Sáakɛ 2
2
No do iyée batɔ
1Bolimóní bámɛ, bɛɛnyɔ́ɔ báaba no áganamɔ́ odɛ́má yɛ́nyɔ́ naá Daadáa bɛcɔ́ Yésu Kilítu mɔ́ɔnyɔ a gúmemú a dómbana boóma buimée, no do ɛ́dá go gɔnɔ go iye batɔ#2.1 O bana, go eninye na bɔ́ɔbɔ naá Yóobe 34.19.. 2Ŋgáa dɛ gɔ́lɔ gieninye gɛ́ɛgɛ: no lɛ́ ndukíi ndukíi naá nɛganda ná gioliminyo, batɔ báandɛ́ bá lɛ go úle bá bíi íŋéné, ummue bálɛŋá bálɛŋá bese bese, mmándɔ sá góolo naá monɔɔ́nnɔɔ́; mɔ́ɔnyɔ untió osógasoga na biyeyi bá bɛla go nnyɔ́dɔ. 3Bɛɛnyɔ́ɔ no lo go ága oŋgíso go mɔ́ɔnyɔ a lɔ́mɔ́ bálɛŋá bálɛŋá bese bese, no amɔ́ gɛ́hɛ́ aá: «Ogɔ́nɔ́ɔ, maamɔ́ɔ úlé ncó lukumene naá busío háalá.» No lo go oyana osógasoga no amɔ́: «Maamɔ́ɔ lɔbɛ́nɔ tɛ́nɛ́ɛ hɔ́ɔlɔ́, ɛ́na lí ncó lukumene go cí háalá.» 4No amɔ́ no ŋa nɔ́ɔnɔ, no á dúfíe go goŋaá no iye batɔ, no lɛ́ batɔ báaba bá lɔ́mɔ́ na bɛbɛ́ bá mbééníŋínyí bá go dádona naá gosómba gɛ́nyɔ́ gá bɛsɛnɛ.
5Bolimóní bámɛ bá odɛ́má, ɔ́bɔ́ nɔnɔ: Asaŋa a mba dómbáa go lɔɔ basógasoga naá cí yɛ́ɛyɛ go goŋaá bó oliminyo Yésu Kilítu, bá bɛa mammana ya bonɔ́mɛ yɛ́ɛyɛ naá gioliminyo, bá gɔnɔ dáŋaba Bufuŋe bá Asaŋa bɔ́ɔbɔ a mbaá dánɛ́ná báaba bá mo maamanamɔ́. 6Kanɛ́ bɛɛnyɔ́ɔ no sesesesie basógasoga! Ábɔ caá bɛnɔ́mɛ bá batɔ bɛ́ɛbɔ bɛ́ bɛ́ nyó óbigonyomú o? Caá bɛ́ bɛ́ ɛ́danamɔ́ nɛnyɔ́ naá ncíbo sá mógáláa o? 7Caá bɛ́ bɛ́ gálamɔ́ dobɛ́ go gɛnɔ́gɔ́ gá ufíno gá Yésusu mɔ́ɔnyɔ Asaŋa a mbaá nyó fáá go goŋaá no bɛ́ɛmba boɛ́nɔ bɛ́hɛ́ o? 8Kanɛ cuŋíi, aáŋa no hóogonyo gicele gá Bufuŋe, aŋa gɛ́ lɔ́mɔ́ ɔ́ŋɔ́ɔlú náana: o maamana sɔ́gɔ́ɔ aŋa maamɔ́ɔ moatɛ́, no ŋanana bese. 9Kanɛ́ no amɔ́ no ɛ́da go iye batɔ, no ŋanana gɛoba, gicele gɛ́ nyó gumbenene go goŋaá no á gɛ́ bácaáa. 10Akɛ́ mɔtɔ a hóogonyo bicele biimée bɛ́ɛbɛ Asaŋa a mbií íŋéné, a amɔ́ a báca akɛ́ gímmue, a á bácaáa biimée. 11Mammana, mɔ́ɔnyɔ a mboó oyɛ́dá a amɔ́: «O do ŋaáa gɛdáŋa», a mbo oyɛ́dá tɔ́nɔ a amɔ́: «O do óná mɔtɔ#2.11 Go ɛ́na Gihúmie 20.14 na Bicele 5.18; Gihúmie 20.13 tɔ́nɔ na Bicele 5.17.!» Gɔ́ɔ bó lɔ́mɔ́, akɛ́ o do ŋaáa gɛdáŋa, go amɔ́ go óna mɔtɔ, go á dómbá gicele.
12Gálágáláa nɔnɔ, no ŋanana, no íyime go goŋaá Asaŋa a ná nyó bide na gicele gɛ́ɛgɛ gɛ́ lɔ́mɔ́ na bogaaga bá go có dúgune. 13Mammana, naá gɛcamɛna gá umbidí, mɔtɔ mɔ́ɔnyɔ a lɔ́mɔ́ kanɛ go ɛ́na basɔ́gɔ́ɔ mahana, Asaŋa a dɛ ŋgá mo ɛ́na tɔ́nɔ mahana; kanɛ́ mɔtɔ mɔ́ɔnyɔ a gɔ́lɔnɔmɔ́ basɔ́gɔ́ɔ mahana, a dɛ dagádánáa naá busío bá usúmbí bɛsɛnɛ, goakɛ́ mahana má Asaŋa má dómbana buimée.
Aáŋa go olimonyo Asaŋa, dúfényée naá bɛnɔ́gɔ́ bá meŋiigíe
14Bolimóní bámɛ, bó do dúgúnée mɔtɔ goŋaá o oyɛda a amɔ́ a ágana odɛ́má yɛ́hɛ́ naá Asaŋa aáŋa a dɛ ŋanánáa moóma mɔ́ɔmɔ mó dúfenyemú nɔ́ɔnɔ. Mbɔ́dɔ ya gioliminyo moánɛ ɛ dɛ sódónyóo. 15Ŋgáa dɛ eninye goŋaá: ondimóní bɛnyɔ́ naá gioliminyo a lɛ́ nnyɔ́dɔ gɔdɔɔ́, mɔ́ɔ kanɛ boóma bá go nyáa. 16Kanɛ́ ummue naá bɛɛnyɔ́ɔ a lɛ go mo oyana a amɔ́: «Go ɛ́da bese, o bóósobonyo, o nyáanya o hóogio.» Bó gaá ná mo dúgúné goakɛ́ aáŋa a dɛ mo fáá boóma bɔ́ɔbɔ a baŋamɔ́? 17Nɔ́ɔnɔ gɔ́ɔ gioliminyo gɛ́ lɔ́mɔ́ aáŋa gɛ́ lɛ́ kanɛ meŋiigíe, gɛ́ moatɛ́ gɛ́ lɛ́ godugúnú.
18Ŋgáa dɛ oyɛda dɛ amɔ́: mɔtɔ ummue a amɔ́ a gálɛda a amɔ́: «Maamɔ́ɔ o lɛ́ na gioliminyo, yɔmɔ́ɔ na meŋiigíe.» Yɔmɔ́ɔ caá: «Túfíemú gioliminyo gáhɔ kanɛ meŋiigíe, yɔmɔ́ɔ ko dúfie gioliminyo gámɛ na meŋiigíe.» 19Aáŋa go olimonyo goŋaá Asaŋa a lɛ́ táŋɛ́ ummue, bó lɛ́ bese; akɛ́ bɛgáda bá biliíli bɛ́ olimonyo tɔ́nɔ nɔ́ɔnɔ, bɛ́ dagadana na bofoá#2.19 bɛgáda bá biliíligo ɛ́na 1 Tim 4.1olimonyo tɔ́nɔ nɔ́ɔnɔ… o bana, go eninye na Mot 8.29; Mél 1.24; 5.7; Lók 4.34.. 20Maamɔ́ɔ olelí odóɛ mɔ́ɔnyɔ! O lɛ́galɛga go ɔ́bɔ go amɔ́ gioliminyo kanɛ meŋiigíe gɛ́ lɛ́ go dugúnú lí? 21Ŋkádɛ gɛ́ mbaá ŋaáa kanɛ́ go goŋaá Asaŋa ɛ ɛ́na isée kɔ́nɔ́ɔ bɛcɔ́ Ábalaháma gɛtɛ́nɛ́ɛ gá mɔtɔ o? Bó mbaá lɛ go meŋiigíe mɛ́hɛ́ gɔ́ɔgɔ a mbaá gɔ́lɔ́ ohaŋa bɛhɛ́ Ɛ́saga, a báá mo dálá naá gɛdálɛ́ná go go íŋene Asaŋa aŋa gɛbáágá#2.21 Go ɛ́na Mabayɛga 22.9.. 22Ɛ́ná goŋaá gioliminyo gɛ́hɛ́ na meŋiigíe mɛ́hɛ́ mó mba lɛ́ mó ɛnda cɔ́bɛcɔ́bɛ, gɔnɔ́ go meŋiigíe mɛ́hɛ́ gɔ́ɔ gioliminyo gɛ́hɛ́ gɛ́ mbaá bédúfíe mammana. 23Nɔ́ɔ gɔ́ɔ boóma bɔ́ɔbɔ Ŋgɔ́ŋɛ́ yɛ oyamɔ́ bó bédúfenyemú: «Ábalaháma a mba ágá odɛ́má yɛ́hɛ́ naá Asaŋa, go busío bá ndiemi bɔ́ Asaŋa a mbaá mo ɛ́ná gɛtɛ́nɛ́ɛ gá mɔtɔ, a báá mo dɔ́ŋɛ́nɔ́ a amɔ́: “Ugúle bamɛ.”» 24No ɛ́nana kanɛ́, Asaŋa ɛ ɛ́nanamɔ́ mɔtɔ gɛtɛ́nɛ́ɛ go meŋiigíe máama má úlenemú naá gioliminyo, caá akɛ́ go gioliminyo gɛ́ aá gɛ́. 25Bó mba bɛ́ɛ́mbá tɔ́nɔ nɔ́ɔnɔ go odáŋadaŋa ba okɔ́dɔ mɔ́ɔnyɔ Aláhaba. Asaŋa a mba mo ɛ́ná gɛtɛ́nɛ́ɛ go meŋiigíe mɛ́hɛ́ go gɔ́ɔgɔ a mbaá beŋé batɔ bá gɛlɛ́ŋa bá Beyúdene naá mɔ́ nnyaŋá, a báá bó indíe naá pɛ́ intió go go gúluge bá dɛ bó ɛ́ná#2.25 Go ɛ́na naá Yosué 2.1-21.. 26Gɔ́ɔ bó lɔ́mɔ́ caŋa táŋɛ́ mmue, aŋa nnyɔ́dɔ yɛ́ɛyɛ ɛ lɔ́mɔ́ kanɛ gɔnɔ́ giliíli ɛ lɔ́mɔ́ kúe, nɔ́ɔ gɔ́ɔ tɔ́nɔ gioliminyo gá kanɛ meŋiigíe gɛ́ lɔ́mɔ́ godugúnú.
