Bụo aGaletia 2
2
ẠPol rꞌạbueri phọ abutelhedom mọ
1 #
Iiḍ 11.30; 15.2 Rẹman ḍioph rꞌinya ạsia kụ mị rꞌạBanabas ọḅile ọghi Jeruselem. Mị ụpham ni Tạitos ạghimom. 2Ẹnaan kụ igananami ni ịḅeni ịmi kụ mị ạghi bọ. Kụ mị ụmoogh ni ezue rꞌạbuo ạrumhu ạsiosi phọ, ạḅeniom bịdi ịlo ooḅi ọghaaph phọ mị ạghaaph ghan bọ ạḅeni ruuruen phọ, ọbo mị alegheri mọ oḍighi phọ mị maḍighi bọ kụ raḍighi bọ ni rápe oopho. 3ẠTaitos phọ rꞌạmi odianaan bọ ghạlamo ịdipho aḍighi bọ ni ọnyo aGris bịn ụ́kpaariom mọ aḍuna. 4Buniin awe ghụn ni dị oḍighi ḅụun oḍigh aani ookpomoghan phọ, okue oghola mọ bụno ạbuo asiya aani ni, ịlo ophoghogha ạdol okpetenaan phọ yoor phọ mọḅophoghan bọ Jịzos Kraist odi bọ, kụ ụwa ghan ghụn oḍun ọdi. Bụen phọ ụwa ghan oḅulemi ayoor dọl ạrebene. 5Yoor údughanaan bịdi rꞌamem, ọbo igey phọ ịpe ooḅi ọghaaph phọ ạḅem bọ ẹmaar ịrolonaan inyina.
6 #
Dut 10.17
Kụ bụen bụo ịḍagha phọ rokol ghan bọ mọ ạbuo ạrumhu phọ rꞌeniin ekpo ọnhu ụ́loghom ụngo ịmi — mị ụḅem ịduon phọ, ịdi eḍighi bọ esi ạmi ịyaar ị́man ọdo awe lọ bịdi oru, loor esi dị Ẹnaan répogh ghan oḍighi lọ oye ạpham. 7Kụ okiton bọ ophogh bịdi ụmiin ghụn ni mọ Ẹnaan mẹḅogh ọghaaph ghan ooḅi ọghaaph phọ ọḅeni aruuruen phọ ẹlogh ḍịghaagh ạmi, ịdipho ọdi ạḅogh bọ ọghaaph ghan ooḅi ọghaaph phọ ọḅeni ạbuo aJu phọ ạlogh ḍịghaagh aPita. 8Ọpo ạsighe bọ ịikpo phọ ọdi aromom Pita mọ aḍighi otelhedom ạbuo aJu phọ kụ uḍighi aani bọ ịmi otelhedom aruuruen phọ. 9Kụ aJems rꞌaPita rꞌạJon, bụphe bụo ịḍagha phọ rokol ghan bọ mọ ạroko ogbo phọ, ọmiin bọ mọ Ẹnaan mịngo ịmi ọghor phọ ọphon, ụsighe ni Bạnabas rꞌạmi oḍighi siya ạbidi esi oḍighi phọ. Kụ oomo phọ ayoor omeeraam gbiririph mọ yoor ọrol ogbo aruuruen phọ kụ oḍighi oḍighi phọ, mọ bịdi ọrolan bụo aJu phọ. 10Eniin ịyaar phọ ẹpe mị raḍula bọ ni loor oḍighi phọ bịn kụ ẹdi bịdi ụḅeni iyoor, mọ yoor ọloghonaan ghan ḍịghaagh bụphe ekuom bọ ogbo phọ ạbidi.
ẠPol ạḍagha ni Pita ẹpe Ạntiok
11Mem dị aPita aru bọ asi Ạntiok, mị ụḍagha ni nyọdi ghisigh ọdi ịdi eḍighi bọ ọdi ạpioman ni egaan. 12Tụtu abuniin awe dị aJems ạlogh kotu bọ osi ẹpe, aPita alhian ghan ni eḍien rꞌaruuruen phọ momeeraam bọ Kraist. Kụ awe phọ ạbuen rosi, bịn ọdi amiigh ạgbatanaan bịdi aḅulolom ọman, loor oghiilaan ạbuphe ọkpaariom bọ mọ oḍunogh ghan ruuruen phọ. 13Ạbueri ạbuo aJu phọ momeeraam bọ ni Kraist umiigh aani ni oḍighi yogh ịdi bịdi olegheri ni mọ ị́kpianaan, dị rꞌạBanabas bịn aḍighom aani ni. 14Kụ mị ạmiin bọ mọ eḍighinom ịyaar phọ ạbidi íseleman rꞌigey phọ ịpe ooḅi ọghaaph phọ, mị ụḅeni ni Pita sịphe aghisigh phọ ạbidi mọ, “Nạ ọnyo aJu ni kụ atughan bọ ni rꞌaruuruen phọ, kạ́ḍiphe ạbuo aJu phọ. Ika kụ ẹdi nạ kạkpaariom bọ ruuruen phọ mọ ọrol dọl ạbuo aJu phọ?”
Omeeraam kụ rạpel ghan bọ bụo aJu phọ rꞌaruuruen phọ
15Ọkar igey ni, yoor ạbuo aJu phọ ụ́kigh ruuruen phọ rọ́daph ghan bọ iilogh phọ aMozis. 16#Ạsuo 143.2; Rom 3.20; Rom 3.22Kụ yoor olegheri ni mọ rọtuan ghan omeeraam ạJizos Kraist kụ Ẹnaan kẹsighenom mọ ọphon oye aruukuan ni, rọ́tuan ghan ooko Ologh phọ aMozis. Yoor phọ kẹn momeeraam aani Jịzos Kraist, pịdi ọtuan omeeraam mọ yoor ọmoogh bọ esi aKraist, kóoko ghan Ologh phọ aMozis, kụ Ẹnaan ẹsighenom aani mọ yoor awe aruukuan ni. Yoor olegheri ni mọ rọ́tuan ghan ooko ghan Ologh phọ aMozis kụ Ẹnaan kẹsighenom mọ ọphon oye aruukuan. 17Ịduon yoor mọḅophoghan bọ Kraist kụ rọwa ghan bọ ịlo Ẹnaan kẹsighenom aani mọ yoor awe aruukuan ni, pọ ọmiin ni mọ yoor abuḍighinom ịkaraph ni ịdipho aruuruen phọ. Ịphen phọ emeeraam mọ aKraist kụ oobia ịkaraph ḍụghum? Eeye Kị́dipho. 18Kụ mị ạḅile amiigh oḅerion ịpe mị alhereghi bọ, pọ ẹḅile reḍeenaan ghan mọ mị masoor ologh. 19Ologh phọ ịmi ụ́moogh mun. Esi Ologh phọ mị mamugh. Iilogh phọ mighiigh ịmi eseere kụ mị ạwile bọ, pịdi mị ạrolonaan Ẹnaan. Mughiigh aani ni ịmi rꞌaKraist sịphe oreeny phọ. 20Mị odi ni rapooghu, kụ kạ́mi. AKraist kụ odi ghan loor phọ ạmi. Aghuḍum mọ mị odi bọ nyịidipho, mị odimom omeeraam mọ mị ạmoogh bọ esi Ọony phọ Ẹnaan, ọpo ụphomoghian bọ ịmi kụ ughol bọ ịmi kụ amugh bọ. 21Mị ạmaghami ni ḍuugh phọ aKraist ịyaar. Eru mạar dị Ẹnaan ẹtuan ooko Ologh phọ aMozis ẹsighenom aani mọ yira awe aruukuan ni, pọ ị́kpianaan dị aKraist mumugh.
Currently Selected:
Bụo aGaletia 2: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
