Suro 18
18
Paulu i Korintu
1Roo indo, padumi Paulu mopalehi wanua Atena lao i wanua Korintu. 2I Korintu, laomi Paulu mampohidupaa hadua tobalilo to Yahudi au rahanga Akwila. Akwila iti mesupa i poropinsi Pontus. Towawinena rahanga Priskila. Ihira hamboko melimba hangko i tampo Italia, hai bara manihe mahae hawe i wanua Korintu. Melimbahe hangko i tampo Italia iti, lawi ara hawana Datu Mahile Klaudius, mowurahe ope-ope to Yahudi au ara i wanua Roma. Paulu laomi mosondaki Akwila hai Priskila, 3hai maidami inditi hihimbela hai ihira. Mobago sambelahe, lawi bagona Paulu himbela hai bagonda, mobabehihe atu bambaru hangko i koli binata. 4Minggu-mingguna i alo Penombaa, laomi Paulu i sou penombaanda to Yahudi mopaturo tauna au teruhu inditi, maroa to Yahudi maroa to Yunani. Tunggaiana bona mepoinalaihe i Pue Yesu.
5Mewali, kahawenda Silas hai Timotiu hangko i tampo Makedonia, Paulu barapi mobago mobabehi atu bambaru hangko i koli, agaiana ia mopahawe liliumi Ngkora Marasa i to Yahudi, napololitaahe kana i Yesu, Datu Topehompo. 6Agaiana to Yahudi i wanua Korintu mosapuaka hai mopakoi liliuhe paturona. Ido hai Paulu motaronta awu hangko i hampina hai nauliangaahe, “Ane nahukukau Pue Ala, barapi iko au mohuru! Batenami ikamu! Mewali mepongka ide-ide, kupalehimokau, laomona mobambari Ngkora Marasa i tauna au barahe to Yahudi!” 7Hai lao mpuumi Paulu i sou au ara i hola sou penombaa. Ampu sou iti, bara to Yahudi, agaiana ia menomba i Pue Ala. Hangana Titius Yustus. 8Ara hadua tadulako i sou penombaa au hungku i souna Titius, hangana Krispus. Ia hai ope-ope au ara i souna mepoinalai i Pue Yesu. Hai bosa wori to Korintu au mohadi bambari au napahawe Paulu, alana mepoinalaihe hai rariumohe.
9I tanga kaindi, Paulu moita mbuli hambua pampetudungia. I lalu pampetudungia iti, nauliangaa Pue, “Ineeko langa, hai inee nupengkaroongaa mopahawe NgkoraKu i wanua Korintu, 10lawi Kuporangaiko, hai Kukakiomohe bosa tauna i wanua ide au ina mewali taunaNgku. Bara ara hadua au ina mopatoa taiena irio ba mampopeahi-ahiko.” 11Mewali, Paulu maida i Korintu hampare ini wulana kamahaena, hai mopaturo liliu tauna kana i Ngkorana Pue Ala.
12I tempona Galio mewali gubernur i tampo Akaya, hintuwumohe to Yahudi moewa Paulu. Paulu raanti i lindona gubernur, hai 13rasalai, rauli, “Tauna ide mopakanawo bosa tauna. Napaturohe kana i rara menomba i Pue Ala, agaiana pepaturona iti bara hintoto hai apa au teuki i Aturana Musa!”
14Hangko ina mehana Paulu, naulimi Galio, “To Yahudi! Ane tauna au nisalai iti moewa topoparenta Roma ba babehiana kadake ntepuu, ina sabarana mampehadingi popahawemi. 15Agaiana popahawemi mokanai pea lolitana hai atura agamami. Mewali niurusimi ikamu. Iko, lohena!” 16Roo indo, nawuramohe hangko i sou pobotusia. 17I tabangaa sou pobotusia iti, tauna bosa mohakahe Sostenes, tadulako sou penombaa, hai rapapahai. Agaiana babehianda iti bara nahaile Galio.
Paulu mesule i wanua Antiokia
18Mahae mani Paulu maida i Korintu, hangko mepalakanari i halalu hampepepoinalaina. Roo indo, ia mengkahemi i kapala tahi lao i tampo Siria, hihimbela hai Priskila hai Akwila. Agaiana hangko damanihe meangka, Paulu mampopekou hampai weluana i boea Kengkrea, tanda kamopabukeinami dandina i Pue Ala. Hai moula adanda to Yahudi, ane hopomi tempo podandi, hangangaa rakou weluanda. 19-21I polumaonda iti, mehupehe i wanua Epesu, hai Paulu lao i sou penombaa hai mombepakana i lolita hai to Yahudi au teruhuhe inditi. Tauna iti merapi bona Paulu mahae haodi hihimbela hai ihira, agaiana bara naunde. Nauri nodo, i pelingkana, nauliangaahe, “Ane napokana Pue Ala, ina mesule peana mai inde.” Priskila hai Akwila maida liliuhe i Epesu, agaiana Paulu mopaliliumi polumaona mesawi i kapala tahi lao i tampo Siria.
22Kahawena i wanua Kaisarea, laomi Paulu i Yerusale motabe to Sarani au ara inditi, hangko laori i wanua Antiokia i tampo Siria. 23Bahangkia kamahaena hihimbela hai halalu hampepepoinalaina i Antiokia, meangka mbulimi lao i tampo Galatia hai Frigia mopakaroho pepoinalainda tauna au mepoinalai i Pue Yesu.
Apolo i Epesu hai i Korintu
24I tempo iti, ara hadua to Yahudi au hawe i wanua Epesu, hangana Apolo. Apolo iti mesupa i wanua Aleksandria. Ia mapande mololita, hai matumpali kana i ihi Sura Malelaha. 25Apolo rapaturoa worimi tuntukana Pue Yesu. Mewali, kahawena i Epesu, ia mololita hangko i laluna, mopaturoahe tauna tuntukana Yesu i kanoto-notoana, nauri periuna pea Yohane au naisa. 26I tempo iti, napepongkami Apolo mololita i sou penombaanda to Yahudi hai bara ara kalangana. Karahadina Priskila hai Akwila lolitana, rakakiomi lao i sounda hai rapakanotoa mbuli Ngkorana Pue Ala au bara mani naisa.
27Roo indo, Apolo moliwo lao i tampo Akaya. Ia ratulungi halalu hampepepoinalaina i Epesu mopakatuhe sura i hangka to Saraninda i Akaya bona modoko maroahe Apolo. Mewali, kahawena Apolo i Akaya, paturona moanti ngkaia pewati i ope-ope tauna au mepoinalaihe i Pue Yesu anti kabulana laluna Pue Ala irihira. 28Anti kamapandena mololita, Apolo monangihe to Yahudi i lalu pombehanainda i lindonda tauna bosa. Hangko i Sura Malelaha, Ia mopatongawa kaYesuna Datu Topehompo au nadandimi Pue Ala.
Currently Selected:
Suro 18: NPY
Highlight
Copy
Compare
Share
Want to have your highlights saved across all your devices? Sign up or sign in
@LAI 2016
