ROM 10

1A-miaụŋ-mo-bino mi na amɛ Krast, iyi nɛ n kwụlanɛ na amɛ mi, keeni tutabwa tu na Ama tabwa Agwatana i shɛ iwɛ maa e biciŋji aŋ. 2Iwɛnɛ po Ma la aŋ tiseyida maa a zhɛgɛdanɛ iwɛ ya Agwatana, ama e mepi shi ijiji tebiye o. 3Gana na te e mepi shi tiririri ta Agwatana, ibɛ po aa jalakaka maa e shikicinji tiririri ta aba dimi, iwɛnɛ te e leni shi maa Agwatana 'yaga ụhwada wa aba ne tiririri tu bwa. 4Ga Krast ubwa shɛ ukwunanga Undwa, iwɛ maa tiririri tu namana bụtụ be elele na tɛtanɛ-rishe.

Bụtụ be Elele na ba Suyana Izeci ya Agwangwama bi Zhɛ bo Bino

5Go Moses 'nyeci, bɛɛ hiɛŋ, Bụtụ na ba nda tiririri tu na tu banɛ nu Undwa, bi zhɛ ba ya uraiŋ na tuba.#Liv 18:5 6Ama tiririri tu na tu banɛ ne rishe-tɛtɛtana ta duma, tɛɛ hiɛŋ, Ta duma na ahaŋsa bu maa, Gaaba zhɛ bo mungo na azubaa? (Ibɛ po ee zucinje Krast); #Undwa 30:12-14 7kwo kaa maa hiɛŋ, Gaaba zhɛ bo zwo ne e'uyee? (Ibɛ po ɛɛ vwɛ Krast no olugwo atwa na uwo). 8Asha imbe yɛɛ hiɛŋ yaa? I hiɛŋ, n-ndumwa ma ata mu gwumwongonu nu unu bu, keeni amɛ bụ, (ibɛ shɛ n-ndumwa me rishe-tɛtɛtana mu na ata ananga); 9maa yaa shɛ ebi leni nu unu bu maa ge Jisus ubwa shɛ Agwangwama, abu tɛtanɛ kaa rishe na amɛ bụ maa Agwatana hicinji bụ no tu'wo, asha ɛ zhɛ mo bu bicingo. 10Iwɛnɛ po na amɛ, bụtụ ba tɛtana-rishe nazhɛ aa pana bu n-ndumwa-zhɛ, nu unu kaa, bụtụ bo lono nazhɛ boo bino. 11Utakada Iwɛ ya Agwatana hiɛŋ, Bụtụ be elele na tɛtanɛ bu rishe, ezuye zha shɛ a sha bu o.#Ayiz 28:16 12Biju na bụtụ na shɛ shɛ Biju zasa swoswoswo; iwɛnɛ ti yaa shɛ Agwangwama ata oko gba ubwa shɛ Agwangwama aba hwɛɛ, ubwa kaa shɛ bɛzhɛgba na ba pana atwa na a suyana bụ uwebiye. 13Bụtụ be elele na ba suyana Agwangwama, ɛ zhɛ o bicingo bu.#Joɛl 2:32

14Ama gana naa ɛɛ zhɛ a suyana bụtụ na aa ta tɛtanɛ shɛ rishe maa mbiyono aaŋ? Gana naa ɛɛ zhɛ a tɛtana bụtụ na aa ta hwụjɛ shɛ iwɛ ubwa rishee? Gana naa ɛɛ zhɛ a hwuga uzawa bi'enenjii? 15Gana naa ɛɛ zhɛ a ananga ta a ta tumwanɛ shɛ aaŋ? Gana na te e 'nyeci, ɛɛ hiɛŋ, Hioko ma gana na tizhajɛ ta atwa na a anangana atwa anabarɛ ebiye tu pilanụ.#Ayiz 52:7 16Ama shɛ hwɛ hwɛɛ aba shɛlajɛ anabarɛ ata ebiye o. Ga Ayizaya hiɛŋ, Agwangwama, gaaba tɛtanɛ unabarɛ na ata ananga rishee? #Ayiz 53:1 17Iwɛ-tɛkana, rishe-tɛtɛtana ra banɛ na anabarɛ tuhwuga, anabarɛ tuhwuga kaa a banɛ nu n-ndumwa mu Krast tu'ananga.

18Ama N hiɛŋ, A hwụjɛ shɛ suu? Iiŋ, a hwụjɛ gom, iwɛnɛ tu utakada Iwɛ ya Agwatana hiɛŋ.

Rụhwụ ra aba ri beni ree teni nu unyizo kpaaŋ,

n-ndumwa ma aba kaa mu beni mee teni tutu uce ofwo na atwa namɛ.#Shɛzu 19:4

19Ama N hiɛŋ, Atwa Isrɛl mepi shi maa? Hiiŋ, go Moses ni ikɛnyi ibwɛ hiɛŋ,

N zhɛ mo sugo atwa na shɛ shɛ udenji maa Mo hi vwundo shɛmɛ

maa hi 'yaga isɛbwɛ.

Udenji na eshiciji shi iyi, ubwa kaa Ngɛɛ zhɛ ma nda maa atwa mi

'yaga isɛbwɛ.#Undwa 32:21

20Ama ga Ayizaya jɛmɛ n-ndumwa ne eshe-hwoo a'wụtụ, bɛɛ hiɛŋ,

Atwa na n jelekeci shi, aba n towo ugbe,

Ngaa bananɛ kaa atwa na heŋteni shi iwe mi upeje.#Ayiz 65:1

21Ama bɛ jɛmɛ iwɛ atwa Isrɛl, bɛɛ hiɛŋ, Taa ti iyi ge heri hwayɛ, Ngee nderishiŋgeni atwa na hwụjɛ shɛ unu keeni anjɛ-ashamanjɛ i'ɛlɛ mi maa ma ruwanɛ aŋ.#Ayiz 65:2

Currently Selected:

ROM 10: RBT

Highlight

Copy