2 Krọnikuls 36
36
AJoahaz ọdaam mọ aJuda
(2 Ạbudaam 23.30-35)
1Awe phọ aJuda ụsaḅar ri Joahaz ọony aJosaya ọsagharan nyọdi mụnum oḍighi ọdaam sịphe Jeruselem. 2AJoahaz ạman bọ 23 ạsia kụ aḍighi ọdaam aJuda, kụ ọdi ạda sịphe Jeruselem ịraar ụnwanyu. 3ANeko Ọdaam mọ Ijipt asiph ni nyọdi kụ ạkpaariom mọ aJuda osogh iisogh 3,400 igbogh ịtoom ẹemor asilva ra 34 igbogh ịtoom ẹemor agol. 4#Jer 22.11, 12ANeko ạma Ẹliakim umor aJoahaz ạdaami Juda kụ anme ḍien ọdi kụ aghol mọ aJehoyakim. ANeko ạsighe Joahaz agheelom Ijipt.
AJehoyakim ọdaam mọ aJuda
(2 Ạbudaam 23.36—24.7)
5 #
Jer 22.18, 19; 26.1-6; 35.1-19 AJehoyakim ạman bọ ịyaldi rꞌoogh ạsia kụ aḍighi ọdaam aJuda, kụ ọdi ạda sịphe Jeruselem ḍioph rꞌoniin ạsia. Ọdi ạpioghom esi Ọmoogh-we Ẹnaan phọ ọdi. 6#Jer 25.1-38; 36.1-32; 45.1-5; Dạn 1.1, 2ẠNebukadnezar ọdaam eelhe phọ ạBabilon azuom ni Juda, asiph Jehoyakim ạkpoom izime, kụ ạsighe nyọdi ạghimom Bạbilonia. 7ẠNebukadnezar ạsighiogh iniin aruphua phọ ẹrol bọ sịphe Otu Ịiḅereghi phọ ạḍuanam kụ adoghoḍi otu-ọolha ọdi ẹpe Bạbilon. 8Oomo ạraraar dị aJehoyakim aḍighi yogh, ọḅaran sịḅaphanya rꞌịkaraph phọ ọdi, ọgeeghi loor ạḍinya ịpe emiteghu bọ mem ạbudaam mọ Ịzirel rꞌaJuda. AJehoyasin ọony ọdi kụ ạsighe dọl ọdaam mọ ọdi.
AJehoyasin ọdaam mọ aJuda
(2 Ạbudaam 24.8-17)
9AJehoyasin ạman bọ ḍioph rꞌọphaanya ạsia kụ aḍighi ọdaam aJuda, kụ ọdi ạda sịphe Jeruselem ịraar ụnwanyu rꞌaḍioph aḍughul-otu. Ọdi kẹn ạpioghom esi Ọmoogh-we phọ. 10#Jer 22.24-30; 24.1-10; 29.1, 2; Izik 17.12; Jer 37.1; Izik 17.13Mem dị ẹteeny unu, ạNebukadnezar ọdaam mọ ạsighe Jehoyasin dị osiph agheelom Bạbilonia, kụ aakoroghi ruphua phọ ẹrol bọ sịphe Otu Ịiḅereghi phọ, ạsighiogh ạḍuanam. Kụ ạNebukadnezar ạma Zẹdekaya umor ọde aJehoyasin ạdaami Juda rꞌaJeruselem.
ẠZedekaya ọdaam mọ aJuda
(2 Ạbudaam 24.18-20; Jerimaya 52.1-3a)
11 #
Jer 27.1-22; 28.1-17 ẠZedekaya ạman bọ 21 ạsia kụ aḍighi ọdaam aJuda, kụ ọdi ạda sịphe Jeruselem ḍioph rꞌaḍiniin ạsia. 12Ọdi ạpioghom esi Ọmoogh-we phọ kụ ọ́ḅaram osooromi aloor kụ ọnaghanan Jerimaya oyil phọ, ọpo ạḅa bọ ikpo ọnhu Ọmoogh-we phọ.
Emeel phọ aJeruselem
(2 Ạbudaam 25.1-21; Jerimaya 52.3b-11)
13 #
Izik 17.15
ẠZedekaya ạḅaar ri ẹmhu esi ạNebukadnezar ọdaam mọ, ọpo ạkpaariom bọ nyọdi mọ aghunya rꞌaḍien Ẹnaan mọ ọdi kaḍugh ni oye. Ọdi ạmoogh oḅom ẹmhu kụ ómeera okiton oḅula esi Ọmoogh-we Ẹnaan phọ Ịzirel. 14Ẹdi etum, abuḍiemiom mọ aJuda, ariil ạrikia phọ rꞌawe phọ ụdaphan ẹkaraph eḍighinom ịyaar areelhe phọ ịpe ekoom bọ bịdi ooseeny ghan ịkaaneen ạrumugh, kụ bịdi ọphue Otu Ịiḅereghi phọ, ọpo Ọmoogh-we phọ rꞌaloor maseere bọ mọ aḍighi esi iigbia. 15Oomo amem Ọmoogh-we Ẹnaan ạburude ạburude phọ ạbidi arom ghan ni riil ọphur ạruru we phọ ọdi, loor esi dị ọdi ạwa ọphel ạbidi rꞌOtu Ịiḅereghi phọ. 16Kụ bịdi ọgilaam ghan rụukpaany phọ ọdi, ọḅitonaan ikpo ọnhu phọ ọdi kụ ọmilogh riil phọ ọdi tụtu ẹteeny mem dị Ọmoogh-we phọ ạmooghom ophin ologhi we phọ ọdi dị ạbugh iboom kụ okpetenaan ọ́rol.
17 #
Jer 21.1-10; 34.1-5 Ịduon kụ iḍighi kụ Ọmoogh-we phọ ạsighe ọdaam eelhe phọ ạBabilon mọ eeghiom bịdi. Ọdi ạze ni ugheel ạnmuny phọ, ghạlamo rꞌịsiphe Otu Ịiḅereghi phọ. Ọdi ọ́mooghaan ọnma ighirigiir oye, mꞌonyugheel mꞌokumoor oye, mꞌolephiri mꞌạnir, mꞌómoom mꞌamoon. Ẹnaan ịḅogh ni oomo ạbidi ẹngo nyọdi. 18Ọdaam eelhe phọ ạBabilon awum ruphua Otu Ịiḅereghi phọ, eekoom otu ịiḅereghi, rꞌẹelha ọdaam mọ rꞌạbuo iiḍighi ọdi kụ ạsighiogh oomo phọ ịne agheelom Bạbilon. 19#1 Ạbud 9.8Ọdi ạsu nịan Otu Ịiḅereghi phọ rꞌẹmha phọ, rꞌoomo arigiga phọ rꞌaruphua phọ kụ alhereghi iikpe ẹmha phọ. 20Ọdi ạsighiogh oomo awe lọ usugha agheelom Bạbilonia, eelhe dị bịdi oḍighinaan nyọdi rꞌạnmuny ạnmuny ọdi iiḍighi ịdipho ạrebene tụtu ẹteeny mem mọ ọmar phọ aPasia aru bọ asi. 21#Jer 25.11; 29.10Ịduon phọ ịpe Ọmoogh-we phọ mạḅeni bọ Jerimaya oyil phọ emiteghu ni: “Ade phọ keḍighi ni ọkpagha esi rꞌoḍualdi ạsia omuneniom ophooghian phọ ọpo awe úpooghian ghan bọ.”
ẠSairos ạto mọ bụo aJu ogheel ẹmha
(Ẹzra 1.1-4)
22Ḍịḅel ạlha phọ ạḍiphe ạSairos aḍighi bọ ọdaam mọ aPasia, Ọmoogh-we phọ aḍighi amitiom ịpe ọdi mạḅeni bọ Jerimaya oyil phọ. Ọdi ạkpaariom ni Sạiros ọlogh ologh dị kọge ọkiomonaan tọrobo ekpisi sịphe eelhe phọ ọdi mọ ạal omitiom:
23 #
Azay 44.28
“Ịphen kụ ịto phọ ạSairos ogbogh ọdaam eelhe aPasia. Ọmoogh-we Ẹnaan kꞌạke phọ muḍighi ịmi ọdaam oomo areelhe ịsien aḅirini phọ kụ mụḅogh ịmi ọngo oḍighi ọloghonaan otu ịiḅereghi nyọdi ẹpe Jeruselem ẹpe Juda. Nyịidipho, oomo phọ anyina oḍighi bọ we Ẹnaan, ịki ẹpe, kụ Ẹnaan phọ anyina Ọmoogh-we phọ ịrolan inyina.”
Currently Selected:
2 Krọnikuls 36: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
