Roma 3
3
To Yahudi mousuli hangko i Pue Ala, agaiana Pue Ala batena mopabukei dandiNa
1To Yahudi hai tauna au barahe to Yahudi himbela pea; masalamohe ope-ope i peitana Pue Ala. Agaiana inee tapehangu bara melumbu porasinda to Yahudi hangko i tauna ntanina hai kadana mobundu petile. 2Ngkaia mpuu rasi irikita to Yahudi, hai mahile pobunduana! Kaisa-isa, i toYahudimi Pue Ala mopahawe NgkoraNa. 3Noumba ane arahe to Yahudi au barahe mepoinalai i Pue Ala? Nauri nodo, Pue Ala batena mopabukei dandiNa irihira. 4Kehapiri ope-ope tauna modongko, batena tou lolitana Pue Ala. Takatuinao apa au nauli Datu Daudi hangkoia. Nauli node,
“bona tongawa kamanotoMu i hinangka NgkoraMu
hai menangiKo ane raparesaKo.”#Pta. 51:6
5Mewali, babehiana manusia au bara manoto mopatongawa kamanotona Pue Ala. Agaiana inee tapehangu Pue Ala bara manoto ane Nahukuke anti babehianta au kadake. Arahe manusia au mampehangu nodo, 6agaiana bara tou. Lawi ane rapana Pue Ala bara manoto, Ia bara peisa mampohuda-hudaa kara-karanda ope-ope tauna i alo pebotusi i kahopoa dunia. 7Agaiana ara tauna au manguli node, “Ane babehianta au motengko mopatongawa kamanotona Pue Ala pane ratoia, moapari hai Nahukuke anti dosanta?” 8Ane nodori, peisa tauli, “Agina tababehi peami babehia au kadake bona mesupa au maroa.” Ara tauna au mopahala bataka lolitangku, rauli mololitana nodo. Tauna iti, hintoto mpuuhe nahuku Pue Ala.
Ope-ope tauna masala i peitana Pue Ala
9Mewali, node: ikita to Yahudi, bara meliu kamaroanta hangko i tauna ntanina. Lawi nodo au kuuli inona, ope-ope tauna batena masala, lawi ikita ope-ope madosamoke, maroa to Yahudi maroa tauna ntanina. 10Lawi ara teuki i lalu Sura Malelaha node:
“Barapi huba hadua tauna au manoto.
11Bara ara au mapande i peitana Pue Ala.
Bara ara au mohaoki Ia.
12Ope-ope tauna mokaraohi Pue Ala.
Barapi mobundu tuwonda.
Barapi huba hadua au maroa babehiana.#Pta. 14:2-4; 53:2-4
13Kedai hai mepakaea lolitanda,
Lolita mpebagiu mesupa i humenda.
Lolitanda mopakasusa pea lalunda ranganda nodo petilo ile au moipo.#Pta. 5:10; 140:4
14Ope-ope lolitanda petatarahu pea hai petunda-tunda.#Pta. 10:7
15Mampeinao peamohe mopapate ranganda.
16Iumba pea kalaoanda, mopaarahe dake hai kapari.
17Barahe mau modame.#Yes. 59:7-8; Ppt. 1:16
18Barahe langa i Pue Ala.”#Pta. 36:2
19Hangko i Aturana Musa, taisa kadana ara tauna au manoto. Hai taisa ope-ope i Aturana Musa, mokanaihe to Yahudi au rawei atura iti. Mewali, bara ara hadua tauna au peisa mampololita kamanotona. Ope-ope tauna masalamohe i peitana Pue Ala. 20Bara ara hadua au manoto i peitana Pue Ala i pampeulaina Aturana Musa. Lawi hangko i atura itimi, taisa kamadosanta.
Rara bona manusia mewali manoto i peitana Pue Ala
(3:21–5:21)
Ikita mewali manoto i peitana Pue Ala anti pepoinalainta i Pue Yesu
21Agaiana ide-ide Pue Ala motudungiake noumba rarana manusia peisa mewali manoto i peitaNa. Hai rara iti tepahawemi hangkoia i lalu Sura Atura au nauki Musa hai suranda nabi. Barake mewali manoto i peitana Pue Ala anti kamampeulainta Atura iti. 22Pue Ala mopamanotoke i peitaNa ane mepoinalaike i Yesu Kerisitu. Iti Nababehi i ope-ope tauna au mepoinalai, barake Napopontani-ntani. 23Lawi madosamoke ope-ope, hai barake hintoto molambi kiranta i lalu peawana Pue Ala. 24Agaiana Pue Ala mokabahamoke hangko i huku dosanta, hai Naimbake manoto i peitaNa anti kanapahurunta Kerisitu Yesu. Ope-ope iti Nawei mberoke anti kabulana laluNa.
25Moula popakanotona Pue Ala, Yesu rapapate hai waheNa tebumbuha. Iti nababehi Pue Ala bona Yesu rahuku mohalea dosa manusia bona teampungi dosanta ane mepoinalaike Iria. Hangko damani Yesu mate, Pue Ala bara mohuku manusia au madosa anti kasabaraNa. 26Agaiana ane Pue Ala bara mohuku manusia au madosa, lempona Ia bara manoto. Mewali i kapatena Yesu, Pue Ala mampetudungia kamanotoNa, lawi dosa manusia nahurumi Yesu. Ido hai taisa kamanotona Pue Ala hai taisa wori Pue Ala ina moimba manoto ope-ope tauna au mepoinalai i Yesu.
27Mewali, barapi ara raranta mampemahile. Lawi barake nadoko Pue Ala anti kamaroana babehianta. Agaiana Nadokoke anti pepoinalainta i Pue Yesu. 28Lawi idemi patoana lolitangku: ikita mewali manoto i peitana Pue Ala anti pepoinalainta, bara hangko i babehianta au maroa moula Aturana Musa. 29Hai bara pea to Yahudi au napokaahi Pue Ala, agaiana mampokaahi worihe tauna au bara to Yahudi. 30Lawi Pue Ala hadua pea, hai Iami au mopamanoto to Yahudi anti pepoinalainda, hai mopamanoto worihe tauna au bara to Yahudi anti pepoinalainda.
31Mewali, naimbamoke Pue Ala manoto i peitaNa hangko i pepoinalainta pea, bara anti pampeulainta atura au nauki Musa. Agaiana inee tapehangu atura iti bara tou, lawi hai pepoinalainta, mopakarohori atura iti.
@LAI 2016