Tóogio 2
2
Kálata go Giimbó gá boolímínyí bá Ɛ́fɛsɛ
1Ɔ́ŋɛ́nɔ Ɛ́ŋgɛlɛsɛ ba Giimbó gá boolímínyí gɛ́ɛgɛ gɛ́ lɔ́mɔ́ naá Ɛ́fɛsɛ go amɔ́: «Náana gɔ́ɔ mɔ́ɔnyɔ a nonamɔ́ muotóti mótáanɔ na móandɛ́ naá ombɔ́gɔ onɔ́mɛ yɛ́hɛ́, ɛ ɛnda naá tɛ́mádɛ́má ya balámba bá góolo bátáanɔ na báandɛ́, a gálagalamɔ́. 2Ŋgíyimene buelí báhɔ, na gɛdɔmbɔ gáhɔ, na ɛbágóɛga háhɔ. Ŋgíyimene goŋaá o do bósó ba go mɛna bɛkándáa bá batɔ ginumpé. Báaba bá béfínenyemú bá amɔ́ bá lɛ́ baapótɛlɛ, gɔ́ɔ bɔ́ɔ bá dɛ bɛ́ɛ́mbá, o báá bó góbá ombɔ́gɔ go gadɛ́ɛ o báá lɛncá goŋaá bá belebele. 3O lɛ́ na ɛbágóɛga, o mbɔ ɔ́bɛ́gɔ́nɔ́ɔ go busío bámɛ, o lɛ́ kanɛ go yoda bɛnamá. 4Kanɛ́ mbɛanana boóma bá ŋaá ko goomɛna go bɔ́, bó lɔ́mɔ́ goŋaá o do gɔnɔ́ mmaamana aŋa naá mabayɛga. 5Bééníŋínyéemú kanɛ́ anáa o mbaá kúkéné. Núgíe gɛɔyɔ gáhɔ, o ŋanana aŋa o mbaá lɔ́mɔ́ o ŋanana naá mabayɛga. Aáŋa caá nɔ́ɔnɔ, nná go báyɛkɛna, ŋgúlie gɛdálɛ́ná lámba gáhɔ naá undukí yá gɛ́, aáŋa o do núgíe gɛɔyɔ gáhɔ. 6Gɛnɔ́gɔ́ gá boóma gɛ́ɛgɛ naá maamɔ́ɔ gɛ́ lɔ́mɔ́ goŋaá, o bɛlabɛla meŋiigíe má Banɛkolayɛ́tɛ aŋa yɔmɔ́ɔ. 7Ŋgáa mɔ́ɔnyɔ a bɛananamɔ́ edúu, ɔ ɔ́bɔ bɔ́ɔbɔ Giliíli o oyanɛnamɔ́ Biimbó bá boolímínyí. Mɔ́ɔnyɔ a ŋgaá mánɛ́gɛ́ná, nná mo fáa gɛsamɔ́ gá boɛ́tɛ bá gɛɔyɔ bɔ́ɔbɔ bó lɔ́mɔ́ naá peledísi ya Asaŋa#2.7 Go ɛ́na Mabayɛga 2.8-9; Tóo 22.2..»
Kálata go Giimbó gá boolímínyí bá Simíline
8Ɔ́ŋɛ́nɔ Ɛ́ŋgɛlɛsɛ ba Giimbó gá boolímínyí gɛ́ɛgɛ gɛ́ lɔ́mɔ́ naá Simíline go amɔ́: Mɔ́ɔnyɔ a lɔ́mɔ́ mabayɛga na mesúgidinye, mɔ́ɔnyɔ a mbaá gúé a báá ncó gunde naá gɛɔyɔ o oya a amɔ́: 9Ŋgíyimene gɛdɔmbɔ gáhɔ na gosóga gáhɔ, asáa gɔgɔ́ o lɛ́ na bonɔ́mɛ. Ŋgíyimene gɛbɛ́ gɛ́ɛgɛ báaba bá béfínenyemú bá amɔ́ bá lɛ́ Beyúdene, bɔ́ɔ bá dɛ bɛ́ɛ́mbá, bá gálagalamɔ́ go busío báhɔ. Bá lɛ́ nɛgósa ná Sátana. 10O nɔ́ ɔ́bɛgɔnɔ kanɛ́ o do bɛáa bofoá. Ohándá a ná ágana degédegé naá giimbó gáhɔ naá ncíbo ya gɛaŋɔ́, go go ɛ́na ɛkádɛ no lɔ́mɔ́. Bá ŋga nyó séésényée gó ɛ́da go éme medúgú mɔ́ɔ́dɔ́. Beŋé gioliminyo gáhɔ gó ɛ́da héme naá nigúe, gɔ́ɔ ka ŋgaá go fáá gɛɔyɔ gá kanɛ mmanɛ́náa go bɛsoɛná bá gɛmánɛgɛna gáhɔ. 11Ŋgáa mɔ́ɔnyɔ a bɛananamɔ́ edúu ɔ ɔ́bɔ bɔ́ɔbɔ Giliíli o oyanɛnamɔ́ Biimbó bá boolímínyí. Mɔ́ɔnyɔ a ŋgaá mánɛ́gɛ́ná, nigúe ná gáandɛ́ɛ nɛ́ dɛ ŋgá mo báláfɛna.
Kálata go Giimbó gá boolímínyí bá Pɛlɛgáma
12Ɔ́ŋɛ́nɔ Ɛ́ŋgɛlɛsɛ ba Giimbó gá boolímínyí gɛ́ɛgɛ gɛ́ lɔ́mɔ́ naá Pɛlɛgáma go amɔ́: «Náana gɔ́ɔ mɔ́ɔnyɔ a nonamɔ́ kalafɔ ya nodíolú maayá miimée a gálagalamɔ́: 13Ŋgíyimene hoóma háaha o gɛ́gamɔ́, hɔ́ɔ há oŋgɛ́yɔ́ yá Sátana yó lɔ́mɔ́. Kanɛ́ o mba mbágódɛ́ná tíŋítiŋi, o lɛ́ kanɛ go mbásáŋona; akɛ́ naá gɛcamɛna gɛ́ɛgɛ ba mboó óná Antɛ́pasɛ, ŋgominyo yamɛ ya pídefide naá bɛɛnyɔ́ɔ, hoóma háaha Sátana a gɛ́gamɔ́. 14Kanɛ́ mbɛanana moóma má ŋaá ko goomɛna go mɔ́, bó lɔ́mɔ́ goŋaá, o bɛanana hɔ́ɔlɔ́ batɔ báaba bá bienenemú gohúunenye gá Bálama. Mɔ́ɔnyɔ a mbaá sɔ́mɔ́ Bálaga goŋaá a dámbɛna baaná bá Ɛ́sɛlahɛ́ɛlɛ goŋaá bá nyáa mesugé má biséégé, bɛ́ ɛ́da go ɔyɔ gɛɔyɔ gá hanyɔ́. 15Gɔnɔ́ hɔ́ɔlɔ́, o bɛanana batɔ báaba bá bienenemú gohúunenye gá Banɛkolayɛ́tɛ. 16Núgíe kanɛ́ gɛɔyɔ, aáŋa caá nɔ́ɔ, ko úlenine godɔ́ɔdɔ godɔ́ɔdɔ, nco nuugenye batɔ bɔ́ɔbɔ na kalafɔ yɛ́ɛyɛ ɛ húmenemú naá nyuudé námɛ. 17Ŋgáa mɔ́ɔnyɔ a bɛananamɔ́ edúu ɔ ɔ́bɔ bɔ́ɔbɔ Giliíli o oyanɛnamɔ́ Biimbó bá boolímínyí. Mɔ́ɔnyɔ a ŋgaá manɛ́gɛ́ná, nná mo fáa mána máama má lɔ́mɔ́ ɔsɛ́gɔ́ɔlú, na ɛdánɛ́ nimmúmpúu; naá ɛdánɛ́ nɛ́ɛnɔ, ufíno ofáa#2.17 Go ɛ́na naá Gihúmie 16.14-15,33-34; Iseyíi 62.2; 65.15. yó lɛ́ ɔ́ŋɔ́ɔlú kɔ́ɔ yɔ́ɔyɔ mɔtɔ a lɔ́mɔ́ a dɛ íyíménée, goana mɔ́ɔnyɔ a gaá ná yó bɛáa.»
Kálata go Giimbó gá boolímínyí bá Tietíile
18Ɔ́ŋɛ́nɔ Ɛ́ŋgɛlɛsɛ ba Giimbó gá boolímínyí gɛ́ɛgɛ gɛ́ lɔ́mɔ́ naá Tietíile go amɔ́: Náana gɔ́ɔ Moɔnɔ́ ba Asaŋa mɔ́ɔnyɔ a lɔ́mɔ́ na oŋgíso aŋa gɛlɛ́mbɛ gá íyuke, na bɛgɔ́ndɔ́ bɛ́ geyime aŋa gɛkɔ́ŋɔ gá ŋaá bá á ágá naá íyuke, a gálagalamɔ́: 19Ŋgíyimene buelí báhɔ, gɛnɔ́ɔ́nɛ́nɔ́ gáhɔ, goágana gáhɔ gá odɛ́má, mbɔ́dɔ yahɔ ya go yɔgɔnɔ na ɛbágóɛga háhɔ. Ŋgíyimene caá meŋiigíe máhɔ má dɔ́ɔdɔ má lɛ́ gɛca má dómbana má cóá. 20Kanɛ́ mbɛanana boóma bá ŋaá ko goomɛna go bɔ́. Bó lɔ́mɔ́ goŋaá, o báá go dɛ́ɛna okɔ́dɔ Sɛsabɛ́ɛlɛ mɔ́ɔnyɔ a béfínenyemú mbúsí ya Asaŋa, a nenugenye boyogóní bámɛ, a bó húunenye goŋaá bɔ́ ɔyɔ gɛɔyɔ gá hanyɔ́, bá nyáanana mesugé má biséégé. 21Mbáa go mo fáa gɛcamɛna gá goŋaá a núgie gɛɔyɔ, kanɛ́ a báa go inye go dɛ́ɛna gɛbɛ́ gɛ́hɛ́ gá gɛɔyɔ. 22Boóma moánɛ bɔ́ kaá ná mo nɔɔ́ɔ naá ombɛ́dɛ́ yá makánya makɔ́nɔ́, olɔŋɔ na batɔ bɛ́hɛ́ báaba bá fíidenyemú Asaŋa nnyimé, aáŋa bá dɛ núgíe bɛgáda bá meŋiigíe bɛ́ɛbɛ a bó húunenyemú. 23Koó óná baaná bɛ́hɛ́, nɔ́ɔ gɔ́ɔ, Biimbó bá boolímínyí biimée bɛ́ gaá ná lɛncá goŋaá ndɛ́ mɔ́ɔnyɔ i íyimenemú mbééníŋínyí na mágadɛ́ɛ má batɔ. Nná soɛna na onyɔ moánɛ go meŋiigíe mɛ́hɛ́#2.23 Go ɛ́na naá Ɛsagɔ 7.10; Selemíi 17.10; Ɛsagɔ 62.13.. 24Kanɛ́ bɛɛnyɔ́ɔ boolímínyí báaba bóntió naá Giimbó gá Tietíile, bɛɛnyɔ́ɔ báaba no lɔ́mɔ́ no do bienénée gɛbɛ́ gá gohúunenye gɛ́ɛgɔ, no lɔ́mɔ́ kanɛ go lɛ́ga go íyime bɔ́ɔbɔ bá dɔ́ŋɔnɔmɔ́ bá amɔ́ «findímíi» sá Sátana, ŋgaá nyó oyáná caá cɛ nyó dóɛ́gánáa gɛnóɛ́ gíntió. 25Goana nonáa nɔnɔ tíŋítiŋi bɔ́ɔbɔ no bɛananamɔ́ gó ɛ́da go éme aŋa nná ncomɔ́ gunde. 26Go mɔ́ɔnyɔ a ŋgaá mánɛ́gɛ́ná, a báá ŋanánáa ndɛ́ga yamɛ gó ɛ́da go éme naá mesúgidinye, nná mo fáa nɛgaŋa ná go indenye bɛdɔŋɔ. 27A ŋga bó indényée na gɛgaŋa giimée na gidímbo gá gɛkɔ́ŋɔ, a bó áda aŋa bá ádamɔ́ motɛ́lɛ́a má noma. 28Aŋa yɔmɔ́ɔ mmbaá bɛáa nɛgaŋa naá Baaba, nná ŋa nɔ́ɔ caŋa mmue go busío bɛ́hɛ́, mmo fáa tɔ́nɔ hiotóti há ŋgúle mbála#2.28 Go ɛ́na naá Ɛsagɔ 2.8-9; o bana, go eninye na Ɛmbanɔ 24.17; Tóo 22.16.. 29Ŋgáa mɔ́ɔnyɔ a bɛananamɔ́ edúu ɔ ɔ́bɔ bɔ́ɔbɔ Giliíli o oyanɛnamɔ́ Biimbó bá boolímínyí.
Currently Selected:
Tóogio 2: YAS
Highlight
Share
Copy
Want to have your highlights saved across all your devices? Sign up or sign in
