Esta 5
5
Esta ạmagh ọdaam mọ rꞌaHaman oru olhe egbogh ẹyaal
1Ḍio dị emuneniom ịraar esi ạdol ọkoony phọ ọdi, Esta ạkpologhian iinmenan ạnir ọdaam ẹmha mọ kụ ạghi ạmeera sịphe erugh ogiga ạrol bọ rapogh bọ osoph ọdaam mọ. Ọdaam mọ odi ologhi ạtol sịphe ạgada ọdaam ẹmha phọ rapogh ghan eḍighom mọ. 2Mem dị ọdaam mọ ạmiin bọ Esta ukueni-ạnir dị ạmeera erugh, ọdi ạmoogh ḍịḅeeraan esi ọdi, kụ ọdi asele amitiom ạngo nyọdi ẹḅu agol phọ. Ịphen reten, Esta aru amite kụ ạḅogh ẹpe eekuna ẹḅu phọ ọdi. 3Ọdaam mọ apuru mọ, “Eeghe, Esta ukueni-ạnir? Ụḅeni ịmi ịpe nạ rạwa bọ bịn nạ kạmoogh ni — ghạlamo eḍighi mạar dị eru oolemi odi eelhe ọda phọ ạmi.”
4Esta ạphagharanaan mọ, “Eḍighi mạar dị ẹḅeeraan Igbogh Ạna, kịḅeeraan ịmi dị nạ rꞌaHaman koḍighi bụo ạḍimagh ạmi ḍughul phọ arodon esi egbogh ẹyaal dị mị riikolobianaan inyina.” 5Pọ kụ esi dị ọdaam mọ ạto mọ aHaman ạnuun aru ọbo bịdi ọghi ḍịmagh phọ Esta. Esi ịduon phọ ọdaam mọ rꞌaHaman ụghi ni ẹyaal phọ Esta. 6Rọmeleghi rimiim mọ, kụ ọdaam mọ apuru Esta, “Ụḅeni ịmi ịpe nạ rạwa bọ, kụ mị kạkuom ni nyịna ịyaar lọ nạ ạzua, ghạlamo eḍighi mạar dị eru oolemi odi eelhe ọda phọ ạmi.”
7Esta ạphagharanaan mọ 8“Eḍighi mạar dị Igbogh phọ ạna ẹmoogh ni ọnma ighirigiir dị ạmanam ọngo ịlom mọ ạmi, kịḅeeraan ịmi dị nạ rꞌaHaman koḍighi bụo ạḍimagh ạmi iḍue esi ẹnon ẹyaal dị mị kiikolobianaan inyina. Amem mọ ạmuphe kụ ẹdi mị kạḅeni nyịna ịpe mị rạwa bọ.”
AHaman amite ezue oghiigh aModekai
9Mem mọ aHaman ạḍua bọ sịphe olhe ẹyaal phọ ọdi ạḅaal li ologhi kụ ạrol rꞌibo. Kụ ọlo mem mọ ọpo ọdi ạmiin bọ aModekai sịphe eḍighom ogiga ọdaam mọ dị úḅetenu ụḅile ụlogh eegu ịdipho ọdi raten bọ, aHaman ạghagham ni nyọdi ologhi iboom. 10Kụ ọlo ọdi ạphamaghan ni loor ọdi kụ agheel ologhi otu. Reru reten, kụ ọdi ạmagh rịghiri ọdi oru kꞌọdi kụ ạḅeni Zeres ạnir phọ ọdi ọghi ọḅophoghan rꞌạbidi. 11Ọdi aatuma risigh ạbidi ịlo ẹelha dị ọdi ạmoogh rꞌọnhu alephiri ạnmuny dị ọdi ạmoogh, rꞌịdi ọdaam mọ maphoophe nyọdi aseere ḍigbogh ạdol, rꞌịdi ọdi mạḅile ạman mạar apu bụeri phọ ạbuo iiḍighi kꞌọdaam mọ. 12“Ịdi epu sịphe,” AHaman ạghaaphom ni mọ, “Ukueni-ạnir Esta alhe ni ẹyaal dị ạmagh ọdaam mọ rꞌạmi bịn, kụ ụmagh ni iyoor ọḅile ọghi iḍue. 13Kụ ọlo rꞌeniin esi ạraraar phọ ịphen dị ẹman ịyaar esi ạmi ílho dị mị rạmiin ni kạghiom risigh aModekai ọlo aJu phọ dị ạrol sịphe eḍighom ogiga ọdaam mọ.”
14Esi ịduon phọ ạnir ọdi rꞌoomo ạrighiri ọdi ogbiighi kụ ọḅeni nyọdi mọ, “Uḍighi ika kụ nạ ọ́ka bọ esi osinogh awe dị ẹman ịyaldi rꞌịyal akuḅu ḍiphoph? Iḍueneen ḍịroor, kịa ạaḅereghian ọdaam mọ mọ ạto ạngo we mọ osin aModekai sịphe ạnyu phọ. Ḍighi ịduon kụ nạ ạki ẹyaal phọ rꞌọḅaal ologhi.” AHaman agbiighi mọ ọphon ogeny oroma kụ ạto ạḅeni we mọ ọlogh esi osinogh phọ.
Currently Selected:
Esta 5: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
