ỤBANỤ 17

Go Moses Jibi Utayɛ Meni mu Banɛ

(Tɛrɛ 10:1-13)

1Tụ'ụlwatagwụ tu miaụŋ mi Isrɛl kpaaŋ tu kwuni tahaŋnụ ta aba, te e beni nụ ụshɛka Sin kwurɛ kwurɛ, nu gana na ta AGWANGWAMA peni aŋ unu. Ee zhe a namɛ no ofwo oko na ɛɛ hiɛŋ Rifidim. Ama meni mu zasaba apata maa atwa ata swe o.#Tɛrɛ 20:2-13 2Ibɛ po atwa ata sukakanɛ Moses; ɛɛ hiɛŋ, Utu panɛ meni maa ta swa. Go Moses hiɛŋ aŋ, Iwɛmbe po kwuŋ ahi ma n sukakanaa? Iwɛmbe po kwuŋ ahia manga AGWANGWAMAA?

3Ama i'uyɛ ya kwụna kaa atwa ata, ibɛ po atwa ata uranjɛ Moses tungwulongongono, ɛɛ hiɛŋ, Iwɛmbe po ɛbi ti bɛcinjɛ ni Ijipti iwɛ maa ụtụ kwụnɛ ni i'uyɛ ta miaụŋ mu tu, ti iyimabiga tu hwɛɛɛ? #Ụban 14:12; 16:3

4Iwɛbɛ po go Moses keri AGWANGWAMA n'ungwa, bɛɛ hiɛŋ, Imbe Ngɛɛ zhɛ ma nda atwa gaa? I vwɛ cwɛŋ maa e n tegeni atayɛ.

5Nazhɛ AGWANGWAMA hiɛŋ Moses, sugo umeseyi n-nyarɛ mi Isrɛl maa hwuri umbe na atwa ata maa a bụ 'wa. 'Waŋna bukwuto ata ebi beji la Urefu Nayɛl. 6Hioko, N zhɛ mo bu hwulono umbe mo shikono nu uparatayɛ Ishɛmɛ Sainai, dubo uparatayɛ ata, meni mi zhɛ ma banɛ nu ubwa, iwɛ maa atwa ata swe. Go Moses njɛ gana ata ne eshe n-nyarɛ mi Isrɛl. 7Boo po apata izeci maa, Masa keeni Meriba, iwɛnɛ ta miaụŋ mi Isrɛl mu sukakanɛ AGWANGWAMA keeni ee menji bu, ɛɛ hiɛŋ, AGWANGWAMA namɛ na ashashɛ tu hiŋ okwo bu zasaba?

E'isrɛl Lasụ Amɛlɛk nu Ujasa ni Rifidim

8Nazhɛ Amɛlɛk sukakanɛ E'isrɛl nu ujasa ni Rifidim. 9Ibɛ po go Moses hiɛŋ Joshua, Iti teleji etwenyi maa beni njɛ ujasa na Amɛlɛk beyi. N zhɛ tuba mo shikono ne bikpekwu ga, Ma 'waŋna bukwuto ga ba Agwatana ni i'ɛlɛ mi. 10Go Joshua njɛ ga gana na tu go Moses mbishi bu, baa twa ifelu na Amɛlɛk, Go Moses na Aron keeni Hu, munji ni ihiŋhiŋ bikpekwu ata. 11Aka elele na go Moses shikicinji i'ɛlɛ ibwɛ na azuba, ukpahiŋ we E'isrɛl wa lasụ; ama aka elele na bee zucinje i'ɛlɛ ibwɛ, ukpahiŋ wa Amɛlɛk wa lasụ. 12Ama i'ɛlɛ Moses kwuni tulwogo, nazhɛ ata Aron no Hu shiri utayɛ nu ukaka ubwa baa jɛjɛ nu bwa, ga Aron keeni Hu untanganɛ i'ɛlɛ ibwɛ. Bụtụ bu ko namɛ zalụ bu u'ala uko, bụtụ bi yebi namɛ zalụ bu u'ala uyebi. Gana ata ee suji i'ɛlɛ ibwɛ na azuba tutu uwaŋna teni. 13Gana aa njɛ nazhɛ go Joshua iricinji Amɛlɛk hwɛɛ nu utokwobi ta.

14Ibɛ po AGWANGWAMA hiɛŋ Moses, 'Nyata rụrụkwụkwụ ri ijɛ nu utakada, maa e ne teyinje iŋ hwuŋ. Mbiso Joshua maa, N zhɛ mo iricingo Amɛlɛk hwɛ hwɛɛ nu unyizo.#Undwa 25:17-19; 1 Sam 15:2-9 15Ibɛ po go Moses mo utukwu-ụrụpɛ, boo po uŋ izeci maa, AGWANGWAMA ubwa shɛ igɛrigɛ mi. 16Bɛɛ hiɛŋ, Gana na tu u'ala shepi igɛrigɛ ya AGWANGWAMA na azuba!#17:16 gana na tu u'ala shepi igɛrigɛ ya AGWANGWAMA na azuba: Tɛjɛshɛrɛga tu ko ti hiɛŋ, u'ala patanɛ ni igɛrigɛ ya AGWANGWAMA. Tɛjɛshɛrɛga tu ko du kaa tu zasa igɛrigɛ kwukwuŋ o. N-ndumwa mu ga mi shikeni shi kpeke. AGWANGWAMA kaa zhɛ ba uranga ujasa tɛnda na awaŋnɛ Amɛlɛk elele tutuu.

Currently Selected:

ỤBANỤ 17: RBT

Highlight

Copy