2 Kɔlɛ́ntɛ 9
9
Asaŋa a maamana mɔ́ɔnyɔ a fáananamɔ́ na bɛyaŋa
1Go bɔ́ɔbɔ bó núunemú gióhiginyo gɛ́ɛgɛ dɛ lɔ́mɔ́ goŋaá dɛ fáa go busío bá boolímínyí, cɛ báá na boóma bá go nyó ɔ́ŋɛnɔ hɔ́ɔ. 2Ŋgíyimene bɛnɔ́gɔ́ bɛ́nyɔ́ bá mbééníŋínyí, kɔnɔ béségisegi gɛ́nyɔ́ naá boayá bá batɔ bá Masɛdóanɛ, mbó oyanɛna caá, batɔ bá Ekeyíi bá lɛ́ pɛnɛ́ɛ fueké nnyómá yíiní, go go fáanana bábɔ́ bodáŋɔ. Gɔ́ɔ tɔ́nɔ gobíiŋenene gɛ́nyɔ́ gó lɔ́mɔ́ gúlúmínyéelú gɛca gá biimbó bá boolímínyí. 3Kanɛ́ ŋgaá nyó dómɛ́ná bolimóní bɛ́cɔ́ naá gioliminyo, go goŋaá gobéségisegi gɔ́ɔgɔ ndɔ́mɔ́ na gɔ́ naá boayá bɛ́nyɔ́, gó do ɛ́yá go dugúnú naá bosɔ́mɔ bá gióhiginyo bɔ́ɔbɔ. Gɔnɔ́, aŋa ŋgoyanɛnamɔ́ batɔ, no bɛ́ɛmba na pááná sɛ́nyɔ́ go ombɔ́gɔ. 4Aáŋa caá nɔ́ɔnɔ, bó amɔ́ bó húme goŋaá ŋgúle olɔŋɔ na batɔ bá Masɛdóanɛ, dɛ nyó gíde kanɛ boóma go ombɔ́gɔ, odóɛ gonóa yó ga á kumbéné makɔ́nɔ́ naá cɛma odɛ́máa yɛ́ɛyɛ ndɔ́mɔ́ na yɛ́, kanɛ́ yɛ́nyɔ́ odóɛ gonóa yó gaá dómbáa. 5Go busío moánɛ gɔ́ɔ ŋgaá ná ɛ́ná bese goŋaá túenye bolimóní bɛ́cɔ́ naá bɛɛnyɔ́ɔ, no bégedie na pááná sɛ́ɛsɛ no mbaá dánáa. Aŋa no ŋamɔ́ no báa go bándɛgɛna pááná sɛ́ɛsɔ, bó gá á dúfie goŋaá no á fáánánáa na gɛnɔ́gɔ́ gá odɛ́má, caá akɛ́ naá gɛgaŋa.
6Bééníŋínyéemú nɔnɔ nogálɔ nɔ́ɔnɔ nó lɔ́mɔ́: Mɔ́ɔnyɔ a gónamɔ́ camɔ́ sɔŋɛ, masáŋa mɛ́hɛ́ má ŋga bɛ́ɛ́mbá tɔ́nɔ sɔŋɛ; mɔ́ɔnyɔ a gónamɔ́ gɛcɛcá gá camɔ́, masáŋa mɛ́hɛ́ má ŋga bɛ́ɛ́mbá tɔ́nɔ gɛcɛcá. 7Ŋgáa onyɔ moánɛ a fáa pááná yɛhɛ́ aŋa odɛ́má yɛ́hɛ́ yó béfiigenyemú, kanɛ mecíkílíi, kanɛ gɛgaŋa. Mɔtɔ mɔ́ɔnyɔ a fáananamɔ́ na bɛyaŋa a lɛ́ ugúle ba Asaŋa. 8Asaŋa a bɛanana bogaaga bá go nyó hóogonyo fundufundu na besé mbɔ́dɔ iŋkiménénée, go goŋaá, no do ságá boóma, no bɛanana bɛcamɛna biimée boóma bá go ŋanana bɛnɔ́gɔ́ bá meŋiigíe kɔ́ɔ. 9Ŋgɔ́ŋɛ́ yɛ oya yɛ amɔ́: A abana basógasoga oŋgíso mbúúnyíi, botɛ́nɛ́ɛ bɛ́hɛ́ bó lɛ́ kanɛ mmanɛ́náa#9.9 Go ɛ́na naá Ɛsagɔ 112.9..
10Asaŋa mɔ́ɔnyɔ a fáananamɔ́ ugúní camɔ́ na manyáanya máama má mo dúgemú#9.10 O bana, go eninye na Iseyíi 55.10., a ŋga nyó fáánánáa camɔ́ iŋkimée yɛ́ɛyɛ no lɛ́galɛgamɔ́, a yɛ degie, a gɔnɔ yɛ gúninie go goŋaá botɛ́nɛ́ɛ bɛ́nyɔ́ bó dómba. 11A ŋga nyó fáá gɛca gá moóma, go goŋaá no ɛ́dana naá busío, no aba na basɔ́gɔ́ɔ; náana, gɛcɛcá gɛ́ ná béhiigi Asaŋa go pááná sɛ́nyɔ́ sɛ́ɛsɛ dɛ ná bó béekinyemú. 12Ɛɛ́ɛŋ, gióhiginyo gɛ́ɛgɛ no ŋananamɔ́, gɛ́ dɛ báá goana go boolímínyí, kanɛ́, gɛ́ gɔnɔ ŋanana goŋaá gɛcɛcá gɛ́ béhiigi Asaŋa go busío moánɛ. 13Aŋa bá nɛ́ ɛ́namɔ́ gióhiginyo gɛ́ɛgɔ naá odɛ́nɛ́ yá gɛ́, bá lɛ go ɛ́da go gúmenye Asaŋa go ŋgɔ́bɛnɔ yɛ́ɛyɛ no dúfenyemú go Gɛnɔ́gɔ́ gá Cɔ́mɔ gá Kilítusu; bá gɔnɔ mo béhiigi go niibo nɛ́ɛnɛ no ŋananamɔ́ nabɔ́, gɔnɔ́ na biimée. 14Bá ná bósógolonyo Asaŋa nɔ́ɔnɔ na bolɛbɛlɛbɛ go busío bɛ́nyɔ́ go goŋaá a lɛ́ nyó boogóolú a báá dómbáa 15Ŋgáa dɛ béhiigi Asaŋa go pááná yɛhɛ́ ya kanɛ gieninye.
Currently Selected:
2 Kɔlɛ́ntɛ 9: YAS
Highlight
Copy
Compare
Share
Want to have your highlights saved across all your devices? Sign up or sign in
