Filípe 2
2
Bɛ́ɛ́mba nɔnɔ ukelú yúmmue na odɛ́má yá go bésiisie
1Gobálada gɛ́nyɔ́ na Kilítusu gó nyó gúlumeninye lí? Gɛnɔ́ɔ́nɛ́nɔ́ gɛ́hɛ́ gɛ́ nyó gíndenye lí? No lɛ́ bénebígínyéelú na Gimmúmpúu gá Giliíli o? No lɛ́ na ndoŋá ya gɛnɔ́ɔ́nɛ́nɔ́ na ya kɔ́lɔ mahana bɛɛnyɔ́ɔ na bɛɛnyɔ́ɔ lí? 2Ŋaáa nɔnɔ kanɛ́ goŋaá bɛyaŋa bámɛ bɛ́ bɛ́ɛmba dácɛ gɔ́ɔgɔ no lɔ́mɔ́ ukelú yúmmue. Ŋgáa gɛnɔ́ɔ́nɛ́nɔ́ gɛ́nyɔ́ gɛ́ bɛ́ɛmba mbɔ́dɔ mmue, no bɛ́ɛmba odɛ́má yúmmue, na mbééníŋínyí mmue. 3No do ŋaáa boóma na ndoŋá ya go mánɛgana basɔ́gɔ́ɔ; no do ŋaáa boóma na ndoŋá ya go béségisegi, kanɛ́ na ibésiisie, núúnée nɔnɔ basɔ́gɔ́ɔ aŋa bá lɛ́ bagɔ́nɔ́ɔ bá nyó dómbana. 4Onyɔ moánɛ a dɛ háánánáa go fúmbe goana besé yɛhɛ́ ya moatɛ́, kanɛ́ tɔ́nɔ yɛ́ɛyɛ ya basɔ́gɔ́ɔ. 5Ɔyɔ́ɔ nɔnɔ nɔ́ɔnɔ aŋa batɔ báaba bá lɔ́mɔ́ báladáalú na Yésu Kilítu; 6mɔ́ɔ mɔ́ɔnyɔ naá mabayɛga a mbaá lɔmɔ́ odɛ́nɛ́ yúmmue na Asaŋa, kanɛ́ a dɛ mbá lɛ́ga go lɔbɛnɔ ogɛlɛ yá Asaŋa go bogaaga. 7Mɔ́ɔ moatɛ́ moatɛ, a mba búumbéné buimée bɔ́ɔbɔ a mbaá lɔmɔ́, a báá gɔ́lɔ́ odɛ́nɛ́ yá uyogóní#2.7 O bana, go eninye na Iseyíi 52.13—53.12; Mot 20.28.. A bɛ́ɛ́ ɛ́yá mɔtɔ naá kadɛ́gadɛ́ɛ ya batɔ, bá báá mo lɛncá nɔ́ɔnɔ. 8A báá bésiisíe, a báá ŋaáa ŋgɔ́bɛnɔ gó bɛ́ɛ́ ɛ́dá húme naá nigúe, a báá gúé naá kolósi. 9Boóma moánɛ bɔ́ Asaŋa a mbaá mo búlúgíe naá gɛantáanta gá undukí gɛ́ dómba, a báá mo fáá ufíno yɔ́ɔyɔ yó dómbanamɔ́ ifíno iŋkimée, 10go goŋaá go ufíno yá Yésusu, batɔ báaba naá mmoɛná, báaba naá cí háalá, na begúe, bá gule enúu go cí; 11gɔnɔ́ goŋaá uŋkimée o oyɛda a amɔ́, Yésu Kilítu a lɔ́mɔ́ Daadáa, go nigúmi ná Asaŋa Isée.
Buelí bá bakɛlɛ́tɛnɛ
12Bámɛ bá odɛ́má, bɛɛnyɔ́ɔ báaba no lɔ́mɔ́ gɔgɔ́ na ŋgɔ́bɛnɔ, dúmbényée nɔnɔ na go ŋanana ŋgɔ́bɛnɔ caá akɛ́ goana gɔ́ɔgɔ ndɔ́mɔ́ olɔŋɔ nɛnyɔ́, kanɛ́ dómbá dómbáa godɔ́ɔdɔ aŋa ndɔ́mɔ́ cɛ bɛ́ɛ́mbá olɔŋɔ nɛnyɔ́. Bɛ́ɛ́mba nɔnɔ naá buelí go gisódio gɛ́nyɔ́, no bɛa kálamanana na bofoá naá boayá bá Asaŋa. 13Ɛɛ́ɛŋ, Asaŋa a yɔgɔnɔ naá bɛɛnyɔ́ɔ, a nyó fáanana bogaaga bá go lɛ́galɛga go ŋanana moóma mɔ́ɔmɔ mó mo fɛɛnanɛnamɔ́. 14Ŋanánáa nɔnɔ buimée kanɛ biuŋgúlú, kanɛ cuŋí, 15go goŋaá no bɛ́ɛmba kanɛ cigíi gɔnɔ́ bɛmammana. No bɛ́ɛmba baaná bá Asaŋa kanɛ giílo naá kadɛ́gadɛ́ɛ ya batɔ bá ogɛlɛ yɔ́ɔyɔ báaba bá lɔ́mɔ́ na gɛbɛ́ gá gɛɔyɔ, bɔ́ɔ bahándá. No bɛ́ɛmba aŋa bise naá tɛ́mádɛ́má yabɔ́ naá cí háalá, 16bɛɛnyɔ́ báaba no dúmbenyemú nogálɔ ná gɛɔyɔ. Budúgú bɔ́ɔbɔ Kilítusu a ŋgaá ncó gunde, ka ŋga békelényée go busío bɛ́nyɔ́; go goŋaá hɔ́ɔlɔ́, bá ŋgɛ ɛ́ná bá amɔ́ cɛ á gá yɔgɔ́nɔ́ɔ go dugúnú, cɛ á gá gɔ́lɔ́nɔ́ɔ gɛdɔmbɔ go dugúnú. 17Kanɛ́ akɛ́ bó húme goŋaá bá gídene manɔ́ŋɔ́ mámɛ aŋa mɔgɛ́bɔ naá gɛbáágá gɛ́ɛgɛ no íŋenenemú Asaŋa na buelí bá gioliminyo bɔ́ɔbɔ no yɔgɔnɔmɔ́#2.17 O bana, go eninye na 2 Tim 4.6., ndɛ́ na bɛyaŋa kɔnɔ békelenye makɔ́nɔ́ nɛnyɔ́ biimée. 18Caŋa mmue, bɛɛnyɔ́ɔ tɔ́nɔ, yaŋáa nɔnɔ no gɔnɔ békelenye makɔ́nɔ́ olɔŋɔ namɛ.
Póolo a á dómá Timotée na Epofolodíte go bosɔ́mɔ naá Filípe
19Go bogaaga bá Daadáa Yésusu, ndɛ́galɛga go nyó dómɛna Timotée fɛaŋɔ fɛaŋɔ, goŋaá yɔmɔ́ɔ tɔ́nɔ mbɛ́ɛmba gúlúmínyéelú na cɔ́mɔ sɛ́nyɔ́ sɛ́ɛsɛ kaá ná bɛáa gɛ́hɛ́. 20Cɛ bɛanánáa mɔtɔ uncodío mɔ́ɔnyɔ dɛ lɔ́mɔ́ nɛhɛ́ mbééníŋínyí símmue eé símmue, mɔ́ɔnyɔ a lɔ́mɔ́ ba go bényíigenye odɛ́má mammana go busío bɛ́nyɔ́. 21Ɛɛ́ɛŋ, biimée báaba bóntió, bá lɔ́mɔ́ go go fúmbe besé yabɔ́ ya moatɛ́, caá akɛ́ yɛ́ɛyɛ ya Yésu Kilítu. 22Kanɛ́ Timotée, a lɛ́ dúfíelú bɔ́ɔbɔ a lɔ́mɔ́, aŋa no íyimenemú. A lɛ́ bííŋénéelú go go dúmenye Gɛnɔ́gɔ́ gá Cɔ́mɔ olɔŋɔ namɛ gɔgɔ́ aŋa moɔnɔ́ a lɔ́mɔ́ naá boayá bá isée. 23Mɔ́ɔ kanɛ́ ndɛ́galɛgamɔ́ go nyó mo dómɛna gɔgɔ́ aŋa kaá ní íyímé odɛ́nɛ́ yámɛ bese. 24Moatɛ́, ndɛ́ na toodo odɛ́máa naá Daadáa goŋaá yɔmɔ́ɔ tɔ́nɔ, ŋgúlene medúgú máama.
25Ŋgɛɛ́ ɛ́ná bese goŋaá mmanɛ nyó dómɛna mɔ́ɔnyɔ bɛɛnyɔ́ɔ no mbaá tómɛ́ná go go mbɔ́yɔgɔnɛnɔ gɛcamɛna gɛ́ɛgɛ mbaá lɔmɔ́ naá goháanahaana, a lɔ́mɔ́ ondimóní bamɛ Epofolodíte, udílígíní bamɛ ba nɛnoa. 26Mɔ́ɔnyɔ moánɛ, a á lɛ a bɛanana mbééníŋínyí makɔ́nɔ́ a amɔ́ a gɔnɔ nyó ɛ́na biimée, a gɔnɔ go ɔ́bɛgɔnɔ naá odɛ́má go gɔ́ɔgɔ no mbɔɔ́ ɔ́bɔ́ goŋaá a mba lɛ́ a nóma. 27Mammana, a mba nómáa makɔ́nɔ́ a báá síéné sɔŋɛ go gúe. Kɔ́ɔ, Asaŋa a lɔ́mɔ́ mo ɛ́náalú mahana, caá akɛ́ goana mɔ́ɔ mokáa, kanɛ́ tɔ́nɔ namɛ, goŋaá cɛ dɔ́bɔ́ɔ ŋgɛ́dana naá busío bɛdɔmbɔ aá bɛdɔmbɔ. 28Ŋgaá bágáyɛ́gá go nyó mo dómɛna, goŋaá no békelenye makɔ́nɔ́ aŋa no gaá ná gɔnɔ́ mo ɛ́na, naá bámɛ boayá, gɛdɔmbɔ gámɛ gɛ́ unuge. 29Bégedíemú nɔnɔ kanɛ́ naá Daadáa go go mo gɛ́ndɛgɛna na mammana ya bɛyaŋa, no hálamanana makɔ́nɔ́ batɔ báaba bá lɔ́mɔ́ aŋa mɔ́ɔ, 30goŋaá a á béédíe go gúe go buelí bá Kilítusu; a ná ŋá a báá yímíe gɛɔyɔ gɛ́hɛ́ go go mbɔ́yɔgɔnɛnɔ, bɔ́ɔbɔ bɛɛnyɔ́ɔ moatɛ́ moatɛ no mbaá lɔ́mɔ́ no do bósó bá go ŋa.
