Job 11
11
Zofar
1-2Oye kạ́pagharanaan ọghaaph elologhi phọ ọphon?
Oboom ọghaaph katue ni aseere oye elhiom ḍụghum?
3Job, nạ ragbiom ghan mọ yoor kótue ọphagharanaan nyịna ḍụghum?
Mọ ikpo ọnhu ạrigilaam mọ ạna kekpomori ni rụnhu ayoor ḍụghum?
4Nạ rạsighenom ghan mọ ịphen nạ ạḅem bọ agey ni;
nạ ạsighenom mọ nạ aseleman ni risigh Ẹnaan phọ.
5Mịnighe ịikia dị Ẹnaan kẹphagharanaan nyịna!
6Ọdi mụḅeni ni nyịna mọ olegheri-ịyaar phọ ạmoogh ni ịbadi ịla;
ạraraar edi ni dị epel oye olegheri.
Ịphen Ẹnaan rẹliom bọ nyịna esughanam ni ịdi ẹkpe bọ ọliom ạna.
7Nạ katue ni ạwa amitiom
oomo ạḍibugh phọ rꞌịikpo phọ Ẹnaan?
8Okuaḍio phọ kéekuna Ẹnaan,
kụ ọlo etenom ni esi dị nạ kạteenya.
Ẹnaan elegheri ni ọmar iḍim
kụ ọlo nạ ólhegheri.
9Igbogh phọ Ẹnaan epel de phọ,
ẹtegh epu otu-ḅualhe phọ.
10Eḍighi ịyaar dị Ẹnaan esiph nyịna ẹmeremi esi ịiruen,
ạnhian kụ katue akikima nyọdi?
11Ẹnaan elegheri ni weye dị ụ́moogh mạar oḍighinom;
ọdi rạmiin ghan ni oomo ịkaraph iiḍighi phọ ạbidi.
12Arolologhi komiigh ọsu ologhi
mem lọ ọmar ilhom ịnam adool dị ẹsu iloghi.
13Job, leelemi ologhi phọ ạna. Ḍuraan ạghi esi Ẹnaan.
14Toḅologhi ịkaraph ḅịle rꞌekeeny eḍighinom ịyaar sịphe otu phọ ạna.
15Kụ ạḅile asoman aḅirini phọ rꞌạkpo ologhi.
16Pụruku oomo ịiḅaghami phọ ạna kẹḍua ologhi ạna,
ịdipho ạmuum-aḍigho dị maten bịn oye ọ́otughian mun.
17Aghuḍum mọ ạna kạmu ni apu ogogo amem ootaany;
ḅịle kẹn amem ogbogh ufiri aghuḍum mọ ạna kẹmu ịdipho ạḍiroor.
18Nạ kạtol ịma ạdol dị oḍuom ologhi amuza;
Ẹnaan keeko ni nyịna ẹḅile ẹngo nyịna ophooghian.
19Nạ kákiilaan bụmulogh-ḍien phọ ạna;
ịbadi awe kọlom ghan nyịna ọloghonaan ạḍighaagh.
20Kụ ọlo ạbukaraph awe phọ kopogh ghan ni ọkiom, ọtuom dị úlegheri mun ịlo oḍighi,
kụ ọwa ọmiin mọ ịlo okpetenaan ílho.
Emuton ḍuugh, ọnon oḍuom ologhi ạbidi ólho.
Currently Selected:
Job 11: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
