Ẹmos 3
3
1Weye Ịzirel, ịnaghanan ikpo ọnhu phọ Ọmoogh-we phọ mạḅem bọ ịkpulughiom inyina, oomo eelhe phọ ọdi ạphel bọ atene esi ịminimiin Ijipt: 2“Sịphe ogbo oomo areelhe phọ edi bọ sịen aḅirini phọ, nyina kụ awe dị mị malhegheri kụ ạḅile raako. Ịpe kụ iḍighi kụ ịkaraph phọ anyina elegheri bọ eḍigh ruugu, kụ ịdipho kụ ẹdi mị kạtuan bọ ịkaraph phọ anyina kụ ịlhiom inyina.”
Arukumuan oyil phọ
3Ịyal awe koguan ni ọghi erelhe dị úguan esi dị bịdi kọḍua kụ ọki ḍụghum?
4Ạnam-dịka kemoogha ni ologhi ẹekpua dị ụ́miin ẹnam ạanyi ḍụghum?
Ọony ạnam-dịka kạyugh ni esi amarugh ạbidi, dị ịyaar kősiph ḍụghum?
5Ẹnun kemeel li ḍiphil dị ịyaar ụ́kpamiom ḍụghum?
Aḍiphil kẹkpatanu ni bịn dị ịyaar ítir ḍụghum?
6Ọkuodu ẹgham kạḅa ni ẹmha dị awe phọ kọ́moogh oghiilaan ḍụghum?
Ịiḅaghami kemite ni ẹmha dị Ọmoogh-we phọ kútom ḍụghum?
7Ọmoogh-we Oomo Ịikpo phọ káḍighi ịyaar dị igbiighi phọ ọdi kágananami aḍeenaan butelhedom mọ ọdi, riil phọ.
8Mem dị ạnam-dịka mamoogha, ạnhian kụ ẹdi kạ́moogh oghiilaan.
Mem dị Ọmoogh-we Oomo Ịikpo phọ mạḅa, ạnhian kụ ẹdi kápiigha ogbeel adom mọ?
Ephiemiom mọ aSameria
9Gbeel ạḅeni we phọ orughogh bọ ruutu ạbudaam mọ Ijipt rꞌẠsdod: “Iikpomoghan ẹpe ạraaḅaraph phọ ekoom bọ Sameria, kụ ẹmiin igbogh ịgbaragbara rꞌịkaraph phọ roḍighi bọ ẹpe.”
10Ọmoogh-we phọ ạḅem mọ, “Awe phọ ạbuen phọ omuzeḍi ruutu ạbidi rꞌạraraar dị ọmoogh reten ẹekpara ekpeḍien rꞌoḍighi ịkaraph. Bịdi úlegheri ọgba igey. 11Esi ịphen phọ, ạmulogh-ḍien kokoonyom ni de phọ ạbidi, apiemi ephighiom ịikpo phọ ạbidi kụ aagulemi ruutu phọ ạbidi.”
12Ọmoogh-we phọ ạḅem mọ, “Ịdipho okoriom iyool-ịga kạapoghion bọ ni eeni ịyal aruwol mꞌoniin aḅeri oyool-ọga dị ạnam-dịka mạsighe bịn, ịduon kụ ẹdi ịyal-ikpo awe bịn kụ kosugha esi awe aSameria, bụen phọ nyịidipho ọbeḍeghian bọ esi igbogh ạsigada. 13Ịnaghan nyịidipho kụ ẹphur rụru, nmụny ạnmuny ạJekob,” Ọmoogh-we Egbogh Ẹnaan Oomo Ịikpo phọ kụ ạḅem. 14#2 Ạbud 23.15“Ḍio phọ mị kạliom bọ we phọ Ịzirel ịlo ịkaraph phọ ạbidi, mị kapiemi ni rạgbanaghi ạrikia phọ ạBetel. Oomo ạrughulukul ạtorobo ọgbanaghi keḅomoghian ni emeel ude. 15Mị kapiemi ni ruutu aghozogh rꞌaruutu arunu. Aruutu phọ ọmaar bọ kụ ọdamaghiom ịdu ạruuma kemeel li kụ eetughuḍian; tọrobo ogbogh otu koogulemi ni.”
Currently Selected:
Ẹmos 3: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
