UMOZHIGO 48
48
Ge Jekob Peni Miaụŋ mu Josɛf mi Yebi Uwebiye
1Na aba inɛ gɛ, ee mbishi Josɛf maa, Ge shibi ba gwuma ba. Ibɛ po bee suji miaụŋ mu bwa mi yebi, ga Manasɛ keeni Ifrem maa ɛ kwubɛ Jekob. 2Aka na te e mbishi Jekob, ɛɛ hiɛŋ, Yɛu bụ go Josɛf na zhajɛ pụ bụ. Nazhɛ ge Jekob njɛ iji, bɛɛ ishijɛ no ogodo ubwa baa jɛjɛ.
3Ge Jekob hiɛŋ Josɛf, Agwatana na Hwuri Kpaaŋ, m bananɛ la nu Luz na cɛnjɛ ti Kenan, bee m peni-uwebiye, 4bɛɛ n hiɛŋ, Hioko, N zhɛ ma nda maa meci miaụŋ mu ufugwo, maa na kaana ugombo. N zhɛ ma nda maa udenji bu gembi ufwugwo, maa ma pana ajalalo bu cɛnjɛ tu ga maa a 'yaga tụ unyizo-nom.#Umoz 28:13,14
5Hwuwayɛ go, miaụŋ mụ bụ me eyi mu na ee bi metenji na cɛnjɛ ti Ijipti nazhɛ Ngaa zhajɛ pụ bụ ni Ijipti ga, mɛ shɛ mi nee mi. Ge Ifrem keeni Manasɛ mi nee mi ta, gana Rubɛn ne Simion. 6Ama yaa shɛ ebi te meci miaụŋ mi nya me elele, muba mi zhɛ ma sha mu naa bụ. Ogwu aba zhɛ dure ni izeci ya atagwụ aba ga Manasɛ keeni Ifrem. 7Aka na Ngaa banɛ la nu Padan-aram, ge Rechɛl n 'weni nu uhwaŋna, na cɛnjɛ ti Kenan, ta tu vwɛ cwɛŋ maa to to Ɛfrat. Amɛ mi kaa hashɛganụ tebiye, Ngee ni bu apata nu uhwaŋna ata zhɛ Ɛfrat (ibɛ gɛtɛtɛ shɛ ya Bɛtlɛhɛm).#Umoz 35:16-19
8Aka na ti ge Jekob kwụbɛ miaụŋ mu Josɛf, bɛɛ hiɛŋ, Ata aba naa?
9Go Josɛf hiɛŋ bishi bwa, Miaụŋ mu ga Agwatana m peni epe na.
Ge Jekob hiɛŋ bụ, Ma bu tabwa, N sugeni mu, maa ma pana aŋ uwebiye. 10Eshe Jekob eri shi a kwụba ya uhwaŋna tebiye na aka ata o, iwɛnɛ baa injɛ. Ibɛ po go Josɛf suji mu ga pu bwa, baa ruwanɛ mụ, bee kwutenji unu ubwa nu una wa aba.
11Nazhɛ ge Jekob hiɛŋ Josɛf, N nge heŋshi shi maa N tɛ zhɛ ma bụ kwụba ya o, ama hioko, Agwatana te me leneni maa ma kwụba ta miaụŋ mụ bụ sasana. 12Nazhɛ go Josɛf becinji aŋ nu ukaka ubwa, bee kwuzhi, bee ubi eshe ubwa na cɛnjɛ.
13Go Josɛf suji aŋ hwɛɛ aba ebe yebi, oo gwumwonu pi Jekob, bee shikicinji Ifrem geri bu u'ala ubwa ubiye na shɛ geri bu u'ala ugwulwo Isrɛl, ga Manasɛ namɛ nu u'ala ubwa ugwulwo na shɛ geri bu u'ala ubiye Isrɛl. 14Ge Jekob nderishinji u'ala ubwa ubiye, bee peteni uŋ nu uhiuhiu Ifrem, na shɛ bụtụ tidice, bee peteni u'ala ubwa ugwulwo nu uhiuhiu Manasɛ, ubwa heŋshi koshitonu i'ɛlɛ ibwɛ gana ata, shibwonu ga Manasɛ ee meci hiiŋ.
15Bee peni Josɛf uwebiye, bɛɛ hiɛŋ,
Ga Agwatana na eshi mi ga Abraham na Azik hwụjɛ la unu ubwa peni miaụŋ mu ga uwebiye,
Ga Agwatana na untanganɛ uraiŋ mu taa te m meci la
tutu i ci hwayɛ ga, peni aŋ uwebiye.
16Ga butumwa-ba-azuba na n leshiji la ni iyi iwɛ ye elele,
peni aŋ uwebiye;
Ga a na suyana aŋ ni izeci mi keeni ni izeci ye eshi mi,
ga Abraham na Azik!
Ge e meci miaụŋ mu ufwugwo, maa a 'yaga ajalalo na cɛnjɛ tu unyizo!
17Tu go Josɛf kwụbɛ maa bishi bwa peteni u'ala ubwa ubiye nu uhiuhiu Ifrem, i lemicinji shi bu amɛ o, bee peshinji u'ala bishi bwa, nu uhiuhiu Ifrem bee peteni nu uhiuhiu Manasɛ. 18Go Josɛf hiɛŋ bishi bwa, Ada, shɛ gana ata o. Inɛ gɛ ibɛ ee meci hiiŋ, ga shɛ ubwa ebi peteni u'ala bụ ubiye nu uhiuhiu ubwa.
19Ama bishi bwa lacɛ, bɛɛ hiɛŋ bụ, M mepi, ɛ-yɛu mi, M mepi. Ga Manasɛ kaa du zhɛ ba 'yaga ajalalo te gembi ufwugwo duwa. Ama tuba i zasa tungwulo buhongwu bwa zhɛ bo gombo bo hwulo bu. Ajalalo ubwa kaa du zhɛ a sha udenji na gembi ufwugwo.
20Gabata bee peni aŋ uwebiye jita ata, bɛɛ hiɛŋ bụ, Tedure na bụ ibɛ E'isrɛl zhɛ a pana bụtụ uwebiye gana ga, ɛ hiɛŋ, Ga Agwatana ɛbɛ njɛ gana Ifrem keeni gana Manasɛ. Gabata bee hwuricinji Ifrem umbe na Manasɛ.#Ehib 11:21
21Nazhɛ ge Isrɛl hiɛŋ Josɛf, Hioko, N zhɛ mo 'wo, ama Agwatana kaa zhɛ a nama na bụ, maa mo bu gwuricingo na cɛnjɛ te eshi bu. 22Gobuko Ngee peni cɛnjɛ ta ata tɛ 'yajɛ ugwungwu, tu gata Ngee leshiji la na A'amo tedure nu utokwobi mu keeni uta mu, ama shɛ ta miaụŋ-mo-ono bu o.
Currently Selected:
UMOZHIGO 48: RBT
Highlight
Share
Copy
Want to have your highlights saved across all your devices? Sign up or sign in
Rubassa Bible © Bible Society of Nigeria, 2008