LIVAI 17

Undwa iwɛ Arụpɛ Ticinji

1Nazhɛ AGWANGWAMA hiɛŋ Moses, 2Hiɛŋ Aron keeni miaụŋ mu bwa me eyi, keeni atwa Isrɛl hwɛɛ maa, Iyi nɛ AGWANGWAMA ihi peni-unu ibɛ nɛ maa, 3Yaa shɛ bụtụ bi ihwɛ Isrɛl be elele kwụnɛ buna kwo kaa yɛu-ụgwụdụ kwo kaa biywoywo na amɛ ugba tu'ulwatagwụ, kwo kaa baa kwụnɛ bụ no tupohondo tu ugba tu'ulwatagwụ, 4ti bee shepi shi bu maa zha no odubo udulo tu'ulwatagwụ, maa pana AGWANGWAMA ụrụpɛ nu umbe udulo wa AGWANGWAMA, tụwụma te mehieŋ ti zhɛ ta patana bụtụ ata 'wɛŋ mehieŋ ma ata. Ge becinji bụtụ ata na ashashɛ atwa ubwa. 5Ecilo inɛ gɛ i shɛ maa ga atwa Isrɛl genji ya iyi ya arụpɛ aba a na a ga shɛla la na ambɛ, maa e ne suje aŋ ya pa AGWANGWAMA no ofwo bunongbo no odubo udulo tu'ulwatagwụ, maa a shɛrɛ aŋ apata, maa a shɛ arụpɛ amɛ-olom no ofwo AGWANGWAMA. 6Go bunongbo zhizhenji mehieŋ ma ata nu utukwu-ụrụpɛ wa AGWANGWAMA, no odubo udulo tu'ulwatagwụ, maa hwoŋzhingo manɛbɛ ma ata mu bwa maa mu shanɛ AGWANGWAMA ụhiụŋ ụlatụ. 7Iwɛ ecilo ga ibɛ po atwa Isrɛl zha shɛ o jinoko ya AGWANGWAMA aba maa a na kwụnanga atumwa-ibiri iyi ya arụpɛ aba sasana, gana na aa ga nda la na aka na ta a 'watatagwụ aŋ. Ga atwa Isrɛl kaa untangana undwa ga no ofwo elele na awaŋnɛ aba teje unyizo-nom.

8Mbiso aŋ maa, Bụtụ bi Isrɛl be elele, kwo kaa bugaiŋ na ba nda ụlashɛ na ashashɛ hiŋ, na kaa to ụrụpɛ tuhwoŋzhingo, kwo kaa ụrụpɛ unya, 9bee shepi shi uŋ no odubo udulo tu'ulwatagwụ, maa ta ụrụpɛ ata pa AGWANGWAMA. Ɛ zhɛ a bacɛnga bụtụ ata na atwa ubwa.

10Yaa shɛ bụtụ be elele ni Isrɛl, kwo kaa bugaiŋ na ba nda ụlashɛ na ashashɛ aba yɛ usunda we elele te mehieŋ mu bwa, amɛ mi zhɛ a hashɛganụ na bụtụ ata. Ge becinji bu kaa na ashashɛ atwa ubwa.#Umoz 9:4; Liv 7:26,27; 19:26; Undwa 12:16,23; 15:23 11Iwɛnɛ po uraiŋ iyi-uumwa ye elele namɛ na amɛ mehieŋ. N hi peni mu kaa maa hi na ta ụrụpɛ iwɛwɛ tugangana na azuba utukwu-ụrụpɛ, iwɛ shihwulu shi hiŋ. Muba mɛ shɛ mehieŋ mu na aa ta ụrụpɛ iwɛ iwɛwɛ ya atwa tugangana.#Ehib 9:22 12Iwɛbɛ po Ngɛɛ hiɛŋ atwa Isrɛl, I zasa bụtụ na namɛ na ashashɛ hiŋ zhɛ ba ya mehieŋ o, okwo bugaiŋ na ba nda ụlashɛ na ashashɛ hiŋ, zha shɛ ba ya mehieŋ kwukwuŋ o.

13Bụtụ be elele du kaa na ashashɛ atwa Isrɛl, kwo kaa bugaiŋ na ba nda ụlashɛ na ashashɛ aba, na kwụnɛ usunda, kwo kaa ụnụnụ na aa ya nu ujala, ga 'waŋ mehieŋ mu bwa, maa urogono mu upwupwutu. 14Iwɛnɛ po uraiŋ iyi elele nɛ aa karɛ namɛ ne mehieŋ mi ibɛ. Iwɛbɛ po Ngɛɛ hiɛŋ atwa Isrɛl, Ta ya ma mehieŋ mi iyi elele nɛ aa karɛ o. Bụtụ be elele na yɛ mụ, ge becinji bu na ashashɛ atwa ubwa.

15Bụtụ be elele na kaa yɛ iyi nɛ meme 'weji kwo kaa iyi nɛ usunda-ehilo kwụnɛ, okwo baa ga shɛ umamata, kwo kaa bụlashɛ, ga nyashɛnga tugwuno tu bwa, maa dula meni, bi zhɛ kaa ba hashɛganụ tutu ụrụmɛ. Nazhɛ bɛɛ zhɛ ba nama ya shɛshɛshɛ. 16Ama yaa shɛ baa nyashɛnjɛ shɛ tụ, kwo kaa baa dụrɛ shɛ meni, ubwa zhɛ ba 'waŋna tijama ti iyi iwɛ ibwɛ.

Currently Selected:

LIVAI 17: RBT

Highlight

Copy