ỤBANỤ 28

I'wɛŋnɛ nɛ Onongbo Zhɛ no Urugono

(Ụban 39:1-7)

1AGWANGWAMA hiɛŋ Moses, Suyanɛ Aron batagwụ bụ na ashashɛ miaụŋ mi Isrɛl keeni miaụŋ mu bwa me eyi ga Nadab, na Abihu, nɛ Ɛliaza keeni Itama, maa tileni aŋ swooŋ maa a na ma ndana ugondu tunongbo. 2Bɛ shɛ kaa bo togonono batagwụ bụ ga Aron otogwo tijilo, a na 'yajɛ ụjɛrụma anaa na kaa pilanụ. 3Mbiso atwa elele na shɛ egwoni ugondu i'ɛlɛ a na Ngee shidinji na mpiala ma ahaŋsa, maa ge e tegeni otogwo Aron, maa a njɛ bụ tijilo, iwɛ ma ma n ndana ugondu tunongbo. 4I'wɛŋnɛ ɛtɛ i tu'urugono ɛɛ zhɛ o togonono batagwụ bụ ga Aron keeni miaụŋ mu bwa me eyi na: iyi tu'ubono na agba, ni efod, ni idikɛ tuwururu, ni idikɛ nɛ ee zweni irikwi, nu ureweni keeni umazhɛya, iwɛ maa a na ma ndana ugondu tunongbo. 5Atwa ata shɛ kaa a lashɛga azhɛnarɛya keeni uduhwa wa ababa keeni uduhwa ushenje, nu una ushenje howuu keeni tugwuno ti ilinɛn tu na aa nɛ tanɛ tanɛ.

6Ge egwoni njɛ efod ata na azhɛnarɛya, nu uduhwa wa ababa nu uduhwa ushenje, nu una ushenje howuu keeni tugwuno ti ilinɛn tu na aa nɛ tanɛ tanɛ. 7I shɛ ya 'yaga akalagba otutu eyebi a na ɛɛ zhɛ o togono ne esugwulumi ibɛ eyebi, ɛ zhɛ o togwu iŋ ni inyɛ. 8Ga akalagba efod ata aa njɛ tugwoni o to ni ibɛ, iwɛ maa o no umpo iŋ ne embi, i zhɛ ya sha bizhɛ bu ko ni ibɛ. Gɛ i'wɛŋnɛ ɛtɛ i shɛ azhɛnarɛya, nu uduhwa wa ababa, nu uduhwa ushenje, nu una ushenje howuu, ni ihwehwe ilinɛn nɛ aa hiɛŋshɛ tanɛ tanɛ. 9Nazhɛ sugo atayɛ onɛkis eyebi maa 'nyeci nzeci mu miaụŋ mi Isrɛl me eyi na aba. 10Ga nzeci ma aba mi cihiŋ mu nama nu utayɛ ata uko, maa nzeci ma aba mi cihiŋ mu na mụ vwɛ mu nama nu utayɛ uyebi, nu gana na to o momo hwulosu tụ'wụtụ. 11Gana na ta bụtụ na ba shaba atayɛ ba shaba eseyida ne tugwoni, gana ata du ɛbi zhɛ ba 'nyata nzeci mu miaụŋ-me-eyi mi Jekob na atayɛ ata eyebi. Bɛ shɛ ba swana izhɛmi ya aba azhɛnarɛya tutu rungwutwonu. 12Bɛ shɛ kaa ba patana atayɛ ata eyebi na akalagba otutu efod iwɛ maa a shɛ atayɛ titeyinje tu miaụŋ mi Isrɛl. Ga Aron shɛ ba 'waŋna nzeci ma aba no otutu ubwa eyebi na agba AGWANGWAMA iwɛ maa bi ne teyinje aŋ. 13Bɛ shɛ kaa bo zwono iŋ irikwi ya azhɛnarɛya, 14keeni shɛgba sha azhɛnarɛya tụrụmbɛɛ shi yebi, ɛ zhɛ a nda ugondu ibɛ ni ihwehwe nɛ aa hiɛŋshɛ tanɛ tanɛ, nazhɛ ɛɛ zhɛ o sugo shɛgba sha ata a ta shụ ni irikwi ebe ya azhɛnarɛya.

Iyi Tu'ubono na Agba

(Ụban 39:8-21)

15Bɛ shɛ kaa ba nda iyi tu'ubono na agba inɛ ụshɛrɛya tụdụma, ga i shɛ ugondu tugwoni. Ga a njɛ ugondu ibɛ gana na ta a njɛ ugondu efod. Nda iŋ na azhɛnarɛya, nu uduhwa wa ababa, nu uduhwa ushenje, nu una ushenje howuu keeni ihwehwe ilinɛn nɛ a hiɛŋshɛ tanɛ tanɛ 16Bi zhɛ ba pa iŋ kpalụ yebi, go ogongo ibɛ eneshi a nangwụ; ga ụnjɛswa ibɛ ụ shɛ ụbabasụ u'ala uko, go uholo ibɛ ụ shɛ ụbabasụ u'ala uko. 17Bɛ shɛ bo zwono atayɛ na amɛ ibɛ tusata ti neshi. Tusata ti hiiŋ tɛ shɛ sadius, nu topaz, nu kabunkɛl. 18Ga tusata ti ibɛ ti yebi tɛ shɛ ɛmɛrald, ni safia ni diamond; 19ga tusata ti ibɛ tu tatụ tɛ shɛ jesint, nu agati' na amɛtist; 20ga tusata ti ibe ti neshi tɛ shɛ bɛrɛl, nu onɛkis, nu jasipɛ; ga i twatwagwụ ni irikwi ɛtɛ ya azhɛnarɛya. 21A shɛ a shaba atayɛ ata umpwa-na-ba-eyebi una una zhɛ wa 'yaga izeci yɛu Jekob ye eyi ike ma ụ shɛ ụlụkpashɛ wa alamụ Isrɛl umpwa-na-ba-eyebi. 22Bɛ shɛ ba nda shɛgba shɛ na ee pieci na azhɛnarɛya tụrụmbɛɛ gana ihwehwe tɛta ni iyi tu'ubono na agba; 23Bɛ shɛ kaa ba nda tɛkanɛ ta azhɛnarɛya ti yebi maa to tɛkanɛ ta ata ti yebi na azuba ipɛlu iyi tu'ubono na agba iyebi. 24Bɛ shɛ kaa bo hwuŋtongono shɛgba sha ata sha azhɛnarɛya na tɛkanɛ ta ata tu namɛ na akakalụ iyi tu'ubono na agba. 25Shapa ụzalụ uyebi shɛgba sha ata maa to shu nu ukwunanga ụzalụ uyebi wa akalagba ata to ni efod geri bu umbe. 26Bɛ shɛ ba nda tɛkanɛ ti yebi ta azhɛnarɛya maa hwuŋtengeni tu tuta tu ukwunanga zalụ hweehwe bi iyi ɛtɛ tu'ubono na agba, geri ba amɛ na 'wa efod ata. 27Bɛ shɛ ba nda tɛkanɛ ta azhɛnarɛya ti yebi ti nya maa to tu ni iyi ɛtɛ efod ya patana no otutu, maa i nama geri bu umbe ubwa. Ge i gwumwonu no ofwo tusotulonu ti ibɛ tuzuba ta akalagba ata efod aa njɛ ne tugwoni. 28A shɛ kaa a nda ezeje uduhwa maa o to aŋ na tɛkanɛ ti iyi ɛtɛ tu'ubono na agba inɛɛ nɛ aa nɛ ne tugwoni, medenji efod, iwɛ maa i nama tuzuba ta akalagba efod iwɛ maa kede iyi nɛ oo ubono na agba tufwurungwo ni efod ata o.

29Gana ga Aron zhɛ na 'waŋna nzeci mu miaụŋ-me-eyi mi Isrɛl ni iyi ɛtɛ tu'ubono na agba nɛ shɛ inɛ ụshɛrɛya tụdụma ta, maa ubono iŋ na agba ubwa, na aka na ti bɛɛ zhɛ no ohwolu ata tijilo, iwɛ maa e ne teyinje aŋ na agba AGWANGWAMA tutu. 30Bɛ shɛ kaa ba patana Urim keeni Tumim#28:30 Urim keeni Tumim: Ibɛ shɛ iyi nɛ onongbo a 'waŋ gana ụshɛga maa e mepi ukwulana wa Agwatana, kwo kaa aka na ti iyi ike sukwutogonu aŋ, ee mepi shi gana na maa a njɛ. ni iyi ɛtɛ tu'ubono na agba inɛ ụshɛrɛya, iwɛ maa i ubono na agba Aron na aka na ti bee ci na agba AGWANGWAMA. Gana ga Aron zhɛ na 'waŋna ụshɛrɛya miaụŋ mi Isrɛl na agba ubwa nu umbe wa AGWANGWAMA ta tutu.

Otogwo Bunongbo Anya

(Ụban 39:22-31)

31Bɛ shɛ kaa ba nda utogwo na shɛ wa sha uduhwa hwɛ hwɛɛ, na zhɛ na patana na azuba efod. 32Ge i'ilu ubwa no ofwo ata uhiuhiu zhɛ no tono nama na ashashɛ ubwa. Ɛ zhɛ o zwono i'ilu ubwa irikwi tutu rungwutwonu maa i shɛ gana i'ilu idikɛ, iwɛ maa kede i dwa o. 33Bɛ shɛ bo umpongo apomɛgranati uduhwa wa ababa, nu uduhwa ushenje keeni una ushenje howuu nɛ tukwushɛ tu bwa tutu rungwutwonu. Go ogogolo ɛriwɛjɛ a na aa njɛ na azhɛnarɛya shiyogono no tuhwolu ta aba tutu rungwutwonu.

34Go ogogolo ata ɛriwɛjɛ keeni apomɛgranati na mama 'wanụ. Upomɛgranati shiyeni, ga ugogolo uriwɛjɛ 'wa, tutu rungwutwonu tukwushɛ tu utogwo ata. 35Ga Aron zhɛ no urugono utogwo ata aka na ti bɛɛ zhɛ nu ugondu, iwɛ maa a na hwuga rundu ro ogogolo ata ɛriwɛjɛ aka na ti bɛɛ zhɛ bo tono no ohwolu tijilo nu umbe wa AGWANGWAMA, keeni aka na ti bɛɛ zhɛ ba banɛ apata, shibwonu bi zhɛ bo 'wo.

36Bɛ shɛ kaa ba nda apalụ tikiri kiri na azhɛnarɛya tụrụmbɛɛ, maa 'nyeci aŋ gana ti'nyeci tu useyida, maa a shɛ iyi Tijilo ya AGWANGWAMA. 37Bɛ shɛ kaa ba patana aŋ ne ezeje ata uduhwa maa sweni aŋ nu umbe ureweni. 38Ɛ zhɛ a patana ni itune Aron, ga Aron zhɛ ba 'waŋna tụwụma ta aba te elele ni iyi tijilo nɛ ee suje, inɛɛ nɛ miaụŋ mi Isrɛl ma nda iŋ tijilo nu upwaŋ wa aba u tijilo kpaaŋ. Inɛ ɛtɛ shɛ ya patana ni itune ibwɛ tutu, iwɛ maa AGWANGWAMA leshiji iŋ nu umbe ubwa.

39Bɛ shɛ kaa bo togono idikɛ i ti'nyeci ni ihwehwe ilinɛn nɛ aa hiɛŋshɛ tanɛ tanɛ, maa njɛ ureweni ni ihwehwe ilinɛn ɛtɛ aa hiɛŋshɛ tanɛ tanɛ. Bɛ shɛ kaa ba nda umazhɛya no tugwuno ta ata e zweni irikwi.

40Bɛ shɛ kaa bo togono n-nduka, na amazhɛya, keeni ofworo tukwongwo iwɛ miaụŋ-me-eyi mu Aron kpaaŋ. Ga a shɛ a na ụjɛrụma anaa na pilanụ kpaaŋ aba. 41Bɛ shɛ kaa bo hwuŋtongono Aron batagwụ bụ i'wɛŋnɛ ɛtɛ, medenji miaụŋ mu bwa me eyi, nazhɛ dudugeni aŋ manɛbɛ, maa tileni aŋ swooŋ, ma njɛ aŋ tijilo iwɛ maa a na ma ndana ugondu tunongbo. 42Bɛ shɛ bo togonono aŋ ewereci ilinɛn a na banɛ ne embi aba uuwa teji nu n'unto ma aba iwɛ maa e urigeni mohondo ma aba. 43U zhɛ wa nama ne embi Aron keeni shimbi shi miaụŋ mu bwa na aka na tɛ ɛ zhɛ o tono nu udulo tu'ulwa, kwo kaa aka na tɛ ɛ zhɛ o gwumwonu nu utukwu-ụrụpɛ maa a njɛ ugondu no ohwolu tunongbo; shibwonu ɛ zhɛ o sugo tụwụma, ɛɛ zhɛ o 'wo. Inɛ gɛ i shɛ undwa ubwa keeni ajalalo ubwa na zhɛ a 'wa bụ tutu unyizo-nom.

Currently Selected:

ỤBANỤ 28: RBT

Highlight

Copy