Bụo aGaletia 4
4
1Mị ạkaaph rạloghom mọ ọnyigo ọony dị kọ̋manam rọpam ghan mụdi ẹbene, kụ ạri ọdi kụ ạmoogh ni erua phọ. 2Bụo ologhi otu phọ kụ rookonom ghan nyọdi, tụtu ạsia phọ ọde phọ agu bọ mọ ọdi kạmanam ọpham ạraraar phọ emunughan. 3Yira ụrol aani ghan dọl phọ ạḍien. Ẹghoroghor phọ ayira, yira uḍighi rẹbene ịtughemi ẹghoroghor, 4kụ emunughan bọ mem mọ, Ẹnaan irom ni Mọony phọ ọdi, ọpo ạnir-ephoph kụ ạmar bọ, kụ Ologh phọ akpophonom aani ni nyọdi. 5#Rom 8.15-17Ẹnaan irom nyọdi ọtagharan ạbuphe Ologh phọ akpophonom bọ, pịdi yira oḍighi nmụny ọdi.
6Lọ nyina kelegheri mọ nyina ạnmuny phọ Ẹnaan ni, kụ ọdi arom bọ Uwaloor Ọony phọ ọdi, mọ aḍigh iloghi ayira ạlho ghan amitiom mọ, “Ạba, Ọde,” 7nyina kạ́rebene mun; Ẹnaan meḍighi tọrobo ọnyo anyina mọony ọdi, dị kale aani erua ạraraar phọ ọdi aseenaan bọ nmụny phọ ọdi.
ẠPol aseere ni ologhi bụo ạsiosi phọ aGaletia
8Mem dị meten nyina Ẹnaan ílegheri ghan. Nyina iḍighi rẹbene aruru, dị nyina egbiom ghan ologhi mọ ạrumugh. 9Kụ nyịidipho nyina melhegheri bọ Ẹnaan — mị ụḅem mọ Ẹnaan milhegheri bọ inyina — uḍighi ika kụ nyina ẹḅile bọ ekiton resoman ịwelewele ịtughemi ẹghoroghor dị sụo ị́moogh? Uḍighi ika kụ ẹḅile bọ ịḅeeraan inyina oḍighi ạrebene ọngo ịtughemi phọ ịpe? 10Nyina rẹmaghami ghan ịyaar iniin asiḍughul-otu rꞌạrunwanyu, rꞌamem rꞌạsia. 11Ẹkigh mụdi arukumuan phọ ạmi ogbo phọ anyina repe ni oopho bịn.
12Bụo asiya, mị rạlom ni mọ ịnyagharanaan dọl ạrebene phọ anyina eseere. Ọmaar ogbi, mị maseere bọ ọdaph iilogh phọ aMozis, mị mịghigh inyina phọ Iilogh phọ kꞌekulha íkpophonom bọ. Nyina ịmi kị̋pioman ghan. 13Nyina elegheri ni mọ emoon phọ ạmi kụ iḍighi bọ ịdi mị ạtu bọ kụ ạghaaph ooḅi ọghaaph phọ ịḅeni inyina ẹḅel amem mọ. 14Kụ nyina ịmi ị́ḅitonaan, ḅịle kẹn nyina ịmi íghel, ghạlamo rꞌịdipho ịirurughian phọ ạmi ịngo bọ ni inyina oboom ọdegh ophogh. Nyina ịloghoma ghụn ni ịmi ịdipho nyina mịlhoghoma bọ ọokpaany Ẹnaan. Nyina ịloghoma ghụn ni ịmi ịdipho nyina mịlhoghoma bọ Jịzos Kraist. 15Iloghi phọ anyina ịkar ri ẹḅaal. Eeghe kụ imite? Ịphen kụ ịdi mị kighol li inyina ạkaaph: mọ idugh ni ọbo nyina mẹponyonaan ni riḍien anyina ịngo ịmi. 16Kụ mịna mạtuan ọghaaph igey phọ ịloghom inyina ḍien ḍụghum?
17Ẹḅeeraan ịikia bụeri phọ awe phọ mọ iḍighan bụno, kụ ạri inyina igey rị́itughianam. Bịdi rọwa ghan mọ yira ọgbaranaan, pịdi bịdi ọmaar ịḅeeraan inyina. 18Mị rákunu mọ nyina ẹḅeeraan bịdi. Ịitughian phọ ạbidi kụ ẹnighe ni, pọ ịphen phọ bịn íbeeph, kámem lọ yira odianaan bịn. 19Buuḅi ạnmuny ạmi, mị mạḅile kẹn ịtuan inyina rạmiinom ịdipho ạnir dị oghun-aḍien rakun, tụtu nyina ẹmoogh rọozo phọ aKraist. 20Ḅẹm nụun mọ yira kụ odianaan nyịidipho dị mị kadughe ẹḍogh kụ ạkaaphom, sịen dị mị úloghoma mun loor ịlo ọrolom anyina.
Ọsighe Hegar rꞌaSera kụ ọmaam
21Ịbile mị upuru ḍipuru phọ ạḍien bụphe ẹḅeeraan bọ ọtomaam Ologh phọ aMozis: nyina rẹ́naghan ghan ịdipho Ologh phọ ạḅem bọ ḍụghum? 22#Emi 16.15; Emi 21.2Ologh phọ rạḅem ghan mọ Ebraham ạmoogh bọ ịyal ạnmuny; nyoniin ẹbene-ạnir kụ ạmar, nyọori phọ ạnir otu phọ kụ ạmar. 23Kụ ọony ẹbene-ạnir phọ ụmar ri oopho ẹmaram, kụ ọony ạnir otu phọ ụtuan oguan dị Ẹnaan eguanaan kụ ọmar bọ. 24Ọghaaph phọ ọphon raḍeenaan ghan mọ ịyal phọ ạnmariir phọ, pọ ịyal ịyo dị oghiran. Ọḅel ạnir phọ rạmaraghi bọ rẹbene-ạnmuny phọ, kụ ịyo phọ oghiran bọ ẹpe Eegum aSainai. AHegar kụ ạnir phọ ọphon phọ. 25ASainai ẹeḅaraph phọ ẹpe edi bọ Arebia, kụ aJeruselem mọ arodon, eḍighi bọ ạnir phọ rꞌạnmuny phọ ọdi odi dọl ạrebene. 26Kụ aJeruselem kꞌạke phọ kụ ạnir otu phọ. Ọdi kụ onhiin phọ ayira, 27#Azay 54.1ịdi eḍighi bọ ạḍinya iigbia phọ rẹḅem ghan mọ,
“Nạ ẹmar ạnir dị kꞌekulha mọony ụ́mar, boh iboh!
Nạ phọ kꞌekulha oghun-aḍien kőghun ghan bọ, lọoghi ịlooghi iboh,
ịdi eḍighi bọ epin ạnir kụ kạmar apu oophineen phọ.”
28Bụo asiya, yira ọkigh nmụny dị ọmar ịdipho Ạizik omuneniom oguan phọ Ẹnaan eguanaan bọ. 29#Emi 21.9Kụ mem mọ ọpo phọ, ọony phọ ọmar bọ oopho ẹmaram mọ ạgbiphoghom ghan ni nyọpo ọmaram bọ ịtooghi Uwaloor Iigbia phọ; kụ ịphen phọ kụ edi bọ ni kꞌạnyiidipho. 30#Emi 21.10Kụ ạḍinya iigbia phọ rẹḅem ghan ika nụun? Rẹḅem ghan mọ, “Porogh ẹbene-ạnir phọ rꞌọony phọ ọdi amitiom, loor esi dị eḍighi ni iigbia dị ọony ẹbene-ạnir phọ rꞌọony ạnir otu phọ kọḅophan ole erua ọde phọ ạbidi.” 31Bụo asiya, ilegheri mọ yira kạ́nmuny ẹbene-ạnir phọ, yira ạnmuny ạnir otu phọ.
Currently Selected:
Bụo aGaletia 4: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
