Job 28
28
Esi Oboomiom Olegheri ịyaar
1Ariisi edi ghan ni ude dị roguph ghan silva komitiom;
ariisi edi ni dị roḍighi ghan gol.
2Awe roguph ghan ude kụ komitiom okuron
kụ ọozaghami ọgiata omitiom ologhi ạrana.
3Awe rọwaaghi ghan ni rạraar esi ogbogh ufiri.
Bịdi rọki ghan ọlha-ude kụ kọwaaghi
kụ ọki esi ufiri oguph ọwa ạrana.
4Ọkelan ekpisi lọ oye arugh
rꞌekpisi dị ẹda oye kési ghan,
awe roguph ghan ịidoony aropogh.
Ẹpe phọ kụ ẹdi ogina ạbidi kọtol kụ okumuan ghan
kụ ọokpaphagh ghan iḍigh ẹpe ariini phọ.
5Eḍien resi ghan sịen ade phọ
kụ ọlo ẹpe ọlha-ude phọ ni
oomo phọ ịdi meḅughuronu eezighiḍian.
6Asighiigh phọ edi bọ ẹpe ude phọ ẹmoogh ni sạfair,
ḅịle kẹn ọoru phọ ạmoogh ni gol.
7Ọogho ólho dị rạmiin ghan eten ẹpe ude phọ roguph bọ.
Ḅịle kẹn ọdelhe ólho dị rạpeeph ghan ạnyu ạbidi.
8Ạnam-dịka mụghumo ẹnon elhom ẹnam ílho
dị retelhe ghan reten phọ ịpe phọ oye úlho bọ.
9Awe roguph ghan sighiigh dị ẹkar ẹkpar iboom,
roguph ghan rạaḅaraph koḍinyon.
10Ịdipho bịdi roguph bọ ropogh komitiom eten ariisi asighiigh phọ,
bịdi rọmiin ghan ni ịikia ạrana dị ẹman ikpoki.
11Bịdi roguph ghan kọghi osi ude esi phọ ọphiiny phọ amiigh bọ
kọḅile omitiom obalelhe rạraar dị ạaghi yogh.
12Kụ ọlo ẹghen kụ ẹdi kọmiin bọ olegheri-ịyaar?
Ẹghen kụ ẹdi yira kọtuugha ọnaghanan ạḍughum?
13Olegheri-ịyaar kótue ọmiin igbo awe;
oye ólhegheri ọkaraghi ịpe ọdi ạman bọ.
14Ude ạriphiiny ạbazi phọ rạḅem ghan
mọ olegheri-ịyaar kọ̋miin ẹpe.
15Kótue ọsighe silva rꞌagol okoom.
16Ọkaraghi ogey agol rꞌikpo ẹbe bịn
ị́man ḍighi ọdi.
17Ọdi ạman ịyaar apu gol,
apu tọbili dị oḍighinom gol mꞌatamaḍiki.
18Olegheri-ịyaar ạman mạar
apu ikpo ẹbe rꞌịkpurukian.
19Ạtopas dị ạnighe agey rꞌogey agol
bịn kọ́tomaam ịdi olegheri-ịyaar ạman.
20Ẹghen nụun kụ azin olegheri-ịyaar?
Ẹghen kụ ẹdi kọtuugha ọnaghanan ạḍughum?
21Ịyaar ílho dị repooghu ni dị ketue ẹmiin nyọdi.
Ghạlamo ẹnun phọ ẹpe rẹpeeph bọ ni.
22Ghạlamo aḍuugh ḅịle ọphueghi bịn
ọḅem ni mọ bụno ụnaghan ụḅem-mọ bịn.
23Ẹnaan phọ bịn kụ elegheri eten phọ,
ẹḅile elegheri esi dị kọmiin olegheri-ịyaar,
24loor esi dị ọdi rạmiin bọ ni ruukuna ade phọ
rạmiin ghan oomo ạraraar dị edi eeḍian okuaḍio phọ.
25Mem mọ Ẹnaan ẹngo bọ ịikpo oghim mọ,
ẹḅile ẹmha ịpe otu-ḅualhe phọ kaleeny bọ,
26mem mọ Ẹnaan ẹmha bọ ekpisi phọ ọlophia kạloph bọ
rꞌeten phọ ẹpe ọomaany phọ katelhe bọ;
27Ọpo kụ amem mọ ọdi ạmiin bọ olegheri-ịyaar phọ rꞌịpe ọdi ạman bọ —
kụ ọdi ạḅem mọ ẹnighe ni.
28 #
Ạsuo 111.10; Asid 1.7; 9.10 Ẹnaan ịḅeni ni weye mọ,
“Nyina rẹwa ọsu ologhi, pọ nyina kẹlogh ghan eegu Ọmoogh-we phọ.
Nyina rẹwa ọmoogh ọnaghanan ạḍughum, pọ nyina kekel ghan ịkaraph.”
Currently Selected:
Job 28: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
