Meŋiigíe 24
24
Dogálɔ dá ugélí Teletúle
1Naá nnyimé ya medúgú mátáanɔ, Ufuŋe yá bedúmbí bɛbáágá naá Asaŋa Ananɛ́asɛ, go bola naá Sɛsalɛ́ɛ olɔŋɔ na bafɛanɔ́ɔ na ugélí ummue ufíno yɛ́hɛ́ Teletúle. Gáábɔ́ go ɛ́da go go sɔ́mɔnɔ Póolo naá busío bá Ŋgɔ́mɔnɔ ba ogɔ́nɔ́ Féligisi. 2Bá á dɔ́ŋɛ́nɔ́ Póolo u ú úlé, Teletúle go ɛ́da go mo sómɔnɛnɔ a amɔ́: «Ŋgɔ́mɔnɔ ba ogɔ́nɔ́ Félígisi, gɛantá gá buumbénú gɛ́ɛgɛ dɛ lɔ́mɔ́ naá gɛ́ goŋaá maamɔ́ɔ na goyaŋona gɔ́ɔgɔ go á ná yaŋónáa moóma naá gɛdɔŋɔ; 3dɛ mó gɔ́lɔnɔ púmú hoóma hiimée na bɛyaŋa na mbéhiigí iŋkimée. 4Kanɛ́ aŋa ndɔ́mɔ́ cɛ bɛ́ɛ́mbá ba goŋaá ŋgɛ́da naá busío tɔ́bɔ ko séesenye, ŋgaá go bósógólídío goŋaá ó ba có bódólígínyóo go odɛ́má usi yáhɔ go moɔnɔ́ ba gɛcamɛna. 5Dɛ ɛ́ ɛ́ná dɛ amɔ́ mɔtɔ mɔ́ɔnyɔ a lɛ́ mpígí, gɛlɔŋɔ gá mɔtɔ; ɛ ɛ́da u ubenye boologodo hoóma hiimée naá tɛ́mádɛ́má ya Beyúdene biimée. A lɛ́ ogɔ́nɔ́ɔ ba giimbó gá Banasálɛa. 6A lɛ́ magáalú moánɛ goŋaá a lɔgɔ nnyaŋá ya Asaŋa, gɔ́ɔ dɛ lɔ́mɔ́ mo gumbénéelú. [Dɛ báá lɛ́gálɛ́gáa go gála gɛsɛnɛ gɛ́hɛ́ aŋa gicele gɛ́cɔ́ gɛ́ oyamɔ́. 7Kanɛ́ ogɔ́nɔ́ɔ ba bisimbi tɔ́sɛnɔ, Lɛ́sɛasɛ, go nco mo sógada naá ɛmbɔ́gɔ yɛcɔ́ na ugúndú uŋkimée. 8A báá gálɛ́dá a amɔ́ ŋgáa báaba bá mo sɔ́mɔnɔmɔ́ bú úle naá maamɔ́ɔ]. Maamɔ́ɔ moatɛ́ moatɛ o gaá mo úhéné, go íyime boóma moatɛ́ bɔ́ɔbɔ dɛ mo sɔ́mɛnɔnɔmɔ́ go bɔ́.» 9Beyúdene go gunde nnyimé yɛhɛ́ bá amɔ́ dogálɔ dɛ́hɛ́ dó lɛ́ mammana.
Dogálɔ dá Póolo go go bɔ́bɔgɔbɔgɔ
10Gɔ́ɔ Ŋgɔ́mɔnɔ ba ogɔ́nɔ́ u úhunemú Póolo a amɔ́ ŋgáa a gálagala. Póolo go dúme dogálɔ a amɔ́: «Ŋgíyimene goŋaá gitúu gá nnyómá gɛ́gɛ́ɛ maamɔ́ɔ o lɔ́mɔ́ umbidí bɛsɛnɛ ba gɛdɔŋɔ gɛ́ɛgɛ; boóma moánɛ bɔ́ ndɔ́mɔ́ na mbémineminie goŋaá nnco go ányana go yɔmɔ́ɔ moatɛ́ naá busío báhɔ. 11Bó gá lɛ́ bó do dómbá medúgú mɔ́ɔ́dɔ́ na máandɛ́ gɔ́ɔ ndɔ́mɔ́ ɛ́dáalú naá Yolósalɛmɛ go go búlugenye Asaŋa; magá go úhune bá gaá go oyáná. 12Mɔtɔ ummue a lɛ́ kanɛ go kíde akɛ́ naá Nnyaŋá ya Asaŋa, akɛ́ naá nnyaŋá sá mbósógólí, akɛ́ naá tɛ́sɔnɔ gadɛ́ɛ, ŋŋanana mpálɔ́ na mɔtɔ, ɛ́na lí ndónconyo batɔ goŋaá bú ubie ologodo. 13Gɔ́ɔ batɔ báaba bá lɔ́mɔ́ bá dɛ bɛ́ɛ́mbá ba go go dúfie, aáŋa mmba gálágáláa tasɛ́ tasɛ́ ya boóma bɔ́ɔbɔ bá cɔ́mɛnɔnɔmɔ́ go bɔ́. 14Ŋgaá hɛmá naá mamɔ́ busío goŋaá mbúlugenye Asaŋa ba biisée bámɛ naá gɛpáa gá Pɛ́ gɛ́ɛgɛ bɔ́ɔ bó oyamɔ́ bá amɔ́ gɛ́ dɛ báá mammana; ŋgolimonyo buimée bɔ́ɔbɔ bó lɔ́mɔ́ ɔ́ŋɔ́ɔlú naá kálata ya gicele na naá kálata sá mbúsí sá Asaŋa. 15Mbɛanana toodo odɛ́máa naá Asaŋa yɛ́ɛyɛ bɔ́ɔ tɔ́nɔ bá bɛananamɔ́ goŋaá gofúfuge naá begúe gá bɛtɛ́nɛ́ɛ bá batɔ na mbɛ́ kɛ́ gó ná bɛ́ɛmba#24.15 O bana, go eninye na Déniele 12.2.. 16Boóma moánɛ bɔ́ odɛ́má yámɛ yó lɔ́mɔ́ yó do bényíígényée go boóma naá oŋgíso yá Asaŋa akɛ́ naá oŋgíso yá batɔ. 17Aŋa ndɔ́mɔ́ ŋaáalú gɛca gá nnyómá cɛ bolá naá Yolósalɛmɛ, gɔ́ɔ ndɔ́mɔ́ úléelú go go nco go óhiginyo gɛdɔŋɔ gámɛ kunde páa Asaŋa bɛbáágá. 18Boóma bɔ́ɔbɔ mmbaá lɔmɔ́ ŋŋanana naá Nnyaŋá ya Asaŋa bɔ́bɔ́ɔ naá gɛcamɛna gɛ́ɛgɛ bá mbaá kídé, mmba bɛáa boebíe naá gɛsogona, kanɛ akɛ́ gitúu gá batɔ, kanɛ gɛcooma. 19Goana nɛnamá ná Beyúdene báaba naá gɛdɔŋɔ gá Esíi bɔ́ɔ bá mbaá lɔmɔ́ hɔ́ɔ. Bɔ́ɔ bákáa bá lɔ́mɔ́ ba go nco cɔ́mɔnɔ naá maamɔ́ɔ bó oyɛda aáŋa ndɛ́ gɛsɛnɛ nabɔ́. 20Ɛ́ná goŋaá basɔ́gɔ́ɔ báaba bá cɔ́mɛnɔnɔmɔ́ báaba, bá dúfie gɛoba gámɛ gɔ́ɔgɔ mmbaá dɛ́lɛ́mɛ́ná naá Nɛgála Nɛgɔ́nɔ́ na Beyúdene. 21Aáŋa bó do bɛ́ɛ́mbá goana go nogálɔ nɔ́ɔnɔ mmbaá húmíe naá kadɛ́gadɛ́ɛ yabɔ́ caá: “Bó lɔ́mɔ́ go gɛsɛnɛ gá púfuge ya begúe gɔ́ɔ ndɔ́mɔ́ tɛ́nɛ́ɛ háalá go go mbide go buisí bá ínoni.”»
22Kanɛ́ aŋa Féligisi a mbaá lɔmɔ́ i íyimene boóma bɔ́ɔbɔ bó lɔ́mɔ́ gioliminyo gá gɛpáa gá Pɛ́, go gundie gɛsɛnɛ na nnyimé a amɔ́ gáábɔ́ a amɔ́: «Aŋa Lɛ́sɛasɛ, ogɔ́nɔ́ɔ ba bisimbi tɔ́sɛnɔ, a nú úlemú, ndɛ go bide gɛsɛnɛ gɛ́nyɔ́.» 23Gɔ́ɔ o oyanamɔ́ ogɔ́nɔ́ɔ ba bisimbi ntɛdɛ goŋaá a beŋe Póolo, kanɛ́ a mo fáanana nɛnamá ná ŋgásɛ́, a dɛ legé batɔ bɛ́hɛ́ go nco mo oyoyo.
Póolo naá ncíbo ya gɛaŋɔ́
24Naá nnyimé ya baaná bá medúgú, Féligisi go úle olɔŋɔ na okɔ́dɔ bɛhɛ́ Dulusíle, mbéní ya Beyúdene. Go dóma goŋaá bɛ́ ɛ́da gɔ́lɔ Póolo; gɛ́hɛ́ go mo bódólonyo naá bosɔ́mɔ bá gioliminyo gɛ́ɛgɛ gɛ́ núunemú Yésu Kilítu. 25Kanɛ́ aŋa Póolo a mbɛɛ́ ɛ́dá go gálagala gɛsɛnɛ gɛ́ɛgɛ gɛ́ núunemú besé ya gɛɔyɔ, na mbánona, na nɛgála nɛ́ɛnɛ nɛ́ úlenemú, bofoá go gumbene Féligisi, gɛ́hɛ́ go gálɛda a amɔ́: «Godɔ́ɔdɔ, o lɛ́ ba go ɛ́da, nná go dɔ́ŋɛnɔ aŋa nná bɛamɔ́ gɛcamɛna.» 26Féligisi a mba lɛ́ a fúmbe tɔ́nɔ goŋaá Póolo a mo fáa muinyí, boóma moánɛ bɔ́ a mbaá lɔmɔ́ gátáanɔ a mo dɔ́ŋɛnɔ goŋaá bá kúle. 27Gɔ́ɔ nnyómá sɛ́ dómbamɔ́ ɛ́handɛ́ nɔ́ɔ, Pólósu Fésétusu go gɔ́lɔ undukí yá Féligisi; kanɛ́ aŋa Féligisi a mbaá lɔmɔ́ a lɛ́galɛga goŋaá Beyúdene bá mo ɛ́na bese, gɛ́hɛ́ go dɛ́ɛna Póolo naá ncíbo ya gɛaŋɔ́.
Currently Selected:
Meŋiigíe 24: YAS
Highlight
Copy
Compare
Share
Want to have your highlights saved across all your devices? Sign up or sign in
