Lịvitikos 3
3
Ạrikia ẹboroph
1Tọrobo amem dị ọnyo anyina ratu ọphighiron ẹkia ẹboroph, ọdi ạsighe ghan nạm, mꞌạḍiya mꞌaḍilephiri, dị kẹ̋epuan loor, kụ ạpighironom. 2Oye phọ ạḅam ḍịghaagh ọdi ẹmhu ẹnam mọ, kụ aghiigh sịphe ọnhu-aḍibuo Ogbogo Ạdol Ọmoogh-we phọ, kụ ariil ạrikia phọ, ạnmuny phọ Eeron, ọsighe ịḅaal phọ ọsaraghi oomo ịsiphe enmeny phọ okitonom, 3kụ ẹkia ẹboroph phọ, ọsighe ẹnuum mọ eekpereghiom bọ ịpe ọkuruḅaka phọ rꞌoomo phọ ẹnuum mọ edi bọ ologhi phọ, oguom nịan ịdipho ẹkia dị ọphighironaan egbodo Ọmoogh-we phọ. 4Ọḅaram kẹn ịyal phọ ịkpinyoom mọ rꞌẹnuum mọ edimom bọ loor ạbidi, rꞌẹebogh ẹnuum mọ ẹpe ẹḅaram bọ sịphe ạni phọ, ọsighe. 5Kụ ariil ạrikia phọ ọsighe oomo phọ ịphen phọ oguom nịan sịphe enmeny phọ, ọḅaram rꞌạrikia oguom ạnian phọ. Ẹphen phọ ẹkia eeḅi eḍu dị oguom nịan ọngo Ọmoogh-we phọ.
6Kụ eru mạar dị ẹkia ẹboroph phọ eḍighi ẹlo oyool-ọga mꞌạtu-ọga, oye phọ ạsighe ghan ọlo loor kọ̋opuan. 7Eru oyool-ọga kụ rọphighironom ẹkia ẹboroph phọ, pọ ọdi ạsighe ghan ạghi egbodo Ọmoogh-we phọ kụ ạphighironaan. 8Ạḅam ḍịghaagh ọdi ẹmhu ọga phọ kụ aghiigh sịphe aḍibuo Ogbogo phọ, kụ ariil ạrikia phọ ọsighe ịḅaal phọ ọsaraghi oomo ịsiphe enmeny phọ okitonom, 9kụ sịphe ẹkia ẹboroph phọ, ọsighe ẹnuum mọ rꞌoomo ịpe ọkuruḅaka phọ, ẹphen ẹsoph phọ rꞌẹnuum mọ eekpereghiom bọ rꞌẹnuum mọ ẹpe edi bọ ologhi phọ rꞌoomo ẹnuum mọ edi bọ sịphe ọkuruḅaka phọ, oguom nịan ịdipho ẹkia dị ọphighironaan egbodo Ọmoogh-we phọ. 10Ọḅaram kẹn ịyal phọ ịkpinyoom mọ rꞌẹnuum mọ edimom bọ loor ạbidi, rꞌẹebogh ẹnuum mọ ẹpe ẹḅaram bọ sịphe ạni phọ, ọsighe. 11Oḍighi oyil ạrikia phọ ọsighe ghan oomo phọ ịphen phọ oguom ạnian sịphe enmeny phọ. Ẹphen phọ ẹkia eḍien dị oguom nịan ọngo Ọmoogh-we phọ.
12Kụ eru ạtu-ọga kụ ạpighironom ẹkia ẹboroph, pọ oye phọ ạsighe ghan ạghi egbodo Ọmoogh-we phọ kụ ạphighironaan. 13Oye phọ ạḅam ḍịghaagh ọdi ẹmhu ạtu-ọga phọ, kụ aghiigh sịphe ọnhu-aḍibuo Ogbogo phọ, kụ ariil ạrikia phọ, ạnmuny phọ Eeron, ọsighe ịḅaal phọ ọsaraghi oomo ịsiphe enmeny phọ okitonom, 14kụ sịphe ẹkia ẹboroph phọ, ọsighe ẹnuum mọ eekpereghiom bọ ịpe ọkuruḅaka phọ rꞌoomo phọ ẹnuum mọ edi bọ sịphe ologhi phọ, oguom nịan ịdipho ẹkia dị ọphighironaan egbodo Ọmoogh-we phọ. 15Ọḅaram kẹn ịyal phọ ịkpinyoom mọ rꞌẹnuum mọ edimom bọ loor ạbidi, rꞌẹebogh ẹnuum mọ ẹpe ẹḅaram bọ sịphe ạni phọ, ọsighe. 16Oḍighi oyil ạrikia phọ, ọsighe ghan oomo phọ ịphen phọ oguom ạnian sịphe enmeny phọ. Ẹphen phọ, ẹkia eḍien dị oguom nịan ọngo Ọmoogh-we phọ. Oomo phọ ẹnuum mọ ịlo Ọmoogh-we phọ. 17Iilogh phọ ịphen eru eḍighinom ịyaar kꞌanyina kꞌagee-pọ oghiil atum oghiil: ị́ba ghan ẹnuum, ị́ba ghan ịḅaal.
Currently Selected:
Lịvitikos 3: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
