Sáakɛ 4
4
O bɛlabɛla Asaŋa aáŋa o húmenye odɛ́má go moóma má cí
1Nɛɛ́nɛ no lɔ́mɔ́ na ɛsaŋɔ́ na cáŋɔ́ naá kadɛ́gadɛ́ɛ yɛnyɔ́ o? Ábɔ, caá go bɛdɛ́mádɛ́má bɛ́ɛbɛ bɛ́ nuigeninyemú kanɛ tɔmbɛ́nɔ́ɔ naá nnyɔ́dɔ sɛ́nyɔ́ o? 2No béséesenye go boóma, kanɛ́ no do bó bɛáa, boóma moánɛ bɔ́ no lɔ́mɔ́ fɛaŋɔ go go óna mɔtɔ. No húmenye odɛ́má go boóma, kanɛ́ no do bósó ba go bó bɛa, boóma moánɛ bɔ́ no ubenyemú ɛsaŋɔ́ na cáŋɔ́. No do bɛanánáa boóma bɔ́ɔbɔ no húmenyemú odɛ́má go bɔ́ɔ goŋaá no do ɔŋɔ́nɔ́ɔ Asaŋa. 3Kanɛ́ aáŋa no ɔŋɔnɔ no do bɛáa, bó lɔ́mɔ́ goŋaá no ɔŋɔnɔ gɛbɛ́. No ɔŋɔnɔmɔ́ go goŋaá no hóogio bɛdɛ́mádɛ́má bɛ́nyɔ́. 4Bɛɛnyɔ́ɔ báaba no búlugenyemú baasaŋa bóntió, no do íyíménée no amɔ́ aáŋa mɔtɔ a húmenye odɛ́má go moóma má cí yɛ́ɛyɛ, a fíidenye Asaŋa nnyimé o? Kɔ́ɔ mɔtɔ mɔ́ɔnyɔ a húmenyemú odɛ́má go moóma má cí yɛ́ɛyɛ a fíidenye Asaŋa nnyimé. 5No do fegée no amɔ́ bó lɛ́ go dugúnú gɔ́ɔ bó lɔ́mɔ́ ɔ́ŋɔ́ɔlú naá kálata ya Asaŋa goŋaá: «Asaŋa a lɛ́galɛga Giliíli bɛhɛ́ mɔ́ɔnyɔ a mbaá có ágá, a gɔnɔ ŋanana hɛɔtɛ go mɔ́ɔ.» 6Moánɛ Asaŋa a có ŋanana gɛantá gá niibo gɔgɔ́ aŋa bó lɔ́mɔ́ ɔ́ŋɔ́ɔlú naá kálata ya Asaŋa goŋaá: «Asaŋa a bɛ́ɛ́yana báaba bá bébúlugenyemú, kanɛ́ a boogo báaba bá bésiisenyemú nnyɔ́dɔ go cí.» 7Bííŋénéemú nɔnɔ kanɛ́ naá Asaŋa. Lalɛ́na nɔnɔ ohándá odɛ́má, manɛ́ a ná díinemú ɛ ɛ́da halaháláa nɛnyɔ́. 8Báyɛkánɛ́náamɔ́ nɔnɔ Asaŋa, manɛ́ gɔ́ɔ tɔ́nɔ a ná nyó báyɛkɛnamɔ́#4.8 O bana, go eninye na Sakalɛ́a 1.3; Melesíi 3.7.. Sugúgíe nɔnɔ ɛmbɔ́gɔ yɛnyɔ́, bɛɛnyɔ́ɔ beŋií mobɛ́ báaba; púményée nɔnɔ odɛ́má yɛ́nyɔ́, bɛɛnyɔ́ɔ beegundegúndée báaba. 9Lɛncá nɔnɔ mahana mɛ́nyɔ́ no ŋa nigúe, no baŋa. Ŋgáa dohɔnɔ dó ɛ́ya mbií ya nigúe, bɛyaŋa bɛ́ɛbɛ no lɔ́mɔ́ na bɛ́ bɛ́ ɛ́ya mahana. 10Bésiisíemú nɔnɔ nnyɔ́dɔ go cí naá busío bá Daadáa, manɛ́ mɔ́ɔ a ná nyó fediginyemú tɛ́nɛ́ɛ.
Asaŋa mokáa a sómbanamɔ́ batɔ bɛsɛnɛ
11Bolimóní, no do dúménínée. Mɔ́ɔnyɔ a dúmemú ondimóní ɛ́na goŋaá a mo sómbanɛna gɛsɛnɛ, ŋgáa i íyime a amɔ́ a gálɛnagalɛnamɔ́ gicele dobɛ́ a gɔnɔ gɛ́ sómbana gɛsɛnɛ. Íyíme go amɔ́, aáŋa o sómbana gicele bɛsɛnɛ o do báá gɔnɔ́ mɔ́ɔnyɔ a bɛ́dɛganamɔ́ gicele, kanɛ́ o ná lɔ́mɔ́ usúmbí bɛsɛnɛ ba gicele. 12Asaŋa mokáa mɔ́ɔ a áganɛnamɔ́ batɔ gicele a gunde a bó sómbana bɛsɛnɛ mokáa. Mɔ́ɔ mokáa a lɔ́mɔ́ ba go sódio mɔtɔ ɛ́na lí a mo óna. Kanɛ́ maamɔ́ɔ o lɔ́mɔ́ ánɛ́ɛ goŋaá o sómbana sɔ́gɔ́ɔ bɛsɛnɛ o?
No do ɛ́dá go béségi
13Godɔ́ɔdɔ yɛ́ɛyɛ bɛɛnyɔ́ bóntió báaba no lɔ́ go bɛ́ɛmba no gálagala no amɔ́: «Ínoni ɛ́na lí nembeli dɛ gɛɛ́ ɛ́dá naá tɛ́sɔnɔ yɛ́ɛyɛ náana, dɛ dúmbie nnyómá hɔ́ɔ, dɛ ŋanana nyonyí dɛ bóda muinyí!» 14Gɔ́ɔgɔ no gálagalamɔ́ nɔ́ɔnɔ, no íyimene bɔ́ɔbɔ bó gaá ná nyó bolɛ́ná nembeli naá gɛɔyɔ gɛ́nyɔ́#4.14 O bana, go eninye na Ncaba 27.1.o? No lɛ́ aŋa ulúgúlúgu yɔ́ɔyɔ yó húmemú, moɔnɔ́ ba gɛcamɛna yó gunde yó ságɛna. 15Kanɛ́ náana gɔ́ɔ no sɛmɛgananamɔ́ go gálagala: «Asaŋa a amɔ́ a lɛ́ga dɛ gɔɔ́ ɔyɔ́ɔ, dɛ ŋa bɔ́ɔbɔ ɛ́na lí búunú.» 16Gá goŋaá no ŋa nɔ́ɔnɔ, no lɔ́mɔ́ goana go go ŋanana gá bogaya, no bégide ombɔ́gɔ go gɛsasɔ. Goŋanana gá ndiemi gó do fɛáa. 17Kɔ́ɔ mɔ́ɔnyɔ i íyimenemú besé ya ŋaá a ŋa, a lɔbɔ a dɛ yɛ ŋaáa, a á ŋaáa gɛoba.
