Ẹḍua 6
6
1Kụ Ọmoogh-we phọ ạḅeni Mozis mọ, “Mẹteeny, nyịidipho nạ kạmiin ịdi mị kaḍighi ọdaam eelhe phọ. Mị kạkpaariom nyọdi mọ ameera awe phọ ạmi ogheel, ọdi kụ kaporogh bịdi amitiom sịphe ade phọ.”
Ẹnaan ẹmagh Mozis
2 #
Emi 17.1; 28.3; 35.11; Ẹḍua 3.13-15 Ẹnaan ẹḅeni Mozis ịduon mọ, “Mị kụ Ọmoogh-we phọ. 3Mị umite ni egaan ghisigh Ebraham rꞌẠizik rꞌạJekob ịdipho Ẹnaan Oomo Ịikpo, kụ mị úḍighi ịlo bịdi kolegheri ḍien phọ ạmi Ọmoogh-we phọ. 4Kụ mị ạḅile agananami ịyo phọ bịdi rꞌạmi oghiran bọ, mọ mị kạngo bịdi de phọ aKenan, de phọ ạḍiphe bịdi ọrol bọ iiruen phọ. 5Kụ mị mạnaghan ni ịkuph awe phọ Ịzirel, bụphe ạbuo Ijipt phọ oseere bọ dọl ạrebene, kụ mị mạatughian ịyo phọ ạmi. 6Loor ịduon phọ ḅẹni we phọ Ịzirel mọ, ‘Mị kụ Ọmoogh-we phọ. Mị kịsighe ni inyina esi ịminimiin phọ Ijipt rịmiine bọ inyina. Mị kịsighe ni inyina esi ạdol ạrebene phọ. Mị kapoophe ni ḍịghaagh iphelegbe ạmi ịtagharan inyina rꞌịgbagara ịiruen. 7Mị kịsighe ni inyina awe phọ ạmi aloghoma kụ mị aḍighi Ẹnaan anyina, kụ nyina egbi olegheri mọ mị kụ Ẹnaan Ọmoogh-we phọ anyina, ọpo ịtagharan bọ inyina ạsighe esi ạdol ạrebene phọ ẹpe Ijipt. 8Kụ mị ịsighe inyina asiemi ẹpe ade phọ ḍịphe mị aghunya bọ ọngo Ebraham rꞌẠizik rꞌạJekob. Mị kịngo inyina ịdipho erua. Mị kụ Ọmoogh-we phọ.’” 9AMozis ạghaaph ịphen phọ ạḅeni we Ịzirel, kụ bịdi ụ́naghanan Mozis ịdi eḍighi bọ uwaloor ạbidi makururu loor esi ạdol ạrebene phọ.
10Kụ Ọmoogh-we phọ ạḅeni Mozis mọ, 11“Kịa ạḅeni ọdaam eelhe phọ Ijipt mọ, ‘Meera awe phọ Ịzirel ọḍua sịphe ade phọ ạna ogheel.’”
12Kụ aMozis ạḅeni Ọmoogh-we phọ mọ, “Awe phọ Ịzirel ịmi rụ́naghanan ghan, ọdaam eelhe phọ kaḍighi ika kụ ụnaghanan bọ ịmi, mịna aru bọ oye eema phọ?”
13Ọmoogh-we phọ ạto ạḅeni Mozis rꞌEeron mọ, “Ịḅeni we Ịzirel rꞌọdaam eelhe phọ Ijipt mọ mị kụ irom bọ inyina mọ iḍiemiom we Ịzirel emitenom sịphe ade phọ Ijipt.”
Ẹemara etum ẹemara phọ aMozis rꞌEeron
14Bụen kụ ạbuo ạrumhu sịphe arughunughun ạburude phọ ạbidi. Ạnmuny aRuben ọkpana ọony phọ Ịzirel ạbuen: Hanok, aPalu, ạHezron rꞌaKami. Bụen iipolo aRuben. 15Ạnmuny ạSimion ạbuen: ạJemuel, aJamin, Ohad, aJakin, aZohar rꞌaSaul, ọony ạnir ọlo aKenan. Bụen iipolo ạSimion. 16#Igb 3.17-20; 26.57, 58; 1 Krọ 6.16-19Ịphen asiḍien ạnmuny aLivai, ọto atum ọto: Gerson, aKohat rꞌaMerari. ALivai ạman bọ 137 ạsia. 17Ạnmuny aGerson: aLibni rꞌaSimei, bụo ọto rꞌopolo, oghiil atum oghiil. 18Bụen kụ ạnmuny aKohat: Ạmram, Izhar, ạHebron rꞌỤziel. AKohat ạman bọ 133 ạsia. 19Bụen kụ ạnmuny aMerari: aMahli rꞌaMusi. Bụen iipolo aLivai, oghiil atum oghiil.
20Ạmram ạsighe Jọkebed ọony umarani ọde ọdi aphin kụ ạmaranaan nyọdi Mozis rꞌEeron. Ạmram ạman bọ 137 ạsia. 21Ạnmuny Izhar ạbuen: aKora, aNefeg rꞌaZikri. 22Ạnmuny Ụziel ạbuen: ạMisael, Ẹlzafan rꞌaSitri.
23Eeron aphin Eliseba ọnyani Ạminadab, umarani aNason, kụ ạmaranaan nyọdi Nạdab, Abihu, Ẹliazar rꞌItamar. 24Bụen kụ ạnmuny aKora: Asir, Elkana rꞌAbiasaf; bụen ạriikpigh ọto aKorahait. 25Ẹliazar ọony phọ Eeron aphin ọnyani ạPutiel, kụ ạmaranaan nyọdi Fịnehas. Bụen kụ ạbuo ạrumhu sịphe eghun aLivai bụo ọto rꞌopolo.
26Eeron rꞌaMozis kụ ạbudi Ọmoogh-we phọ ạtu bọ kụ arom mọ ọghi ọsighe rughunughun awe phọ Ịzirel ọḍuanam ẹpe ade phọ Ijipt. 27Bịdi kụ ạbudi ọtu bọ ọghi ọḅeni ọdaam eelhe phọ Ijipt mọ ạwile we phọ Ịzirel ọḍua Ijipt ogheel.
Ịtooghi dị Ọmoogh-we phọ ạngo Mozis rꞌEeron
28Ḍio phọ ạḍiphe Ọmoogh-we phọ ạghaaph bọ ạḅeni Mozis ẹpe Ijipt, ọdi ạḅem mọ, 29“Mị kụ Ọmoogh-we phọ. Kịa ạghaaph oomo ịpe mị ạḅeni bọ nyịna ạḅeni ọdaam eelhe phọ Ijipt.”
30Kụ aMozis ạḅeni mọ, “Mịna oye eema phọ. Ọdaam eelhe phọ kụ́naghanan ni ịmina.”
Currently Selected:
Ẹḍua 6: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
