ZƐKARIA 8

AGWANGWAMA Heŋshi maa Gwuricinje Jɛrusalɛm

1Nazhɛ AGWANGWAMA na Hwuri Kpaaŋ dumananɛ n-ndumwa ne mi, bɛɛ hiɛŋ. 2Gana Gamba AGWANGWAMA na Hwuri Kpaaŋ jɛmɛ na, N hiɛŋ, Mo tono uwuru iwɛ Zayon, isɛbwɛ kaa yo hwoŋno na amɛ mi tebiye iwɛ ubwa. 3Gana Gamba AGWANGWAMA na Hwuri Kpaaŋ jɛmɛ na, N hiɛŋ, N zhɛ me gwure nu Zayon, maa Ma nama na ashashɛ Jɛrusalɛm, nazhɛ ɛɛ zhɛ ɛ hiɛŋ Jɛrusalɛm ụ shɛ ụshɛpwụ tɛcara, ɛɛ zhɛ ɛ hiɛŋ, Ishɛmɛ ya AGWANGWAMA na Hwuri Kpaaŋ i shɛ ishɛmɛ tijilo. 4Gamba AGWANGWAMA na Hwuri Kpaaŋ, N hiɛŋ, N-nyarɛ nu n-ndaụŋ mi zhɛ ma 'waŋna shekwute, mɛɛ zhɛ mu na gɛga sasana ni ihwɛŋnɛ ya amɛ ụshɛpwụ Jɛrusalɛm, iwɛnɛ ta a inganjɛ tebiye. 5Miaụŋ-me-eyi na mu na mo o du kaa mi zhɛ mo shino ni ihwɛŋnɛ ya amɛ ụshɛpwụ ga, ɛɛ zhɛ na nanga tụlagwụ ni bɛ.

6Gana Gamba AGWANGWAMA na Hwuri Kpaaŋ, hiɛŋ na, Yaa shɛ yaa shanɛ tumwata ta atwa ga vwɛ iyi tudama na aka ata, i zhɛ suu ma n shana du iyi tudama, Gamba AGWANGWAMA na Hwuri Kpaaŋ? 7Gamba AGWANGWAMA na Hwuri Kpaaŋ, N hiɛŋ, Hioko, N zhɛ mo bicingo atwa mi ni i'ɛlɛ ya atwa cɛnjɛ tu uwaŋna-banụ keeni uwaŋna-twonuo. 8Ngɛɛ zhɛ me gwuricinje aŋ maa a nama na ashashɛ Jɛrusalɛm, nazhɛ ɛɛ zhɛ a sha atwa mi, Ngɛɛ zhɛ du ma sha Agwatana aba, na tɛcara keeni ne tiririri.

9Gana Gamba AGWANGWAMA na Hwuri Kpaaŋ jɛmɛ na, N hiɛŋ, Meme shi ma, 'yaga ma ikɛnyi ahiɛba na hiɛ hwụjɛ la n-ndumwa ma ata nu unu we egesere, te kwuni nụ ụjita ata ee shiri ukoshilo umwono wa AGWANGWAMA, iwɛ maa hi to tuhwulo tu umwono ata wa AGWANGWAMA tuma. 10I zasa la bụtụ be elele na eri bo gwushigo iyi nɛ waŋnɛ maa pana bụtụ kwo kaa usunda ehilo ụgwụ, nazhɛ aka ata ci o, i zasa kaa du bụtụ be elele na beni kwo kaa teni na eri ba banangana o, iwɛnɛ tu Ngaa njɛ maa bụtụ bụtụ ga sukakana uyebi ubwa. 11Ama Gamba AGWANGWAMA na Hwuri Kpaaŋ, N hiɛŋ, N zha shɛ ma nda tumwata ta atwa ga, gana ata Ngaa njɛ la atwa ata o. 12Iwɛnɛ po ɛ zhɛ a bila tibila ta aba na amɛ-olom, afwafwa aba zhɛ a 'wala, cɛnjɛ ta aba ti zhɛ ta kaana iyi tu'wala, Ngɛɛ zhɛ ma pana aŋ eshilo, nazhɛ ma nda maa tumwata ta atwa ga ti leshiji ewebiye ga kpaaŋ. 13Oo ahiɛba atwa Juda keeni atwa Isrɛl, hiɛ shɛ la iyi tutwa no ofwo edenji, ama N zhɛ mo hi bicingo maa ma hiɛ pana uwebiye. Ta nda ma inyɛsɛ o, ama shikono ma dimi.

14Gamba AGWANGWAMA na Hwuri Kpaaŋ, N hiɛŋ, Gana na ti Ngee heŋshi la maa ma hiɛ pana ulwapɛ, na aka na te eshi hiŋ ishicinjɛ la isɛbwɛ mi, Ngee sheyinji shi la kaa ahaŋsa mi. 15Gobwonu du Ngee heŋshi maa ma ndana atwa Jɛrusalɛm keeni atwa Juda iyi ibiye, ta nda ma inyɛsɛ o. 16Iyi nɛ ahiɛ shɛ hi na nda na, na duma ma iwɛ-tɛkana na anya hiŋ, na duma ma ụshɛrɛya u tishiriri nu umwono-ụshɛrɛya hiŋ, na nda ma iyi nɛ zhɛ ya karɛ amɛ-olom.#Ɛfɛ 4:25 17Ta haŋsa ma maa hi na mama ndanụ iyi iwɛ o, to lubo ma tuwa tu tukata tuta o. Gamba AGWANGWAMA, N hiɛŋ, Mo imo ijɛ ɛtɛ kpaaŋ.

Edenji a Jalakaka Agwatana nu Jɛrusalɛm

18AGWANGWAMA na Hwuri Kpaaŋ, jɛmɛ n-ndumwa ne mi sasana, bɛɛ hiɛŋ, 19Ezumi tɛnda nu upiana bineshi, tu upiana butana, tu upiana bicenje keeni upiana bu'umpwa, zhɛ ya shana atwa ihwɛ Juda aka bu unyasa keeni amɛ-olom. Nsono mi hiŋ du mi zhɛ ma sha nsono mu unyasa, iwɛbɛ po lubo ma iwɛ-tɛkana keeni amɛ-olom.

20Gana Gamba AGWANGWAMA na Hwuri Kpaaŋ, hiɛŋ na, N hiɛŋ, Aka zhɛ o to ta atwa na namɛ na ashɛpwụ a'wụtụ a'wụtụ anya zhɛ a zhagajɛ nu Jɛrusalɛm. 21Atwa na namɛ nụ ụshɛpwụ uko, zhɛ a zhagana anya, ɛ hiɛŋ aŋ, Mizha ti zhe ma maa tụ lụpɛ ma tulubo-ti-biye ta AGWANGWAMA maa tɛ zhɛbɛ ma AGWANGWAMA na Hwuri Kpaaŋ. N zhɛ du ma zha ni ikɛnyi mi. 22Atwa ofwugwo keeni edenji a na 'yajɛ ikɛnyi, zhɛ a zhajɛ Jɛrusalɛm maa a lụpɛ tulubo-ti-biye no olugwo AGWANGWAMA na Hwuri Kpaaŋ. 23Gana Gamba AGWANGWAMA na Hwuri Kpaaŋ, jɛmɛ na, N hiɛŋ, Aka ata ci hwuŋ, etwenyi umpwa zhɛ a banɛ na ashashɛ edenji keeni rɛjɛmɛ re elele, ɛɛ zhɛ o gbodongonu Biju bu ko gba, ɛ hiɛŋ bụ, Lono maa ta nama na bụ, iwɛnɛ ta tụ hwụjɛ maa Agwatana namɛ ne hiŋ.

Currently Selected:

ZƐKARIA 8: RBT

Highlight

Copy

Compare