Ẹḍua 5
5
AMozis rꞌEeron ọmeera ghisigh ọdaam eelhe phọ Ijipt
1Kụ ẹteeny mem dị aMozis rꞌEeron ọghi ọteeny ọdaam eelhe phọ Ijipt kụ ọḅeni nyọdi mọ, “Ọmoogh-we Ẹnaan phọ Ịzirel ẹḅem mọ, ‘Meera awe phọ ạmi ogheel, ọghi ẹpe ẹdala phọ ulianaan ịmi ẹyaal.’”
2Ọdaam eelhe phọ Ijipt ạphagharanaan mọ, “Ạnhian kụ Ọmoogh-we phọ dị mị kạnaghanan bọ ẹḍogh ọdi kụ ameera mọ awe Ịzirel ogheel? Mị úlegheri Ọmoogh-we phọ. Mị kámeera mọ bịdi ogheel.”
3Kụ bịdi ọḅem mọ, “Ẹnaan awe phọ aHibru megananami loor uḍeenaan iyoor. Seseeny, meera yoor orelhe ịraar aḍughul-otu ẹpe ẹdala phọ, oḍighi ịyaar aghuḍum ọngo Ọmoogh-we Ẹnaan phọ ayoor, ọbo ọdi kạsighe ghan bọ rẹezegh mꞌelhool ẹgham ụziom iyoor.”
4Ọdaam eelhe phọ Ijipt ạḅeni Mozis rꞌEeron mọ, “Ẹmhu eeghe kụ nyina eḍighi bọ ịdi awe phọ ọwile bọ iiḍighi phọ ạbidi? Iḍighi ịdi ạrebene phọ ạbuphe koḅula oḍighi. 5Awe phọ odi bọ nyịidipho sịen eelhe phọ aḍita ni, kụ nyina rẹwa ghan ịlo bịdi kopooghian esi ịminimiin phọ ạbidi. Ị́nighe.”
6Eniin phọ aḍio phọ ạḍiphe bịn ọdaam eelhe phọ Ijipt ạḅeni bụphe rọgbiphoghom bọ we phọ Ịzirel rꞌạbuo ạrumhu iiḍighi awe phọ mọ, 7“Isophe ọngo ghan awe phọ rạraar ọḅolom ghan asibiriki phọ. Emiigh arodon kụ ẹghiom risigh, bịdi kụ ọghi ghan ọwa rọkol ạroogho phọ rꞌaloor. 8Ịbughe ọnhu ikpo abiriki phọ epuemi ịḅel phọ ịpe bịdi ọḅol ghan bọ, késooromi rꞌẹnum rꞌẹnum. Bịdi awe ẹgbogholeer dị rọ́wa ghan oḍighi ịyaar. Ịduon kụ iḍighi kụ bịdi rọḅem bọ mọ, ‘Ụwile iyoor, yoor ọghi oḍighi ịyaar aghuḍum ọngo Ẹnaan ayoor.’ 9Ịngo ghan we phọ ọokpara oḍighi bịdi ọmiinom, ọbo bịdi ọwile oḍuom ologhi ọghaaph ọkpe.”
10Bụphe rọgbiphoghom bọ we phọ Ịzirel rꞌạbuphe ropogh ghan bọ iiḍighi phọ ạbidi ọghi ọḅeni bịdi mọ, “Ọdaam eelhe phọ Ijipt mụḅeni iyoor mọ yoor inyina kị́ngo ghan mun rọkol ạroogho. 11Nyina rꞌaloor kụ kẹki ghan kụ ẹwa ghan tọrobo ekpisi lọ nyina ketue ẹmiin, kụ ọlo nyina kẹḅol ghan ni ọnhu ikpo phọ nyina rẹḅol ghan bọ.” 12Kụ awe phọ ọghiighi oomo ade phọ Ijipt ọwaaghi ạroogho. 13Kụ bụphe ọpham bọ ẹkpigh iiḍighi ọkpaariom ghan mọ awe Ịzirel ọḅol li ọnhu ikpo phọ bịdi rọḅol ghan bọ ḍio ḍio ḍio ịdipho mem mọ ọngo ghan bọ bịdi rọogho. 14Kụ bụphe ọdaam mọ ạmaaghi bọ okuphogh bụo ạrumhu iiḍighi phọ ạbidi, opuru ghan mọ, “Eeghe kụ iḍighi kụ nyina rétue ghan mun bọ kẹ́ḅol ọnhu ikpo abiriki phọ ịdipho amem mọ meten bọ?”
15Bụo ạrumhu iiḍighi phọ awe Ịzirel ọghi kꞌọdaam mọ kụ romoghi yogh, “Uḍighi ika kụ nạ uḍighi bọ iyoor ịduon? 16Rọogho iyoor ụ́ngo, kụ rụḅeni ghan iyoor mọ ọḅologh abiriki. Okuphogh ghan rẹbene phọ ạna, kụ ạri ọpioman phọ ọlo awe phọ ạna.”
17Kụ ọdaam eelhe phọ ạphagharanaan mọ, “Nyina awe ẹgbogholeer, nyina rẹ́wa ghan oḍighi ịyaar. Ịphen kụ iḍighi kụ nyina ẹḅem bọ mọ, ‘Ụwile iyoor, yoor ọghi oḍighi ịyaar aghuḍum ọngo Ọmoogh-we phọ.’ 18Ikeel nyịidipho eḍighi oḍighi, rị́ngo mun inyina rọogho, kụ nyina kemuneni ni ọnhu ikpo abiriki phọ ịḅeni bọ inyina.” 19Bụo ạrumhu iiḍighi phọ awe Ịzirel uloghoma ni mọ bụno odi dọl ogona loor, loor ịpe ọḅeni bọ bịdi mọ, “Nyina kẹḅol ghan ni iniin ọnhu ikpo abiriki phọ ḍio ḍio ḍio ịdipho amem mọ meten bọ.”
20Kụ bịdi ọḍua kꞌọdaam eelhe phọ omite, kụ ozuan Mozis rꞌEeron dị odi eten rokori ghan bịdi. 21Kụ ọḅeni bịdi mọ, “Ọmoogh-we phọ mạmiin ịpe nyina eḍighi bọ kụ kisophonaan inyina ọoruen. Nyina meḍighi ịdi ọdaam eelhe phọ Ijipt rꞌabutelhedom mọ ọdi mụghagham iyoor ologhi, mokophogh rolhool ẹgham ọziom ayoor.”
AMozis ạkun ạḅeni Ọmoogh-we phọ
22AMozis ạḅile akiton aphogh Ọmoogh-we phọ kụ ạḅem mọ, “Sey, Ọmoogh-we, iḍighi ika kụ nạ raḍighi bọ ịkaraph we phọ ạna? Nạ ụtu ika kụ ụsighe bọ ịmi aru sịen? 23Egbi kꞌaḍio phọ mị ạsighe bọ dom mọ ạna ạghimom kꞌọdaam eelhe phọ, ọdi rạmiine ghan we phọ ạna, kụ nạ bịdi ọ́phel ọ́sighe.”
Currently Selected:
Ẹḍua 5: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
