2 Krọnikuls 35
35
AJosaya ale ẹyaal ọphel otene
(2 Ạbudaam 23.21-23)
1AJosaya ọdaam mọ alhe ni ẹyaal ọphel otene phọ ẹpe Jeruselem oghueniom Ọmoogh-we phọ; ḍio dị emuneniom ḍioph rꞌinya ọḅel ụnwanyu phọ bịdi ụze ni ịnam mọ ịlo ẹyaal phọ. 2Ọdi ạngo riil ạrikia phọ iiḍighi dị bịdi koḍighi sịphe Otu Ịiḅereghi phọ kụ ạkparami iloghi ạbidi ọkuami oḍighi. 3Ọdi ạngo kẹn oromoghian phọ ịphen bụo aLivai, bụtughemia phọ Ịzirel, dị ọḅogh ọngo Ọmoogh-we phọ: “Ịlogh Igbe Ịyo iigbia phọ sịphe Otu Ịiḅereghi phọ ạSolomon ọdaam mọ, ọony aDevid, ạlogh bọ. Kékironom mun ọḍua esi ọghi esi. Ịtol sịen eḍighi ghan oḍighi phọ Ọmoogh-we Ẹnaan phọ anyina rꞌỊzirel awe phọ ọdi. 4#2 Krọ 8.14Ịtologhu riisi anyina sịphe Otu Ịiḅereghi phọ, ọto atum ọto, ọdaphan iiḍighi phọ aDevid rꞌạSolomon ọony ọdi ọḅogh bọ ịngo inyina, 5kụ ẹrologhu dọl dị oye oye anyina katue ạloghonaan ḍịghaagh tọrobo eghunotu Ịzirel. 6Nyina kẹze nmụny iyool rꞌạrutu-ịga olhiom ẹyaal ọphel otene phọ. Nyịidipho iselemian siloor anyina kụ eekolobian rịkia phọ ọbo abumor awe Ịzirel phọ anyina ọdaphan oromoghiom mọ Ọmoogh-we phọ ạḅeni bọ Mozis mọ ạngo phọ.”
7Ịlo awe phọ koliom ẹyaal phọ, aJosaya amitiom ni loor aḍita ịnam ọdi ịraardi ọonir iyool-ịga, ạnmuny iyool-ịga phọ rꞌạnmuny ạrutu-ịga, rꞌịraar ọonir ilephiri ạsinam. 8Awe iiḍighi ọdi ụngo aani ni ịnam ịlo awe phọ, ariil ạrikia phọ, rꞌạbuo aLivai koḍighinom. Kụ awe iiḍighi phọ ropogh bọ Otu Ịiḅereghi phọ — ạHilkaya ogbogh oyil ạrikia phọ, ạZekaraya, rꞌạJehiel — ụngo riil ạrikia phọ 2,600 ạnmuny iyool rꞌạrutu-ịga ra 300 ilephiri ạsinam oḍighinom ạrikia mem ẹyaal phọ. 9Abuḍiemiom aLivait phọ — aKonania, aSemaya rꞌumor ọdi Nẹtanel, aHasabaya, ạJeyel, rꞌạJozabad — ụngo 5,000 ạnmuny iyool-ịga rꞌạnmuny ạrutu-ịga ra 500 ilephiri ạsinam ịlo ạbuo aLivai phọ kọphinyonom rịkia.
10Mem dị mosereghi rạraar ịlo esi rꞌesi ịlo ẹyaal ọphel otene phọ, ariil ạrikia phọ rꞌạbuo aLivai phọ ọmeregha riisi ạbidi, ịdipho ọdaam mọ ạto bọ. 11Mem dị mọze nmụny iyool-ịga rꞌạrutu-ịga phọ, ạbuo aLivai ọkponyon ruzu phọ, kụ ariil ạrikia phọ ọsaraghiom ịḅaal ạnyu enmeny phọ. 12Kụ bịdi ọsighe ịnam mọ, ọngooghi we bụo eghunotu rꞌeghunotu, ọbo bịdi ọphinyonom rịkia oguom ạnian ọdaphan oromoghiom mọ edi bọ sịphe Ologh phọ aMozis. 13#Ẹḍua 12.8, 9Ạbuo aLivai phọ ọphophoghi rịkia ẹyaal ọphel otene phọ loor ạnian ịdipho ologh phọ ạḅem bọ, kụ ọsaaghi rịkia iigbia loor asuugh, ạsigbagba, asuugh odiiny rꞌạrukpa, kụ aagborion adiemi ịnam mọ we phọ. 14Ịphen phọ reten, bụo aLivai phọ umitiom ịnam ịlo aloor ạbidi rꞌịlo ariil ạrikia ạbuo ẹemara phọ Eeron, ịdi eḍighi bọ ariil ạrikia phọ uḍighi oḍighi tụtu eghulom, ọphophoghi ghan ịnam dị ọsu ikpom rꞌẹnuum ạrikia mọ. 15#1 Krọ 25.1Ạroko-ạsuor phọ ạbuen bụo ọto Asaf ọlo eghun phọ aLivai ụrol riisi dị osereghi bịdi, ọdaphan oromoghian aDevid ọdaam mọ: Asaf, aHeman, rꞌaJedutun oyil ọdaam mọ. Abukoriom ạrunhu-aḍibuo Otu Ịiḅereghi ụ́kpe ọḍua ariisi ẹmeera phọ ạbidi, loor esi dị bụnon awe aLivait kụ ụsaanaan eḍien ẹyaal ọphel otene phọ ạbidi. 16Loor ịduon phọ, ịdipho aJosaya ọdaam mọ mạto bọ, oomo ạraraar uḍighi ḍio phọ ạḍiphe ẹlo ooseeny Ọmoogh-we phọ, ooko ghan ẹyaal ọphel otene phọ ḅịle rꞌoḍighi ạrikia oguom ạnian sịphe enmeny phọ. 17#Ẹḍua 12.1-20Oḍual asuḍughul-otu, oomo awe Ịzirel dị ọrol, ule ghan ẹyaal ọphel otene phọ rꞌẹyaal ạbred dị yist ụ́logh. 18Emiigh kꞌamem ạSamuel oyil phọ kőlhe ghan ẹyaal ọphel otene phọ ịduon. Rꞌoniin ọdaam dị mạrol ghan dị ale ẹyaal phọ ẹphen ịduon aJosaya ale bọ ólho, nyẹen ariil ạrikia phọ, bụo aLivai phọ rꞌawe aJuda, Ịzirel rꞌaJeruselem olhe bọ 19lhạ phọ ạḍiphe emuneniom bọ ḍioph rꞌọphaanya ọda phọ aJosaya.
Ekureriom ọda phọ aJosaya
(2 Ạbudaam 23.28-30)
20Mem dị aJosaya ọdaam mọ maḍighi oomo ịphen aseenaan Otu Ịiḅereghi phọ, aNeko Ọdaam mọ Ijipt aḍiemiom ni we ẹgham eeghi ẹpe Kakemis ọgbal Ọphiiny aYufratis. AJosaya ạkparagha ịlo osophoghom ọdi, 21kụ aNeko arom dom mọ aḍien ạghiomaan Josaya mọ, “Ẹgham mọ ẹphen mị rabe bọ nyịna ẹ́moogh, ọdaam aJuda. Mị útu eeghi rꞌạna, kụ eeghi rꞌạbumulogh-ḍien ạmi, kụ Ẹnaan mịḅeni ịmi oogborion. Ẹnaan edianaan rꞌạmi. Ịduon kụ iḍighi kụ émeera kị́tol esi ạna, ọbo ọdi kạphue ghan bọ nyịna.” 22Kụ aJosaya ạnya ni ee elephiri. Ọdi ómeera ọnaghan ịlo Ẹnaan rẹkaaph sịphe ikpo ọnhu phọ aNeko Ọdaam mọ, kụ ọdi ạaghi loor ọdi bịn ạghi ẹgham ẹpe ạḍiyaghaghaany ade phọ aMegido.
23Ọdi robe ẹgham mọ, bịn ịkpina ạbuo Ijipt ẹteeny nyọdi. Ọdi ạto ạḅeni butelhedom ọdi mọ, “Ịsighe ịmi ẹḍuanam; muḍighi ịmi ịyaar!” 24Bịdi ophoophe nyọdi ọsighe sịphe oghuugh-ude phọ ọdi, ọlogh nyọdi ologhi ọnon oghuugh dị ọdi ạmoogh, kụ ọghimom nyọdi Jeruselem. Sịphe kụ ẹdi ọdi amugh kụ oḍi nyọdi ẹpe ariiḍi ạburude phọ ọdi. Oomo awe phọ aJuda rꞌaJeruselem umoghi ḍuugh phọ ọdi.
25AJerimaya ạlogh ḍụor ọotughianam aJosaya ọdaam mọ. Meḍighi eseeriom ẹpe Ịzirel dị ạroko-ạsuor, lephiri rꞌạnmariir, ụmoor ghan ḍụor phọ ạḍien mem dị bịdi romoghi nyọdi. Ḍụor phọ mọmiin esi dị ookpomoghi ịdo ạsuor phọ ịphen.
26Oomo iiḍighi phọ aJosaya — ọkuom aloor ọdi esi Ọmoogh-we phọ, ọnaghanan Ologh phọ, 27rꞌịlo aghuḍum kꞌemiighom kꞌekureriom — ọge sịphe ạḍinya ịpe emiteghu bọ mem ạbudaam mọ Ịzirel rꞌaJuda.
Currently Selected:
2 Krọnikuls 35: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
