅaghami ạkpulom Jeruselem. 13Nyina phọ ạbuphe odi ghan bọ Lakis, iḍur ạrusu phọ ẹkpaariom rughuugh-ude phọ. Nyina ịtuughaany ịkaraph Ịzirel kụ eḍighi ịdi aJeruselem ọpioman. 14Kụ nyịidipho, weye aJuda, ịḅeni ẹmha aMoreset Gạt mọ ịmaar ẹrol. Ạbudaam mọ Ịzirel kọ́moogh ọloghonaan ạḍighaagh esi ẹmha Akzib.
15Weye aMaresa, Ọmoogh-we phọ kịḅogh ni inyina ạngo mụlogh-ḍien dị kobe ọsighe ẹmha anyina. Arephelegbe-abuḍiemiom mọ Ịzirel kọki kụ ọbooghian ọgbal epogh aḍighiigh Ạdulam. 16Weye aJuda, ịsama sịlaal anyina kụ eḍeenaan okururu loor ạnmuny phọ nyina ẹphomoghian bọ. Ạrumhu anyina ekpokolo ịdipho ịlo ạredelhe, loor esi dị kọsighe nmụny anyina rạghaagh anyina ọkimom ẹnon ekpisi ọrolomi ạdol iiruen.
Currently Selected:
Maika 1: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
