Ẹḍua 22
22
Iilogh iḅulemian
1“Eḍighi ịyaar lọ oye ami nạm mꞌoyool-ọga kụ aghiigh ḅịle aal ẹnam mọ, pọ ọdi kạkpiom oogh ạsinam ḍiniin ạnam kụ ạkpiom inya iyool-ịga esi oniin oyool-ọga. 2-4Ọḅa phọ kạkpe ni rạraar phọ ọdi ami bọ. Eru mạar dị ọdi ụ́moogh rꞌịyaar, pọ kobool nyọdi, kụ ọkpiom ịyaar phọ ọdi ạmi bọ. Eḍighi ịyaar lọ ẹnam mọ omi bọ, eru nạm, mꞌẹnam adool mꞌoyool-ọga kụ ọmiin dị úmugh ḍịghaagh ọdi, eniin ẹnam ọdi kạkpe ghan ịyal.
“Eḍighi ịdi osiphom ọḅa dị rạka kaḍigh otu ḍughul kụ oghiigh, pọ ịḅaal ọdi edi ẹmhu ọdi. Kụ eḍighi ootaany, pọ ologh oghiigh oye ạpam ni nyọdi.
5“Oye lọ ạwile ịnam ẹwalalala eḍigh ozo ọnon oye kụ ẹraal rạraar, mꞌozo ịizupha mꞌozo avain, pọ uwo ịnam mọ ạkpeeghi oomo ạraraar phọ ephiemi bọ.
6“Oye lọ ạkpooni nịan eḍum kụ ạnian phọ eemor, kụ elhiom ịbiakpa ọnon oye, mꞌịlo mogbo ni mꞌịlo kőgbo, pọ oye phọ ạkpooni bọ nịan phọ kạkpeeghi oomo ạraraar phọ ạnian phọ elhe bọ.
7“Eru mạar dị oye ạsighe ruphua mꞌikpoki kụ ạngo matuman ọdi mọ ạphamanaan nyịno, kụ ọghi kꞌọdi omi rạraar phọ; eru mạar dị ọteeny osiph, pọ ọḅa phọ kạkpeeghi rạraar phọ ịyal ịyal. 8Eru mạar dị ọḅa phọ ụ́teeny, pọ oye phọ ọpo ạpham bọ rạraar phọ kọmagh otuomanaan bụo ịiruen phọ kụ ọdi akunya mọ ọno kụ ómi bọ rạraar phọ.
9“Tọrobo aḍighiton lọ rọokonoghian ruphia aruphua mꞌạnam mꞌẹnam adool mꞌoyool-ọga mꞌarukpe mọ ẹnon ịyaar lọ ephe, ịyal awe kụ ọḅem mọ ạraraar phọ ịlo ạbuno, pọ kọsighe bịdi ọkimom bụo ịiruen phọ. Kụ oye lọ Ẹnaan egananami apum kạkpe nyọori phọ ịyal ịyal.
10“Eru mạar dị oye ạsighe ẹnam adool mꞌạnam mꞌoyool-ọga, kụ ạngo matuman ọdi mọ ạphamanaan nyịno kụ ẹnam mọ emugh, mꞌuḍighi ịyaar, mꞌụsighe kụ ọḍuanam mem dị oru ibum, kụ eḍighi ịdi ọgbaanaan úlho, 11pọ oye phọ kạki esi ịiruen kụ akunya mọ ọno kőmi ẹnam mọ. Eḍighi ịyaar dị ẹnam mọ úmi, uwo ẹnam mọ kapinimaam muphe phọ, bịn ọphori phọ oye phọ kạ́kpe nyọdi ịyaar. 12Eru mạar dị omi ni, pọ oye phọ kạkpe ni uwo ẹnam mọ. 13Eru mạar dị ịnon ilhom ịnam kụ eghiigh, pọ oye phọ kạsighe ịpherepe phọ amitiom eḍighi eḍeenaan. Ọdi ọ́kpe ọkpe ịyaar dị ilhom ịnam kụ eghiigh.
14“Eru mạar dị oye ạlom ẹnam amatuman ọdi, kụ ọlogh ẹgha mꞌemugh ni esi dị uwo ẹnam mọ úlho, pọ ọdi kạkpe ni. 15Eru mạar dị ịpe phọ emite esi lọ uwo ẹnam mọ ạrol aani, pọ oye phọ kạ́kpe. Eḍighi ẹnam dị ophir, pọ amuphe kạtolom esi ikpoki phọ ọkpe bọ.
Iilogh iigbia aḅirini rꞌịlo omeeraam Ẹnaan
16 #
Dut 22.28, 29 “Eru mạar dị oye ạsighe esina ọnyani dị oye ḍịkala kőtebeeny, dị oye rꞌọnyani phọ esi kọ̋rolan ghan, kụ ạrolan esi rꞌọnyani phọ, pọ ọdi kạkpe ikpoki ẹmhu phọ ọdi ạḅile apin nyọdi. 17Eru mạar dị ọde ọnyani phọ úmeera mọ oye phọ aphin, pọ ọdi kạkpe ikpoki ịlo ẹman ẹmhu esina ọnyani ạngo ọde phọ.
18 #
Dut 18.10, 11 “Kémeera ghan ọḅaghama ạrol, ikiigh ghan nyọdi.
19 #
Lịv 18.23; 20.15, 16; Dut 27.21 “Oye lọ ạrolan esi rꞌẹnam, ikiigh oye phọ ọpo.
20 #
Dut 17.2-7
“Oye lọ ạphighironaan ẹkia kụ ạngo ẹnon emugh dị ítu Ọmoogh-we phọ, itoph oye phọ ọpo ogbeph emutonaan nyọdi.
21 #
Ẹḍua 23.9; Lịv 19.33, 34; Dut 24.17, 18; 27.19 “Kẹ́miine ḅịle kẹ́gbiphoghom ooruen. Ilegheri mọ nyina ịrol li mem iiruen ẹpe Ijipt. 22Kẹ́miine ekpukele ạnir ḅịle rꞌọnyigo ọony. 23Eḍighi ịyaar lọ oye ạmiine, mị Ọmoogh-we phọ kạnaghan ni mem lọ bịdi umoghiom ịmi ọloghonaan ạḍighaagh. 24Kẹkagh ni ologhi ạmi eteneghi, kụ mị ạsighe elhool ẹgham akiighom oye phọ ọpo. Ạnir phọ ọdi aḍighi aani ekpukele ạnir, ạnmuny phọ ọdi oḍighi aani bụnyigo ạnmuny.
25 #
Lịv 25.35-38; Dut 15.7-11; 23.19, 20 “Eru mạar dị nạ ạale ikpoki tọro oye ạmi lọ ụ́moogh, káḍighi mụdi oye-ịboole bịn ạḅeni mọ ạlogh ọḅar. 26#Dut 24.10-13Eru mạar dị nạ ạsighe ogbogh ạsuoma osipheeny ḍịghaagh ọnon oye ịdipho ọphaghan dị kạkpe nyịna, nạ kaḅulemi ạngo kụ erumuḍio egbi omeel ighool, 27ịdi eḍighi bọ ọpo bịn kụ ịyaar ozua dị ọdi ạmoogh dị kạngo nyọdi ọonyuum. Eeghe kụ ẹdi ọdi kạḅile azua loor? Mem dị ọdi umoghiom ịmi, mị kạnaghanan ni nyọdi, loor esi dị mị ạmoogh ọnma igbiririph.
28 #
Iiḍ 23.5
“Kạ́kaaph ịkaraph ịlo Ẹnaan; ḅịle kẹn kátonyon oḍiemiom awe phọ anyina.
29“Káakpukian ọngo ạmi ịḅel iimuma sịphe ịbiakpa phọ ạna, rꞌamiim mọ ạna, rꞌạmunum mọ ạna.
“Ụngo ịmi ịkpana ạnmuny phọ ạna. 30Tụugh ghan ịduon ụngo ịmi ẹḅel ẹmaria sịphe ạsinam mọ rꞌiyool-ịga phọ ạna. Oḍual aḍio kụ ịdi ẹnam kẹtolan ghan rꞌonhiin phọ, kụ rẹman ọphaanya aḍughul-otu, sịghe aru ụngo ịmi.
31 #
Lịv 17.15
“Nyina iḍighi we iigbia ạmi; loor ịduon phọ kẹ́ba ghan iphulupul ẹnam lọ ilhom ịnam eghiigh, kpạripe ịngo suogh.
Currently Selected:
Ẹḍua 22: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
