Ẹḍua 38
38
Ọkan enmeny dị kọpophoghi ghan rịkia
(Ẹḍua 27.1-8)
1Ọdi ạsighe oreeny ạkasia kụ ạkanam enmeny. Inya phọ ạraghaagh iileeny ni, 2.2 akuḅu ḍịdoony, ḅịle 2.2 akuḅu ḍịregh, ḅịle kẹn oniin 1.3 akuḅu ḍiphoph. 2Ọdi ạlhogh ni sịogho ạnyu inya aruukuna phọ, ọbo ạsiogho phọ ẹḅophan rꞌenmeny phọ. Kụ ọdi aakpereghiom oomo phọ ọdi enaba. 3Ọdi ạlhem kẹn ni oomo ạraraar phọ koḍighinom ghan bọ sịphe enmeny phọ: sịgbagba ọmughiom, rụsua, iteka ạsigbagba, rụkpa ḅịle rꞌasuugh. Oomo phọ ạraraar phọ ụlhemom enaba. 4Ọdi ạsighe enaba kụ ạlhemom ẹkerekere dị ạkpo eeḍian enmeny phọ kụ eeghelaan ghan. 5Ọdi ạlhogh ni inya ịkoro inya phọ aruukuna phọ. 6Ọdi ạsighe oreeny ạkasia dị ogbul enaba 7kụ aḅughe sịphe ịkoro phọ edi bọ ịphalagbal enmeny phọ ọbo edugh ophoophe. Enmeny phọ ụkanam ikpooghi opokoromi ẹpe ologhi phọ.
Ọlem ạbafu enaba phọ
(Ẹḍua 30.18)
8 #
Ẹḍua 30.18
Ọdi ạsighe sitamaḍiki ạnmariir phọ ạbuphe rokumu ghan bọ sịphe Ogbogo Ạdol Ọmoogh-we phọ kụ ạlhemom bọ oogboghom ạbafu enaba phọ rꞌesi oseere phọ.
Oghoony Ogbogo Ạdol Ọmoogh-we phọ
(Ẹḍua 27.9-19)
9Ọdi ạsighe ịyegheyeghe arukpe kụ ạkpo aghoonyom Ogbogo Ạdol Ọmoogh-we phọ. Ạga phọ esoorom mọ, arukpe phọ iḍighi 44 akuḅu ḍịdoony, 10Oguph 20 aropogh kụ ogim 20 ạroko dị oḍighinom enaba, ịmoogh ni ịkomom rꞌịkasiom dị oḍighinom silva. 11Ephunom oghoony phọ iniin phọ kẹn ni. 12Ẹpe erumuḍio phọ remeel ghan bọ, ụkpo kẹn ni rukpe phọ 22 akuḅu ḍịdoony, ugim ḍioph ạroko rꞌịkomom rꞌigbonoghineen dị ogbul silva. 13Ạga phọ ẹpe erumuḍio phọ remite ghan bọ, ẹpe ọnhu-aḍibuo phọ ạrol bọ, oghoony phọ aḍighi kẹn ni 22 akuḅu ḍịregh. 14-15Tọrotoro ạga ọnhu-aḍibuo phọ ụkpo ghan ukpe dị ạman 6.6 akuḅu kụ ogim ịraar ạroko ọphamam. 16Oomo phọ arukpe phọ ọkpo bọ oghoonyom iḍighi ọyegheyeghe ukpe. 17Ude ạroko phọ iḍighi enaba kụ ịkomom mọ, igbonoghineen phọ, ḅịle rꞌịpe ookpereghiom bọ ạnyu ạroko phọ eḍighi silva. Oomo phọ ạroko phọ ekitonom bọ oghoony phọ ukpoghom ịidoony asilva. 18Ukpe phọ ọkpo bọ ọnhu-aḍibuo oghoony phọ ulho ịma ọyegheyeghe ukpe dị oloom abiloogh, oodor, ḅịle rꞌọtogh-tọgh ogbidagbida ukpe dị ọlogh ịnme. Ukpe phọ aḍighi esugha akuḅu ḍịdoony rꞌịyal akuḅu ạnyu, ịghigh rukpe oghoony phọ. 19Ugim inya ạroko dị ude phọ aḍighi enaba. Ịkomom mọ ạbidi, ịpe ookpereghiom bọ ạnyu phọ ạbidi ḅịle rꞌigbonoghineen phọ uḍighinom silva. 20Oomo ạsikan Ogbogo phọ ḅịle rꞌịlo oghoony phọ uḍighinom enaba.
Ạraraar phọ oḍighinom bọ Ogbogo Ạdol Ọmoogh-we phọ
21Ḍịen ạḍikool ạraraar phọ oḍighinom bọ Ogbogo Ạdol Ọmoogh-we phọ, sịphe oseere bọ ịyal ipoḍi asighiigh phọ ịpe ọge bọ ḍioph phọ iilogh phọ. AMozis kụ ạto mọ ọge, kụ ạbuo aLivai phọ bụphe ọrol ghan bọ ẹeḍian ịtooghi Itamar ọony phọ Eeron oyil ạrikia phọ ọge.
22ẠBezalel ọony Uri ḅịle ọnyanyani aHur, ọlo eghun aJuda, kụ aḍighi tọrotoro ịyaar phọ ẹpe Ọmoogh-we phọ ạto bọ. 23Ọnyo ọḅarama phọ ọdi, Oholiab ọony Ahisamak, ọlo eghun ạDan, ạmaar mạka, ọnighemi ịyaar, ḅịle rꞌolo ịyegheyeghe arukpe ḅịle rꞌabiloogh, oodor, ḅịle rꞌọtogh-tọgh ogbidagbida ukpe.
24Ẹemor oomo agol phọ ọḅogh bọ ọngo Ọmoogh-we phọ mọ oḍighinom Ogbogo Iigbia phọ ịman oniin ọonir igbogh ịtoom ọkaraghi ogey ọtoom ẹemor. 25#Ẹḍua 30.11-16Mem dị ọkar bọ ogbiighi ẹemor asilva aweye phọ osogh bọ ạman 3,430 igbogh ịtoom ọkaraghi ogey ọtoom ẹemor. 26#Mat 17.24Ịphen phọ ẹman ookpomoghi oomo phọ ịpe awe dị mọmanam kụ osogh bọ, tọrotoro oye asogh ghan ni ịpe ọḅem bọ kụ ọtoom ghan ọkaraghi ogey ọtoom ẹemor. Ọrol bọ 603,550 alephiri ạnmuny dị mọman ịyaldi ạsia kụ ẹghiom ạnyu, bụphe ogbi bọ mem mọ rogbi bọ weye phọ. 27Sịphe asilva phọ osogh bọ, ụsighe 3,400 igbogh ịtoom ẹemor kụ ọlhemom bọ oniin okuron ipoḍi ịpe ogborori ghan bọ ude Ogbogo Iigbia phọ ḅịle rꞌukpe phọ ọpo ọkpoom bọ, 34 igbogh ịtoom ẹemor oḍighinom ghan oniin opoḍi. 28Ọphori phọ ịraardi igbogh ịtoom ẹemor asilva phọ asugha bọ, ạBezalel ạsighe aḍighinom igbonoghineen phọ, rꞌịkomom ạroko phọ, ḅịle rꞌịlo ookpereghiom ạnyu ạroko phọ. 29Enaba dị ọḅogh ọngo Ọmoogh-we phọ ịman 2,425 igbogh ịtoom ẹemor. 30Ọdi ạsighe ịphen phọ kụ ạlhemom bọ ipoḍi ịpe ogborori bọ ude phọ sịphe ọnhu-aḍibuo Ogbogo Ạdol Ọmoogh-we phọ, enaba enmeny phọ, ḅịle rꞌẹkerekere phọ, oomo ạraraar phọ kẹtol ghan bọ enmeny phọ, 31ipoḍi phọ ịpe ekitonom bọ oghoony phọ, ḅịle rꞌọnhu aḍibuo oghoony phọ, ḅịle rꞌoomo ạsikan Ogbogo phọ rꞌoghoony phọ akitonom bọ.
Currently Selected:
Ẹḍua 38: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
