Hosia 11

Ẹphomoghian Ẹnaan esi aweye ọḅaar ẹmhu phọ ọdi

1 # Ẹḍua 4.22; Mat 2.15 Ọmoogh-we phọ rạḅem ghan mọ,

“Mem dị Ịzirel aḍighi ọbumoony, mị ụphomoghian nyọdi

kụ ạmagh nyọdi ạsighe sịphe eelhe phọ Ijipt ịdipho ọony ạmi.

2Kụ mị ạkuami rạmagh,

ọdi akiil ghan ghụn rụkelan bịn ịmi.

Awe phọ ạmi ọpinyon rịkia rọngo ghan Baal;

bịdi rọsuughinaan ghan ịnsens ịkaaghineen ạrumugh.

3Ghạlamo ịduon phọ ni mị kụ ọpo ạtughemi bọ Ịzirel ịlo orelhe.

Mị uḅeton weye phọ ạmi rạghaagh ạmi,

kụ bịdi úloghoma mọ mị ụpham ni bịdi.

4Mị aḍur bịdi ạloghomaam loor ạmi rꞌạḍiḅeeraan rꞌẹphomoghian.

Mị ạkpaph bịdi aphoophe kụ ạpham bịdi ạkpaariom rukpo ạmi;

mị azuman ạteeny bịdi kụ ạngo bịdi eḍien.

5“Bịdi úmeera úḅula esi ạmi. Kụ iḍighi kụ bịdi koḅula ni ẹpe Ijipt, kụ Asiria kụ kọda bịdi. 6Ẹgham keḅoorogh ni rạmha ạbidi kụ ebunughi rughuugh ạrunhu-aḍibuo phọ. Kepiemi we phọ ạmi loor esi dị bịdi roḍighi ghan ịlo bịdi ọḅem mọ ịpe kụ igey. 7Bịdi ọlogh ẹmhu ọḍua esi ạmi kụ úmeera uḅula. Bịdi komoghi omitiom loor ạdol ạrebene phọ bịdi kọtol bọ, kụ rꞌoye kạ́tagharan bịdi.

8 # Dut 29.23 “Ika kụ ẹdi mị kịḅitonaan inyina, we Ịzirel?

Ika kụ ẹdi mị kighel inyina?

Mị kạkar ri iphiemi inyina ịdipho mị aphiemi bọ Adma ḍụghum,

ḅịle, ịmiine inyina ịdipho mị ạmiine bọ Zeboyim?

Ologhi ạmi kámeera mị aḍighi!

Ẹphomoghian ạmi esi anyina ẹemor ẹpughan.

9Mị kị́lhiom inyina rꞌophin ologhi ạmi;

mị kápiemi mun Ịzirel.

Ịdi eḍighi bọ mị Ẹnaan kóye.

Mị, Oye Aghuḍuul phọ, mị odianaan rꞌanyina.

Mị kátumom esi anyina rꞌophin ologhi.

10“Awe ạmi kụdaph ni ịmi mem dị mị ạmaphaan mụdi ạnam-dịka risigh ạbumulogh-ḍien ạbidi. Bịdi koogborion kụ ọḍua ẹpe erumuḍio phọ remeel ghan bọ otu esi ạmi. 11Bịdi kọḍua ẹpe Ijipt kụ otu fiam mụdi ịnun, kụ ọḍua Asiria otu, mụdi arukuru-ghọzo. Mị kạḅile ni aḅulemi bịdi ruutu ạbidi. Mị Ọmoogh-we phọ mạḅem.”

Moghel weye Ịzirel rꞌaJuda

12Ọmoogh-we phọ ạḅem mọ, “Awe phọ Ịzirel mukoom ịmi rꞌọkpe rꞌiikeleghian, kụ awe phọ aJuda odi nịiniin ọḅaar ẹmhu esi ạmi, Ẹnaan aruukuan phọ, Ọpo rábi ghan bọ.

Currently Selected:

Hosia 11: ẠḌI

Highlight

Copy

Want to have your highlights saved across all your devices? Sign up or sign in

Abuan Language Development and Literacy Society

Ayama-Abua, Rivers State, Nigeria

Published by

NBTT

Nigeria Bible Translation Trust

No. 7 Old Airport Road

P.O. Box 790, Jos Plateau State, Nigeria

ISBN: 978-978-966-354-5

In cooperation with

MIDI BIBLE

Ch. de Praz-Roussy 4b, 1032 Romanel-sur-Lausanne, Switzerland

The New Testament in Abuan was originally published

in 1978 by The Bible Society of Nigeria with © UBS

Learn More About Ạḍinya Iigbia