LIVAI 5

Iyi nɛ Aa Shɛ a Ta Ụrụpɛ iwɛ Iwɛwɛ Tiseyida

1Yaa shɛ aa suyanɛ bụtụ be elele no ofwo n-ndumwa maa duma tiseyida ti iyi nɛ baa kwụbɛ kwo kaa iyi nɛ baa hwụjɛ, yaa shɛ baa jɛmɛ shɛ iwɛ-tɛkana ibɛ tebiye, asha ubwa zhɛ ba 'waŋna ulwapɛ ibɛ. 2Kwo kaa yaa shɛ bụtụ be elele timengeni iyi nɛ hashɛganụ okwo yaa shɛ ru'wo ru usunda-ehilo ru na ru hashɛganụ, kwo kaa ru'wo ri iyimabiga nɛ hashɛganụ, kwo kaa ru'wo ri iyi nɛ yo hombilo na cɛnjɛ, nɛ hashɛganụ, okwo bee ge mepi shi, asha bɛ shɛ waa bụtụ na hashɛganụ. N-ndumwa mụ wụmɛ bụ tilɛɛ.

3Okwo yaa shɛ bee timengeni iyi elele nɛ namɛ na tu'waba ta bụtụ na hashɛganụ, bee mepi shi kaa, ama aka na ti bee mepi ya, asha bu suji waa tụwụma ti ibɛ.

4Okwo yaa shɛ bụtụ to-tuwa kwakwa maa bi zhɛ ba nda iyi iwɛ kwo kaa iyi ibiye, ti bee ge mepi shi iŋ kaa, ama aka na bee mepi iŋ ya, asha bu suji tụwụma ti ibɛ.

5Aka na ta bụtụ suji tụwụma ti iyi elele, go lono-unu iwɛwɛ ɛtɛ baa njɛ. 6Ga 'waŋnanɛ AGWANGWAMA yɛu-ụgwụdụ yo o kwo kaa biywoywo bo o iwɛ ulwapɛ iwɛwɛ ɛtɛ ibwɛ. Go bunongbo to bu ụrụpɛ iwɛ iwɛwɛ ibwɛ.

7Ama yaa shɛ ikɛnyi bụtụ ata ci shi yɛu-ụgwụdụ, asha ga 'waŋnanɛ AGWANGWAMA nkwucimo mi yebi kwo kaa oywoywo olukwukwu eyebi, iwɛ ụrụpɛ tụwụma tu bwa iwɛ iwɛwɛ ɛtɛ baa njɛ. Bu ko shɛ iwɛ ụrụpɛ iwɛwɛ, bu na bi yebi shɛ iwɛ ụrụpɛ tuhwoŋzhingo. 8Ge suje aŋ no ofwo bunongbo ata na kaa zhɛ ba shapa bu na ata bi hiiŋ maa pana ụrụpɛ iwɛ iwɛwɛ. Go pingo i'ilu ibwɛ maa dwonu iŋ, ama kede mushingo uhiuhiu ubwa hwɛɛ o. 9Go zhizhongo mehieŋ ma ata mi iyi ụrụpɛ iwɛwɛ mu ko na bụ'aŋbụ bu utukwu-ụrụpɛ, go pilo mehieŋ ma ata mụ vwɛ maa mi ngbenji nu uvwi utukwu-ụrụpɛ, ụ shɛ ụrụpɛ iwɛ iwɛwɛ. 10Nazhɛ bɛɛ zhɛ ba shapa bu na ata bi yebi maa ta ụrụpɛ tuhwoŋzhingo nu bwa, maa nda gana na tu undwa ibɛ ụ shɛ hwɛɛ. Go bunongbo to bu ụrụpɛ iwɛ iwɛwɛ ɛtɛ baa njɛ, ɛ zhɛ kaa a gangana bụ iwɛwɛ ibwɛ.

11Ama yaa shɛ ikɛnyi bụtụ ata ci shi nkwucimo mi yebi kwo kaa olukwukwu eyebi, asha ga 'waŋnɛ mihiuŋ mi tilee lee ne bimenji bi ikwureni bugongo bu ko maa o to ụrụpɛ iwɛwɛ ɛtɛ baa njɛ. Kede e zweni mu manɛbɛ ma buta o, kede kaa e zweni mu iturɛre frankinsɛns o, iwɛnɛ tu waa shɛ ụrụpɛ iwɛwɛ. 12Ga shapa mụ no ofwo bunongbo maa bunongbo ata seri mu nu u'ala ubwa pwomuu maa patana mụ na azuba utukwu-ụrụpɛ maa hwoŋzhingono mu AGWANGWAMA nu ulwa, maa i shɛ iyi titeyinje tu bwa. Ụ shɛ ụrụpɛ iwɛwɛ. 13Gana bunongbo zhɛ ba ta bụ ụrụpɛ iwɛ iwɛwɛ elele nɛ baa njɛ ta. Ɛ zhɛ kaa a gangana bụ iwɛwɛ ibwɛ. Mu na ata mụ vwɛ mi zhɛ ma sha mu na mo bunongbo, gana na aa nda nụ ụrụpɛ iyimɛyɛ.

Undwa iwɛ Ụrụpɛ Tụwụma

14Nazhɛ AGWANGWAMA hiɛŋ Moses, 15Yaa shɛ bụtụ be elele njɛ iwɛwɛ, bee pindeni iyi tijilo ya AGWANGWAMA nu umepiteshi, ga bụtụ ata 'waŋnanɛ AGWANGWAMA udagba kwo kaa biywoywo na zasa tụsụnyasụ iwɛ ụrụpɛ tụwụma tu bwa. Ga imanga ulumo ukwuribi ubwa te teni cɛŋ gana na tu ulumo ukwuribi wo ohwolu tijilo namɛ, iwɛ tụwụma tu bwa. 16Ga tụpa ijɛ ɛtɛ tijilo bee ge pindeni, ga patana iyi itana ni ibɛ maa pana bunongbo. Nazhɛ bunongbo ata zhɛ ba ta bụ ụrụpɛ nu udagba ata iwɛ tụwụma tu bwa, nazhɛ ɛɛ zhɛ a gangana bụ iwɛwɛ ibwɛ.

17Yaa shɛ bụtụ be elele pindeni iyi ike na amɛ iyi nɛ AGWANGWAMA ge peni-unu maa i shɛ shɛ ya nda o, bụtụ bu ko kaa njɛ iwɛwɛ ɛtɛ, okwo yaa shɛ bee ge mepi shi iŋ, bu suji waa tụwụma ti ibɛ. Bi zhɛ kaa ba 'waŋna ulwapɛ ibɛ. 18Ga 'waŋnanɛ bunongbo udagba kwo kaa biywoywo na zasa tụsụnyasụ. Ga imanga ulumo iyi ụrụpɛ tụwụma tu bwa, maa bunongbo to bu ụrụpɛ iwɛ iyi iwɛ ɛtɛ baa ga njɛ nu umepiteshi, nazhɛ ɛɛ zhɛ a gangana bụ iwɛwɛ ibwɛ. 19Inɛ ɛtɛ i shɛ ụrụpɛ tụwụma tu na bee ge suji#5:19 tụwụma tu na bee ge suji: Ibɛ i shɛ gana ulwapɛ tɛnda iwɛ tu'wanga tu bwa, maa ba nangana iyi nɛ baa njɛ teni shi cɛŋ. na agba AGWANGWAMA.

Currently Selected:

LIVAI 5: RBT

Highlight

Copy