Job 12
12
Job
1-2Ii, nyina kụ ẹḍogh awe phọ.
Mem lọ nyina emuughu, olegheri-ịyaar kamughan rꞌanyina.
3Kụ ọlo, mị ạsu ni ologhi ịduon anyina;
nyina ịmi ípu;
tọrotoro oye alegheri ni ịphen nyina mẹghaaph bọ.
4Ghạlamo ạrighiri ạmi bịn rụmilogh ni ịmi nyịidipho;
bịdi rọmilogh ni, ghạlamo ịduon mị aseleman bọ ni;
kụ ọlo amem ịrol li dị Ẹnaan ẹnaghanan ịiḅereghi ạmi.
5Nyina ị́moogh ịiḅaghami, kụ nyina rịmilogh ghan ịmi;
nyina rẹgur ghan ẹḅam oye dị rạwa ni omeel.
6Kụ ọlo ạruḅa rꞌawe dị Ẹnaan úlegheri odi ni rꞌẹepho
ghạlamo ịduon ẹmugh phọ ạbidi kụ ịnyaam mọ ạbidi bịn.
7Ghạlamo ịnun rꞌịnam bịn ẹmoogh ni iboom ạraraar ọtughemi anyina;
8Ipuru rạraar phọ ịpe ọlhem bọ sịen ade phọ rꞌọphiiny phọ mọ ịngo inyina olegheri-ịyaar phọ ạbidi.
9Oomo phọ ạbidi olegheri ni mọ ạḍighaagh Ọmoogh-we phọ kụ ịlhem bụno.
10Ẹnaan kụ retelhiom sighuḍum ạraraar phọ dị ạlhem bọ;
aghuḍum ạtorotoro oye odi esi ịto phọ ọdi.
11Kụ ọlo ịdipho eḍien rẹdugh ghan bọ sịphe anem mọ ạna,
ịduon kụ ịdi ọghaaph rạdugh ghan esi areḅeri phọ ạna.
12-13Ikumoor awe ọmoogh ni olegheri ịyaar,
kụ ọlo Ẹnaan ẹmoogh ni olegheri-ịyaar rꞌịikpo.
Ikumoor awe kotue ni opogh ịyaar bịn olegheri;
Ẹnaan ketue kẹn ni epogh ịyaar bịn elegheri ḅịle kẹn ọdi ạmoogh ni ịikpo oḍighi ịlo ọdi ạwa.
14Mem dị Ẹnaan kụ elereghi, ạnhian kụ katue ạḅile ạlogh ạmeremi;
ḅịle ạnhian kụ katue ạtagharan oye dị Ẹnaan ẹlhogh ikoli?
15Ade phọ rẹ́moogh ghan mun mụum mem lọ Ẹnaan eghughiom ọlophia;
ạmuum-aḍigho ratu ghan mem lọ ọdi ạkputon mụum mọ.
16Ẹnaan ẹmoogh ni ịikpo kụ rạmoogh ghan ọkpar opu oomo amem;
ọpo ookeleghi bọ rꞌọpo raakeleghi ghan bọ odi ni esi ịto phọ ọdi.
17Ọdi rạbonyi ghan olegheri-ịyaar ạbuo ịtooghi phọ
kụ aḍighi ịdi abuḍiemiom mọ koḍighi ghan ịlo arolologhi.
18Ọdi rasoore ghan ni bụdaam ẹmha kaḍighi bịdi weye ikoli;
19ọdi rasooromi ghan ni riil ạrikia ḅịle rꞌawe ịtooghi.
20Ọdi rakpomori ghan ni rụnhu awe dị awe oḍuom ologhi,
ạḅile kẹn ni rạbonyi ghan olegheri-ịyaar ikumoor awe phọ.
21Ọdi rasiphe ghan ni umugholoor weye dị odi esi ịtooghi
kạḅile akunughi ịikpo ạbuo ịtooghi phọ.
22Ọdi rạngo ghan ni ḍịḅaal riisi dị ewil ịdipho aḍuugh.
23Ọdi raḍighi ghan ni ịdi areelhe kẹmoogh ịikpo ẹḅile ẹbugh,
kụ ọdi katue kẹn ni aagulemi bịdi.
24Ọdi raḍighi ghan ni ịdi abuḍiemiom mọ ạbidi koḍighi rolologhi
kạwile bịdi oyeela ophe;
25bịdi rooba ghan esi ufiri ḅịle kẹn ọbelebele ịdipho ạbupughol miim.
Currently Selected:
Job 12: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
