Ẹḍua 37
37
Ọka Igbe Ịyo phọ
(Ẹḍua 25.10-22)
1ẠBezalel ạsighe oreeny ạkasia kụ ạkaam bọ Igbe Ịyo phọ; 110 ẹkulom ạḍighaagh ḍịdoony, 66 ẹkulom ạḍighaagh ḍịregh, 66 ẹkulom ạḍighaagh ḍiphoph. 2Ọdi agbul ogey agol ologhi phọ rꞌạnyu phọ, kụ ạsighe gol ạloghom ḍịmaam akitonom ruukuna phọ. 3Kụ ọdi ạsighe inya ịkomom dị oḍighinom gol atulom inya phọ aruwol phọ, ịyal ịne ẹrol ghan ḍịghaagh. 4Ọdi ạsighe oreeny ạkasia dị ogbul gol kụ ạloghom ịkoro 5kụ aḅughe sịphe ịkoro phọ ọman atum ọman Igbe phọ. 6Ọdi ạsighe ogey agol ạkaam ekpereghi, 110 ẹkulom ạḍighaagh ḍịdoony, 66 ẹkulom ạḍighaagh ḍịregh. 7Ọdi ạsighe gol ạgurogh ạpeḅeremi ạkaam ịyal ạruukpaany aghuḍuul dị ẹmoogh raphaaph, 8oniin ạrol eniin eekuna ekpereghi phọ. Kụ ọdi ạka bịdi ạḅaraghiom ekpereghi phọ. 9Ạruukpaany aghuḍuul phọ ẹmoogh bọ raphaaph phọ iisomanan ni, ḅịle araphaaph phọ ạbidi ẹetaranu eghoph Igbe phọ.
Ọka ịdaabili ạbred lọ ọngo Ẹnaan
(Ẹḍua 25.23-30)
10Ọdi ạsighe oreeny ạkasia kụ ạkaam bọ ịdaabili phọ; 88 ẹkulom ạḍighaagh ḍịdoony, 66 ẹkulom ạḍighaagh ḍịregh, 44 ẹkulom ạḍighaagh ḍiphoph. 11Ọdi agbul oomo phọ ịdi ogey agol, ạḅile ạsighe gol ạghoorom ọokpo ẹpe eekuna phọ akitonom. 12Kụ ọdi ạsighe gol ạḅagham ruukuna phọ akitonom, 7.5 ẹkulom ạḍighaagh ḍịregh. 13Kụ ọdi ạsighe gol ạkaam inya ịkoro kụ ạlogh inya phọ aruukuna phọ ẹpe aruwol phọ. 14Ariigida phọ ịpe ẹpham bọ ịkpapham mọ kopoophiom ghan bọ ịdaabili phọ ịrol etuman ẹpe ọḅagh bọ. 15Ọdi ạsighe oreeny ạkasia kụ ạkaam bọ ịkpapham mọ kụ agbul gol. 16Ọdi ạsighe gol kụ ạlemom rụkpa lọ kọḅamaghi ịdaabili phọ: sịgbagba, sịkop, izoki ḅịle rꞌiigboghom ạsigbagba lọ koḍighinom ghan mem ạrikia-amiim.
Ọka ọmeremiom ọtozi phọ
(Ẹḍua 25.31-40)
17Ọdi ạsighe ogey agol kụ ạkaam bọ ọmeremiom ọtozi phọ. Ẹpe ade phọ ḅịle rꞌẹpe ẹmeera bọ iḍighinom gol dị ọgurogh ọpeḅeremi; ịnme phọ ọdi ịḅaram ịmiigh rꞌipoola iḍighi ni pạkiri ọdi.
18Odiiny ịla ịrol sịagaany phọ, ịraar ịne ẹrol ghan pạkiri. 19Tọrotoro ọla esi odiiny phọ ạmoogh ni ịraar ịnme dị ẹghigh ipoola ọmir-ighool rꞌịmiigh. 20Ẹpe ẹmeera bọ sịphe ọmeremiom ọtozi phọ ịmoogh inya ịnme dị ẹghigh ipoola ọmir-ighool rꞌịmiigh. 21Oniin ọmiigh ạrol ghan eeḍian ạtorotoro ịraar ịla. 22Ịmiigh phọ, ịla phọ ḅịle rꞌọmeremiom ọtozi phọ iḍighi ni eniin ịyaar dị ọlemom gol dị ọgurogh ọpeḅeremi. 23Ọdi ạlhem oḍual ịtozi kụ ạḅamaghi sịphe ọmeremiom ọtozi phọ, kụ ọdi ạsighe ogey agol kụ ạkaam ịkpapham mọ rꞌịteleleeny ạrukpa phọ. 24Ọdi ạsighe gol dị ạman 35 igbogh ịtoom ẹemor ogey agol kụ ọkaam bọ ọmeremiom ọtozi phọ ḅịle rꞌoomo ịpheri phọ ạraraar phọ ọdi.
Ọka enmeny ọsu ghan ịnsens
(Ẹḍua 30.1-5)
25Ọdi ạsighe oreeny ạkasia ạkanam enmeny ọsu ghan ịnsens. Inya phọ ạraghaagh phọ eeleeny ni, 45 ẹkulom ạḍighaagh ḍịdoony, 45 ẹkulom ạḍighaagh ḍịregh, 90 ẹkulom ạḍighaagh ḍiphoph. Ạsiogho ịrol li inya phọ aruukuna phọ. 26Ọdi ạsighe ogey agol kụ agbul ạnyu phọ rꞌinya phọ ạraghaagh phọ, kụ ạsighe gol ạgoor akitonom ruukuna phọ. 27Ọdi ạsighe ịyal ariigida agol ạloghom ịkoro eeḍian iigbom mọ ịyal phọ ạga phọ pịdi ẹpam ịkolom mọ ịpe kopoophiom ghan bọ. 28Ọdi ạsighe oreeny ạkasia kụ ạkaam bọ ịkolom mọ kụ agbul gol.
Oḍighi mụnum-ịko phọ ḅịle rꞌịnsens phọ
(Ẹḍua 30.22-38)
29 #
Ẹḍua 30.22-38
Ọdi ạḅile kẹn ni aḍighi mụnum-ịko phọ, ḅịle rꞌọser-sẹr ịnsens eeḅi eḍu dị akirion ịdipho asimeri.
Currently Selected:
Ẹḍua 37: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
