ZƐKARIA 6

Ihɛŋtu Ujasa ineshi

1Ngaa mbiyanɛ sasana azuba, Ngaa kwụbɛ ihɛŋtu ujasa ineshi ti yaa banɛ no tuhwolu tu nshama mi yebi mu na mɛ shɛ ɛtumburɛ. 2Idɛkwɛ ishenje, ibɛ yo kokwulo ụhaŋtụ ata uko, idɛkwɛ ishi tuba yo kokwulo una uyebi.#N-ndu 6:4,5 3Idɛkwɛ icɛnjɛ, ibɛ yo kokwulo una ụtatụ, idɛkwɛ ubusubusu tuba yo kokwulo ụhaŋtụ uneshi. 4Nazhɛ Ngee unseni butumwa ata ba azuba, ba njɛ ne mi, Ngɛɛ hiɛŋ bụ, Imbe ihɛŋtu gɛ i shɛɛ?

5Bɛɛ n jishijɛ, bɛɛ hiɛŋ, Aba ganana a shɛ mpiala ma ata mu uvwugo mi neshi mu na mu banɛ na azuba, na aba na ti mee meme mbiseni na agba AGWANGWAMA na 'yajɛ cɛnjɛ tu unyizo kpaaŋ.#N-ndu 7:1

6Ụhaŋtụ ata idɛkwɛ ishi yo kokwulo, u zhɛ geri ba cɛnjɛ tu tuzuba, una ata idɛkwɛ icɛnjɛ yo kokwulo, u zhɛ geri ba cɛnjɛ tu uwaŋna-twonuo, una ata idɛkwɛ ubusubusu yo kokwulo, u zhɛ geri ba cɛnjɛ tu tuta. 7Aka na ti idɛkwɛ ɛtɛ ubusubusu nɛ kaa 'yajɛ ukpahiŋ banɛ, yaa njɛ izɛlɛgwu maa i rinji cɛnjɛ tu unyizo. Nazhɛ butumwa ata hiɛŋ iŋ, Zhaga hikokono ma cɛnjɛ tu unyizo hwɛɛ. Yee zhe yee hikekeni tu ga hwɛɛ. 8Nazhɛ baa n ugananɛ, bɛɛ hiɛŋ, Kwụba idɛkwɛ ye zhɛ geri ba cɛnjɛ tu tuzuba, i gwuriseni isɛbwɛ ya AGWANGWAMA#6:8 isɛbwɛ ya AGWANGWAMA: Kwo kaa mpiala, kwo kaa Mpiala ma AGWANGWAMA. na cɛnjɛ ta ata tu tuzuba.

E Peteni Joshua Udara

9Nazhɛ AGWANGWAMA m mbishi iwɛ, bɛɛ hiɛŋ, 10Lashaga azụrụfa keeni azhɛnarɛya no olugwo atwa ata banɛ na ti'ima tu Babulon jiye, aba shɛ ga Hɛldai, no Tobija keeni Jɛdaya, maa zhe ni ihwɛ Josia yɛu Zɛfania gunu ụjita ata. 11Sugo azụrụfa na azhɛnarɛya ata, nda udara#6:11,14 udara: Kwo kaa, adara. maa peteni Joshua yɛu Jehozadak na shɛ uhiu wo onongbo nu uhiuhiu. 12Hiɛŋ bụ, Gana AGWANGWAMA na Hwuri Kpaaŋ jɛmɛ na, bi hiɛŋ, Bụtụ ata ɛɛ hiɛŋ izeci ibwɛ, A'wa'walụ, bi zhɛ ba bubaga no ofwo na baa namɛ, maa ma umwono wa AGWANGWAMA.#Jɛrɛ 23:5; 33:15; Zɛka 3:8 13Ubwa shɛ bụtụ na zhɛ ba ma umwono wa AGWANGWAMA, ubwa du kaa zhɛ ba lashɛga ụjɛrụma na teni cɛŋ na agwuma, bɛɛ zhɛ ba untangana atwa ubwa ni idwɛtwɛ ibwɛ. Bunongbo ata zhɛ bo shikono ni idwɛtwɛ ibwɛ, ebeyebi ata zhɛ a nda ugondu na amɛ-olom. 14Ɛ zhɛ ne teyinje udara ga nu umwono ata wa AGWANGWAMA, maa tuba ụ shɛ ụjɛrụma ata Hɛldai no Tobija, nɛ Jɛdaya keeni Josia yɛu Zɛfania. 15Atwa na namɛ taa dụlụ zhɛ a zhagajɛ maa e mbiyeni aŋ umwono ata wa AGWANGWAMA tuma. Aka na oo mo uŋ ee hwuwi, nazhɛ ɛhi zhɛ hia mapa maa AGWANGWAMA na Hwuri Kpaaŋ ubwa n tumwanɛ no ofwo hiŋ. Ijɛ zhɛ ya nda ti yaa shɛ ahiɛ hwụjɛ-unu wa AGWANGWAMA na shɛ Agwatana hiŋ tebiye.

Currently Selected:

ZƐKARIA 6: RBT

Highlight

Copy

Compare