Ẹḍua 11
11
AMozis ạkaaph ịlo aḍuugh ịkpana ạnmuny
1Ọmoogh-we phọ ạḅeni Mozis mọ, “Esugha eniin ẹepoph bịn dị mị kaḍighi ọdaam eelhe phọ rꞌawe phọ Ijipt, kụ ọdi agbi omeera mọ nyina egheel. Ọkar agey, ọdi kaporogh ni oomo phọ anyina amiteghom sịen. 2Nyịidipho kịa ạḅaanaan we phọ Ịzirel ạḅeni bịdi mọ tọrobo oye ạlom matuman ọdi, tọrobo ạnir ạlom matuman ọdi rạraar odoghoḍian lọ ọlemom gol rꞌasilva.”
3Ọmoogh-we phọ aḍighi ịdi awe phọ Ijipt ọngo rughuenian we phọ Ịzirel. Ịdi epu pạ awe iiḍighi phọ rꞌoomo awe phọ ụmiin mọ aMozis ogbogh oye.
4AMozis ạḅeni ọdaam eelhe phọ mọ, “Ọmoogh-we phọ ạḅem mọ, ‘Mem dị rẹwa oḍighi ogbo aḍughul, mị katelhe ạḅeeny Ijipt, 5kụ tọrobo ọkpana ọony sịphe Ijipt kamugh ni, emiigh ọkpana ọdaam eelhe phọ ọpo mụtolom bọ ạgada ọdaam ẹmha phọ kụ ẹteeny mọony ẹbene-ạnir phọ ọpo rạgbe ghan bọ ịbiakpa. Ịḅel ẹmaria ạsinam mọ kẹn kemugh ni. 6Ẹwalalaany emoghi kẹtol li oomo ade phọ Ijipt, dị ọdo phọ emoghi phọ ẹpe kẹ̋rol ghan, kụ kẹ́tol mun. 7Kụ rꞌaghoogh bịn kágbophoghuom we phọ Ịzirel ḅịle rꞌịnam mọ ạbidi, kụ nyina elegheri mọ mị Ọmoogh-we phọ ạlogh ni ọku ogbo Ijipt rꞌỊzirel.’” 8AMozis akureriom kụ ạḅem mọ, “Oomo abutelhedom mọ ạna kotu ni ụteeny ịmi kụ okpuḍughian, kụ ọḅem ghan mọ, ‘Ịḍuaghu, nạ rꞌoomo phọ ạbuphe ọdaph bọ nyịna.’ Kụ ẹdi mị agbi omite.” Kụ rꞌoboom ophin ologhi kụ aMozis ạḍuanam kꞌọdaam eelhe phọ.
9Ọmoogh-we phọ mạḅeni ni Mozis mọ, “Ọdaam eelhe phọ nyịna kạ́naghanan, ọbo ịiḍaany phọ ạmi eleeny sịen ade phọ Ijipt.” 10AMozis rꞌEeron uḍighi yogh ni oomo ịiḍaany phọ ịphen risigh ọdaam eelhe phọ, kụ Ọmoogh-we phọ ạkparami ni ologhi ọdi. Kụ ọdaam eelhe phọ ómeera mọ awe phọ Ịzirel ọḍua sịphe ade phọ Ijipt ogheel.
Currently Selected:
Ẹḍua 11: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
