ROM TƐKAPƐSHƐNGA TI IYI NƐ ZWENI NU UTAKADA GA ROM
TƐKAPƐSHƐNGA TI IYI NƐ ZWENI NU UTAKADA GA ROM
Utakada ga go Poul 'nyeteni Orom, ụ shɛ ti'imanganga tu bwa tu na baa jala maa zha maa u kwụba tụ'ụlwa-tụ-ụhiɛŋshɛ-Agwangwama tu Rom. Tuhaŋsa tu bwa tɛ shɛ iwɛ maa nda ugondu na ashashɛ atwa Krast a na namɛ apata na aka fwalaa, nazhɛ e mbiyeni bu maa hwulo ya Sipen. Bi 'nyeteni aŋ maa mbisono aŋ gana na bee eshiciji iwɛ rishe ra atwa Krast tɛtɛtana, keeni tɛnda ta aba tu na tɛ bɛcinjɛ tunama ta araiŋ atwa Krast. Pa'ụtụ iyi nɛ zweni nu utakada ga, i shɛ tụ'ụrɛcɛnga tu n-ndumwa mi i'enenji Poul.
Na aba na tu go Poul 'walụ tụ'ụlwa-tụ-ụhiɛŋshɛ-Agwangwama tu Rom, nazhɛ boo to tuhwulo boo mbiso aŋ du iwɛ adua na baa ndana aŋ. Nazhɛ baa duma du ya iwɛ ecilo utakada na bee 'nyeteni aŋ. Anabarɛ Ebiye a kapɛshɛnga gana na ta Agwatana peni atwa n-ndumwa zhɛ iwɛ ikɛnyi ibwɛ. Ibɛ shɛ tedure ne rishe-tɛtɛtana, te kwuni taa nu umozhingo tutu ukwụnanga (1:17).
Go Poul keeni ecilo ibɛ tubaburunga, maa ukekeshi n-ndumwa-zhɛ na agba Agwatana to bụtụ be elele, te Eju, ta atwa na shɛ shɛ Eju, iwɛnɛ po kpaaŋ aba zweni nu ukpahiŋ iwɛwɛ. Ama tedure rishe ru na atwa tɛtanɛ Jisus Krast, ibɛ kiri eri ya pana aŋ n-ndumwa-zhɛ na agba Agwatana. Inɛɛ nɛ 'wa iŋ, i shɛ gana na go Poul bo eshicigono aŋ iwɛ uraiŋ na atwa 'yajɛ tedure ni ikpɛngwu nɛ atwa twa na Krast, ibɛ shɛ tedure nu ụmatụ ufwo na atwa 'yajɛ na Agwatana. Butɛtanɛ-be-rishe be elele 'yajɛ ya amɛ-olom na Agwatana, ibɛ po Mpiala ma Agwatana kaa du mu tufwurinji bụtụ be elele na tɛtanɛ-rishe, maa bana nu ukpahiŋ iwɛwɛ, keeni una tu'wo. Go Poul du ba dumanana nu uhiuhiu 5-8 iwɛ ecilo Undwa, keeni ukpahiŋ Mpiala ma Agwatana mu na mu namɛ nu uraiŋ butɛtanɛ-be-rishe be elele. Nazhɛ butumwa ga ba shana ikɛnyi ni iheŋtene iwɛ gana na Eju na atwa na shɛ shɛ Eju eri o tono cɛŋ maa e teni ni iyi nɛ Agwatana imanganɛ butugwumwa. Nazhɛ baa kwụnanjɛ mụ, bɛɛ hiɛŋ, Tulaka tu na Eju lacɛ Jisus, tɛ shɛ ụpadụ ti'imanganga ta Agwatana maa tuba meme sugeni atwa elele, tedure nu ugombo tulubo tu bwa ti biye tu na tu namɛ na amɛ Jisus Krast. Baa tɛtanɛ kaa du rishe maa Eju zha shɛ a uranga Jisus tulaka tutu o. Go Poul 'nyeci nu ukwunanga gana na atwa Krast shɛ a na nama uraiŋ. Ticinji ti ibɛ tɛ shɛ iwɛ uhwaŋna tulubo tu na tɛ shɛ ta nama nu ụmatụ wa aba na anya aba. Ibɛ po bee shepi ecilo n-ndumwa ma ata maa ga mɛ shɛ iwɛ ugondu tɛndana Agwatana, ni iyi nɛ atwa Krast a shɛ a nda no ofwo na aa namanjɛ, keeni gana na aa shɛ a na mama ndanụ, keeni iwɛ iheŋtene nɛ namɛ na ahaŋsa bụtụ. Nazhɛ baa kwunanjɛ ya utakada ubwa nu n-ndumwa mu na baa jɛmɛ na bụtụ bụtụ keeni n-ndumwa ma ashɛtwa Agwatana.
Tudwotwogonu ti iyi nɛ zweni nu utakada ga na:
Tɛkapɛshɛnga ti iyi, keeni ecilo iyi 1:1-17
Ukekeshi ubino na to butugwumwa 1:18—3:20
Uhwaŋna wa Agwatana iwɛ ubino 3:21—4:25
Uraiŋ ufwo na namɛ na amɛ Krast 5:1—8:39
Atwa Isrɛl zweni na ti'imanganga ta Agwatana 9:1—11:36
Masha mu na atwa Krast shɛ a sha 12:1—15:13
Tukwunanga keeni a'walụ na baa 'walụ bụtụ bụtụ 15:14—16:27
Currently Selected:
ROM TƐKAPƐSHƐNGA TI IYI NƐ ZWENI NU UTAKADA GA ROM: RBT
Highlight
Share
Copy
Want to have your highlights saved across all your devices? Sign up or sign in
Rubassa Bible © Bible Society of Nigeria, 2008