LIVAI 13

Undwa iwɛ Igwumɛgwumɛ nɛ ya Nama na Tu'waba

1Nazhɛ AGWANGWAMA hiɛŋ Moses keeni Aron, 2Aka na ta tu'waba ta bụtụ ti shɛŋ no ofwo oko, kwo kaa tụbagatagwụ, kwo kaa tishonjomo, aa shɛ ya gana ụngwụ-uwaŋna, na tu'waba tu bwa, asha ge shepi bu no ofwo Aron na shɛ bunongbo, kwo kaa no ofwo yɛu ibwɛ ye eyi ike nɛ shɛ bunongbo. 3Go bunongbo ata hikeni ofwo ata ụngwụ ata ushenje namɛ na tu'waba ta bụtụ ata. Yaa shɛ tihiŋzhe to ofwo ata ụngwụ ata ushenje namɛ tɛ shɛ tɛ cɛnjɛ, ụngwụ ata kaa shɛ gana maa u iri, wee keshici tu'waba tu bwa ta azuba, asha ụngwụ-uwaŋna#13:3 ụngwụ-uwaŋna: udenji uko wa duma rɛjɛmɛ ru ga nụ ụngwụ ufwugwo swoswoswo na wa nama bụtụ na tu'waba, asha kaa shɛ kpaaŋ ubwa ụ shɛ ụngwụ-uwaŋna gom o, keeni ofwo swoswoswo nu uhiuhiu ga. waa shɛ. Aka na to bunongbo hikeni bu, baa kwụbɛ maa ụngwụ-uwaŋna waa shɛ, asha gɛ hiɛŋ bụ, Bu hashɛganụ. 4Ama yaa shɛ tutagana ta ata tɛ cɛnjɛ ta azuba tu'waba tu bwa, ti iri shi maa ti keshici tu'waba tu bwa ta azuba, tihiŋzhe to ofwo ata kaa tɛ shɛ shɛ tɛ cɛnjɛ, go bunongbo kepi bụtụ ata na 'yajɛ ụngwụ ata nu umwono ijitɛ icenje. 5Yaa shɛ ijitɛ ɛtɛ icenje ulwa, go bunongbo hikeni bu nụ ụjita ata ucenje, yaa shɛ bee yeleji ụngwụ ata, woo mburusonu su nu u'waba ubwa, asha go bunongbo keeni bu tukapa ijitɛ icenje inyɛ. 6Yaa shɛ ijitɛ ɛtɛ icenje inyɛ ulwa, go bunongbo hikeni bu sasana nụ ụjita ata ucenje, yaa shɛ kaa ụngwụ ata u tutagana kwuni tu'wogogo, woo mburusonu su na tu'waba tu bwa, asha go bunongbo hiɛŋ bụ, Bu namɛ shɛshɛshɛ; asha tụbagatagwụ kwakwa yaa shɛ. Ga nyashɛnga tugwuno tu bwa, bi zhɛ kaa ba nama shɛshɛshɛ. 7Ama yaa shɛ tụbagatagwụ ta ata tu mburusonu nu u'waba ubwa, na aba na tu boo momo mbiswonuo bunongbo iwɛ tɛnyashɛnga tu bwa, bɛ shɛ ba zhajɛ sasana nu umbe bunongbo. 8Go bunongbo ata hikeni bu, yaa shɛ kaa tụbagatagwụ ta ata tu mburusonu nu u'waba ubwa, asha go bunongbo ata hiɛŋ bụ, Bu hashɛganụ; asha ụngwụ-uwaŋna waa shɛ.

9Aka na ta bụtụ 'yajɛ iyi ike nɛ i shɛ gana ụngwụ-uwaŋna, ga a shapɛ bụ no ofwo bunongbo. 10Go bunongbo hikeni bu, yaa shɛ kaa ofwo ata i shɛŋ a cɛnjɛmɛ nu u'waba ubwa, ee sheyinji kaa tihiŋzhe ta apata taa cɛnjɛmɛ, usunda-tu'waba ubwa wa apata kaa wa ta longolongo, 11asha ụngwụ-uwaŋna ụngwụshɛ ubwa namɛ nu u'waba ubwa. Go bunongbo hiɛŋ bụ, Bu hashɛganụ. Bi zha shɛ ba kapa bụ ya o, iwɛnɛ tu baa hashɛganawaŋ. 12Yaa shɛ kaa bunongbo ata kwụbɛ ụngwụ ata tu woo mburusonu, woo rungwutwonu nu u'waba ubwa, te kwune nu uhiuhiu i ci ɛvwɛvwɛjɛ ubwa, waa cɛnjɛmɛ kaa, 13asha go bunongbo ata hikeni bu, yaa shɛ kaa ụngwụ ata rungwutwonu u'waba ubwa hwɛɛ, bi zhɛ bɛ hiɛŋ bụ, Bu hashɛganụ sụ nụ ụngwụ ata o; iwɛnɛ waa cɛnjɛmɛ hwɛɛ bwa, asha bu namɛ ya shɛshɛshɛ. 14Ama aka na ta tu'waba tu tulongolongo tu mwe na tu'waba tu bwa, asha bu hashɛganụ. 15Go bunongbo ata hikeni tu'waba ta ata tu tulongolongo, gɛ hiɛŋ bụ, Bu hashɛganụ. Tu'waba ta ata tu tulongolongo tu hashɛganụ, ụngwụ-uwaŋna ta. 16Ama yaa shɛ tu'waba to ofwo ata namɛ longolongo ti sheyinji sasana, taa shɛ tɛ cɛnjɛ, asha ga zha no ofwo bunongbo. 17Go bunongbo hikeni bu. Yaa shɛ ụngwụ ata kaa sheyinji, waa shɛ ụcɛnjɛ, asha go bunongbo hiɛŋ bụtụ ata 'yajɛ ụngwụ ata maa, Bu namɛ shɛshɛshɛ.

18Yaa shɛ utwa to bụtụ wee 'wi, 19ofwo ata utwa ata ga namɛ kaa shɛŋ, aa cɛnjɛmɛ kwo kaa ụcɛnjɛ wa aba ụ shɛ gana ushenje, asha ge mbiseni bunongbo. 20Go bunongbo hikeni bu, yaa shɛ yee iri keshici tu'waba ta azuba, tihiŋzhe to ofwo ata kaa ti sheyinji, taa shɛ tɛ cɛnjɛ, asha go bunongbo hiɛŋ bụ, Bu hashɛganụ, asha undala ụngwụ-uwaŋna ubwa mwe no ofwo utwa ata. 21Ama yaa shɛ bunongbo hikeni uŋ, tihiŋzhe ta apata kaa tɛ cɛnjɛmɛ shɛ, yee iri shi kaa maa keshici tu'waba ta azuba, ama yoo 'wogogo, asha go bunongbo kepi bu ijitɛ icenje. 22Yaa shɛ yoo mburusonu nu u'waba ubwa, asha go bunongbo hiɛŋ bụ, Bu hashɛganụ, asha ụngwụ ta. 23Ama yaa shɛ tutagana ta ata ti shenje tu namɛ urubwo uko uko, woo mburusonu su, asha udomu utwa ata ta. Go bunongbo hiɛŋ bụ, Bu namɛ shɛshɛshɛ.

24Aka na ta bụtụ hwoŋni, tu'waba ti shenje tu na tụ sụbɛ ma tɛ tɛ cɛnjɛ, kwo kaa ma tɛ tɛ cɛnjɛ gom tu mwe, 25go bunongbo hikeni uŋ, yaa shɛ kaa tihiŋzhe to ofwo ata ti sheyinji, taa shɛ tɛ cɛnjɛ, tee iri kaa keshici tu'waba ta azuba, asha ụngwụ-uwaŋna ubwa mwe no ofwo tuhwoŋtu ta ata. Go bunongbo hiɛŋ bụ, Bu hashɛganụ; asha ụngwụ ta. 26Ama yaa shɛ bunongbo hikeni uŋ, tihiŋzhe ta tutagana ta ata tɛ shɛ shɛ tɛ cɛnjɛ, tee iri shi kaa maa ti keshici tu'waba ta azuba, ama to o 'wogogo. Go bunongbo kepi bu ijitɛ icenje. 27Bunongbo kaa zhɛ bo hikono bu nụ ụjita ata ucenje. Yaa shɛ woo mburusonu nu u'waba ubwa, asha go bunongbo hiɛŋ bụ, Bu hashɛganụ; asha ụngwụ-uwaŋna waa shɛ. 28Ama yaa shɛ tutagana ta ata tu namɛ urubwo uko uko, too mburusonu su nu u'waba ubwa, ama too 'wogogo, asha tishɛŋ to tuhwoŋtu tu ta. Go bunongbo hiɛŋ bụ, Bu namɛ shɛshɛshɛ. Inɛ ɛtɛ shɛ udomu tuhwoŋtu ta.

29Aka na tụ ụngwụ patanɛ butubwenyi kwo kaa biyikwo nu uhiuhiu kwo kaa ni izhekwu, 30go bunongbo hikeni ụngwụ ata. Yaa shɛ kaa wee iri te keshici tu'waba ta azuba, tihiŋzhe to ofwo ata kaa tɛ shɛ ushenje ubokwori, taa namɛ dere dere, asha go bunongbo hiɛŋ bụ, Bu hashɛganụ. Asha ukwuru ta, ụngwụ-uwaŋna uhiuhiu kwo kaa una izhekwu ta. 31Yaa shɛ kaa bunongbo ba manga ụngwụ ukwuru, wee iri shi te keshici tu'waba ta azuba, waa zasa kaa tihiŋzhe ti shi, asha go bunongbo kepi bụtụ na 'yajɛ ụngwụ ata ukwuru tutu ijitɛ icenje. 32Go bunongbo hikeni ụngwụ ata nụ ụjita ata ucenje. Yaa shɛ kaa ukwuru ata mburusonu su, apata kaa zasa tihiŋzhe tu ushenje ubokwori, ukwuru ata kaa iri shi te keshici tu'waba ta azuba, 33asha ga mama 'nyanga, ama kede 'nyanga ofwo ata ukwuru ata namɛ o. Go bunongbo keeni bu tukapa ijitɛ icenje inyɛ. 34Go bunongbo hikeni ukwuru ata, nụ ụjita ata ucenje, yaa shɛ ukwuru ata mburusonu su nu u'waba ubwa, wee iri shi kaa te keshici tu'waba ta azuba, asha go bunongbo hiɛŋ bụ, Bu namɛ shɛshɛshɛ. Nazhɛ bɛɛ zhɛ ba nyashɛnga tugwuno tu bwa maa nama shɛshɛshɛ. 35Ama yaa shɛ ukwuru ata mburusonu nu u'waba ubwa, na aba na tu baa mama nyashɛngwa, 36asha go bunongbo hikeni bu sasana, yaa shɛ kaa ukwuru ata mburusonu nu u'waba ubwa, asha kede bunongbo dwelekeci ya tihiŋzhe tu ushenje ubokwori o; asha bu hashɛganụ. 37Ama yaa shɛ bee yeleji ukwuru ata ne eshe ubwa, tihiŋzhe ti shi ta waŋnɛ nu bwa, asha ukwuru ata 'wi, asha bu namɛ shɛshɛshɛ. Go bunongbo hiɛŋ bụ, Bu namɛ shɛshɛshɛ.

38Aka na ti iyi ike tegeni butubwenyi kwo kaa biyikwo na azuba tu'waba tu bwa, tutagana ta ata kaa tɛ shɛ tɛ cɛnjɛ, 39go bunongbo hikeni bu. Yaa shɛ tutagana ta ata ta azuba tu'waba tu bwa tɛ shɛ tɛ cɛnjɛ kwurwa kwurwa, asha tɛ zhɛmɛ, asha tu'waba tu bwa ta azuba kwukwa ti hikekeni; bu namɛ shɛshɛshɛ.

40Yaa shɛ tihiŋzhe tu uhiuhiu bụtụ tu mushongwu, asha tụhwagwụ kwakwa uhiuhiu ubwa hwagwụ, ama bu namɛ tuba shɛshɛshɛ. 41Yaa shɛ kaa tihiŋzhe ta bụtụ tu mushongwu ni itune, asha tụhwagwụ itune ibwɛ hwagwụ, ama bu namɛ tuba shɛshɛshɛ. 42Ama yaa shɛ tutagana tɛ cɛnjɛ tu na tɛ shɛ maa ti shenjemi tu namɛ no ofwo ata uhiuhiu kwo kaa itune ɛtɛ hwagwụ, asha ụngwụ-uwaŋna ubwa mwe na tụhwagwụ tu uhiuhiu ata, kwo kaa na tụhwagwụ ti itune ɛtɛ. 43Asha go bunongbo hikeni bu, yaa shɛ tishɛŋ tụ ụngwụ ata tɛ shɛ tɛ cɛnjɛ gana maa ti shenjemi na tụhwagwụ tu uhiuhiu ata ubwa, kwo kaa na tụhwagwụ ti itune ɛtɛ ibwɛ, gana ụngwụ-uwaŋna na banɛ na azuba tu'waba tu bwa, 44asha bụtụ ata 'yajɛ ụngwụ-uwaŋna, asha bu hashɛganụ. Go bunongbo hiɛŋ bụ, Bu hashɛganụ, iwɛ ụngwụ ata namɛ nu uhiuhiu ubwa.

45Ga bụtụ ata na 'yajɛ ụngwụ ata uwaŋna no urugono tugwuno tu na tu dwatwagwụ gana bụtụ na ba nda ụcɛnjɛ, ga 'nyanga tihiŋzhe tu uhiuhiu ubwa, maa urugono buhwumbwo bu bwa bu tuzuba, maa bu na ugaga maa, N hashɛganụ, N hashɛganụ. 46Yaa shɛ shɛ aka na tụ ụngwụ ata hwuwowu hwuŋ na tu'waba tu bwa, bu zha shɛ ba bana na tuhashɛganụ tu bwa o. Bɛ shɛ ba nama bwooko no tupohondo tu ugba tu'ulwa.

47Aka na tụ ụngwụ-uwaŋna namɛ nu utogwo,#13:47-50 ụngwụ-uwaŋna namɛ nu utogwo: Tɛjɛshɛrɛga tu ko ti hiɛŋ, yaa shɛ iyi tegeni utogwo. okwo waa shɛ utogwo uwulini kwo kaa una ilinɛn, 48ti ihwehwe ye ezweni, ti inɛ ticito to tugwuno ti ilinɛn kwo kaa inɛ tihiŋzhe ta agwụdụ, kwo kaa inɛ u'waba, kwo kaa inɛ iyi elele nɛ aa njɛ nu u'waba. 49Yaa shɛ ụngwụ ata meme mbiseni gana uduhwa tilelegwumbe, kwo kaa una ushenje nu utogwo ata, okwo yaa shɛ ni ihwehwe ye ezweni kwo kaa inɛ ticito, kwo kaa nu u'waba, kwo kaa ni iyi elele nɛ aa njɛ nu u'waba, asha ụngwụ-uwaŋna waa shɛ. Ge mbiseni iŋ bunongbo. 50Go bunongbo ata hikeni ụngwụ ata. Ga kapa ijɛ ɛtɛ nɛ 'yajɛ ụngwụ ata ijitɛ icenje. 51Go hikono ụngwụ ata nụ ụjita ata ucenje. Yaa shɛ ụngwụ ata mburusonu nu utogwo ata, ni ihwehwe ye ezweni, kwo kaa ni inɛ ticito, kwo kaa nu u'waba, kwo kaa iyi u'waba ye elele nɛ aa nda uhwara ni ibɛ, ụngwụ ata ụ shɛ ụngwụ-uwaŋna na wumanjɛ, asha ijɛ ɛtɛ hashɛganụ. 52Go hwoŋzhingo utogwo ata, okwo inɛ ihwehwe ye ezweni, kwo kaa inɛ ticito, kwo kaa inɛ tihiŋzhe tụ ụgwụdụ, kwo kaa inɛ ilinɛn, kwo kaa iyi u'waba ye elele nɛ, ụngwụ ata namɛ ni ibɛ. Ụ shɛ ụngwụ-uwaŋna na wumanjɛ. Ụ shɛ oo hwoŋzhingo nu ulwa.

53Yaa shɛ kaa bunongbo hikeni ụngwụ ata, woo mburusonu su nu utogwo ata, ti ihwehwe ɛtɛ ye ezweni, kwo kaa inɛ ticito, kwo kaa ni iyi u'waba ye elele, 54asha go bunongbo peni-unu maa ga a nyashɛnjɛ ijɛ ɛtɛ nɛ ụngwụ ata namɛ ni ibɛ, maa kaana iŋ tukapa ijitɛ icenje inyɛ. 55Go bunongbo kaa hikeni ijɛ ɛtɛ ga 'yajɛ ụngwụ ata, na aba na ta a nyashɛngwa iŋ. Yaa shɛ kaa eshe tutagana tụ ụngwụ ata sheyinji shi, okwo tụ ụngwụ ata mburusonu su, asha i hashɛganụ waa. Okwo geri ba aba kwo kaa geri-be-eshe bi ijɛ ɛtɛ tutagana tụ ụngwụ ata tu namɛ, go hwoŋzhingo iŋ nu ulwa.

56Ama yaa shɛ bunongbo hikeni, ụngwụ ata kaa 'wegeji na aba na ta a nyashɛnjɛ iŋ, ga dwa ofwo ata tutagana ta ata tu ga namɛ nu utogwo ata, kwo kaa nu u'waba ata, kwo kaa ni ihwehwe ɛtɛ ye ezweni, kwo kaa ni inɛ ticito. 57Yaa shɛ wee mwe sasana nu utogwo ata, ti ihwehwe ɛtɛ ye ezweni, kwo kaa ni inɛ ticito, kwo kaa ni iyi u'waba ye elele, yoo mburusonu. Asha go hwoŋzhingo ijɛ ɛtɛ ụngwụ ata namɛ ni ibɛ nu ulwa. 58Ama tu utogwo ata, ti ihwehwe ɛtɛ ye ezweni, ti inɛ ticito, kwo kaa iyi u'waba ye elele inɛɛ nɛ ụngwụ ata beni ni ibɛ na aka na ta a nyashɛnjɛ iŋ la, asha i shɛ aa nyashɛnga sasana na aka yebi maa i nama shɛshɛshɛ.

59Undwa iwɛ ụngwụ-uwaŋna na namɛ nu utogwo na aa njɛ ne tihiŋzhe tụ ụgwụdụ, kwo kaa ni ilinɛn, okwo yaa shɛ ni ihwehwe ye ezweni, kwo kaa ni inɛ ticito, kwo kaa ni iyi u'waba ye elele, maa e heŋshi iwɛ ibɛ okwo i hashɛganụ sụ o, kwo kaa i hashɛganụ ta.

Currently Selected:

LIVAI 13: RBT

Highlight

Copy