Ẹmos 4
4
1Ịnaghan ịphen, nyina ạnmariir aSameria, nyina phọ ạbuen ẹbugh bọ mụdi ạsinam ạBasan dị elhe ẹpher, dị kẹtiroghom bụphe ịnyaam ụ́moogh bọ, ẹkpiloghom rukulom mọ kụ ẹkpaariom burulhom anyina ọngo anyina miim! 2Ịdipho Ọmoogh-we Oomo Ịikpo phọ aḍighi bọ oye aruukuan, ọdi maguanaan mọ, “Ariiḍio retu ni dị kịghogh inyina rꞌạsiḅaph; tọrobo ọnyo anyina kạkigh ena dị edi ḍiḅaph. 3Kịghogh inyina osiemi esi lọ iikpe phọ eruphaan kụ otoph omitiom.”
Émeera phọ Ịzirel esi ọtuugha
4Ọmoogh-we Oomo Ịikpo phọ ạḅem mọ, “Weye Ịzirel, ịki esi iigbia ẹpe Bẹtel kụ eḍighi ghan ịkaraph, eḍighi ịyaar lọ ịḅeeraan inyina! Ịki ẹpe Gịlgal kụ eḍighi ịkaraph phọ rꞌoomo ịnyaam anyina! Kụ ẹghi ẹsighe ịnam ọphighironom ẹkia ḍịroor etum ḍịroor eru, kụ ẹsighe ghan muniin abin esi aḍioph phọ ẹsighe eru tọrobo aḍughul-otu dị emuneniom ịraar. 5Ịkparami ni ẹngo ghan eḍien ọsephom Ẹnaan, kụ eetuma ghan ịlo ịpheri phọ inmo phọ nyina rẹngo ghan bọ! Ịphen kụ ịdo ạraraar dị rịḅeeraan ghan inyina oḍighi!
6“Mị kụ ụsighe bọ ni ịgbakuro aruom oomo phọ ạramha phọ anyina, kụ nyina ímeera ni íḅula esi ạmi. 7Mị kụ ụphamaghan bọ ni ọlophia phọ mem mọ ọpo ịizupha phọ anyina ẹkar bọ ẹwa mụum. Mị ụngo ni ọlophia eniin ẹmha kụ ẹnon mị ụ́ngo. Ọlophia ạloph ni oniin ozo kụ ọnon ọ́lhoph kụ ạkaraghar. 8Loor aḍidugh esi ẹephua ạmuum, awe ịbadi ạramha ụghi ni ẹmha lọ bịdi kọmiin mụum, kụ ọ́rol ịdi ạkasian ọphughol. Ghạlamo ịduon phọ ni, nyina ímeera ni íḅula esi ạmi.
9“Mị urom ni ọgbagara ookuugh mọ aru aḍighi ịdi ịizupha anyina kẹkaraghar. Igurubia ilhe ni oomo ịizupha ḅịle rꞌaroghoony, iizo avain, ireeny ạfig rꞌireeny ọliv phọ anyina. Ghạlamo ịduon phọ ni, nyina ímeera ni íḅula esi ạmi.
10“Mị urom ni ọdo kịrokiro ịiḅaghami iruom inyina, ịdo phọ ịpe mị ạghiom bọ we Ijipt. Mị ụze ni ugheel ạnmuny anyina esi ẹgham, kụ mị ạsighiogh rụsu phọ. Mị ụuḅaghamiom ni izon anyina rꞌeḍu awe dị momuughu rugbogo phọ ịpe nyina eekpomoghan ghan bọ. Ghạlamo ịduon phọ ni, nyina ímeera ni íḅula esi ạmi.
11 #
Emi 19.24
“Mị uphiemi ni opol anyina ịdipho mị aphiemi bọ Sọdom rꞌaGomora. Bụphe osugha bọ ụghigh oreeny dị ạnian elhe kụ esugheeny. Ghạlamo ịduon phọ ni, nyina ímeera ni íḅula esi ạmi,” Ọmoogh-we phọ kụ ạḅem. 12“Loor ịphen phọ, ilegheri, weye Ịzirel, mọ mị kịliom ni inyina. Kụ loor esi dị mị kaḍighi bọ ịduon phọ, iikolobian ọmerenyan ịiruen phọ ạmi!”
13Ẹnaan phọ kụ ạlhem rạaḅaraph phọ
kụ ạḅile ạlhem ookuugh phọ.
Ọdi ragananami ghan ni ịitughian phọ kạḅeni we;
Ọdi ranme ghan ni ootaany katene ḍughul.
Ọdi ratelhe ghan ạnyu ariikpisi phọ ịpe ephoph bọ sịen ade phọ;
Ḍịen kụ aḍien ọdi: Ọmoogh-we Ẹnaan Oomo Ịikpo phọ!
Currently Selected:
Ẹmos 4: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
