2 Kɔlɛ́ntɛ 4
4
Boyogóní bá Asaŋa bá lɛ́ mekúígíi na bɛdɔmbɔ
1Asaŋa mɔ́ɔ a mbaá có fáá buelí bɔ́ɔbɔ go ŋgɛ́na mahana yɛhɛ́, gó moánɛ dɛ lɔ́mɔ́ dɛ dɛ obánáa bɛnamá. 2Dɛ bíi ínyé moóma má odóɛ gonóa mɔ́ɔmɔ mó báŋananamɔ́ naá nɛɔsɛgɔ; dɛ ɔyɔ kanɛ moloolio, dɛ dɛ kɔ́nɔ́ɔ nogálɔ naá Asaŋa. Moatɛ́, dɛ nó oya na mammana iŋkimée go goŋaá batɔ biimée bí íyime mbɔ́dɔ sá batɔ sɛ́ɛsɛ dɛ lɔ́mɔ́ naá busío bá Asaŋa. 3Aáŋa Gɛnɔ́gɔ́ gá Cɔ́mɔ gɛ́ɛgɛ dɛ dúmenyemú gɛ́ lɛ́ boáalú, gɛ́ lɔ́mɔ́ boáalú go busío bá báaba bá lɔ́mɔ́ naá pɛ́ ya goyíme. 4Bá dɛ olímónyóo goŋaá, Sátana, asaŋa ba cí yɛ́ɛyɛ a báa go buige muúne mábɔ́. A bó legene go núune gise gá Gɛnɔ́gɔ́ gá Cɔ́mɔ gɛ́ɛgɛ gɛ́ dúfenyemú nigúmi ná Kilítusu, mɔ́ɔ mɔ́ɔnyɔ a lɔ́mɔ́ gieninye gá Asaŋa. 5Bɔ́ɔbɔ dɛ dúmenyemú, bó do báá bɛɛcɔ́ɔ moatɛ́, bó lɔ́mɔ́ Yésu Kilítu, Daadáa. Bɛɛcɔ́ɔ moatɛ́ dɛ béfínenye boyogóní bɛ́nyɔ́ go busío bá Yésusu. 6Mammana, Asaŋa mɔ́ɔnyɔ a mbaá gálɛ́dá a amɔ́, ŋgáa gise gɛ́ bonya naá kadɛ́gadɛ́ɛ ya mbíno#4.6 Go ɛ́na naá Mabayɛga 1.3., a lɔ́mɔ́ mɔ́ɔ moatɛ́ a bonyamɔ́ naá ɛdɛ́má yɛcɔ́. A báá lɛ́gá go fáá gise go go lincie nigúmi nɛ́hɛ́ nɛ́ɛnɛ nɛ́ bonyamɔ́ naá busío bá Kilítusu. 7Kanɛ́ bɛɛcɔ́ɔ báaba Asaŋa a mbaá có fá bonɔ́mɛ bɔ́ɔbɔ, dɛ lɛ́ aŋa motɛ́lɛ́a má noma, go go dúfie goŋaá bogaaga bá kanɛ gieninye bɔ́ɔbɔ bó ɛ́damɔ́ go úlene naá Asaŋa caá akɛ́ naá bɛɛcɔ́ɔ. 8Bá có nɔdɛnɔ maayá miimée, kanɛ́, bá dɛ có nasáa; bá có ágana naá bɛdɔmbɔ, kanɛ́, dɛ dɛ obánáa bɛnamá. 9Bá có séesenye, kanɛ́, Asaŋa a dɛ có dɛ́ɛ́nánáa; bá có dɛ́anana, kanɛ́ bá dɛ có níŋísée kɔndɔ́ go cí. 10Náana, mbɔ́dɔ ya nigúe ya Yésusu ɛ lɛ́ gɛcamɛna giimée naá nnyɔ́dɔ sɛ́cɔ́, go goŋaá, gɛɔyɔ gá Yésusu gɛ́ bédúfenye go nnyɔ́dɔ sɛ́cɔ́. 11Naá gɛɔyɔ gɛ́cɔ́ giimée, dɛ lɛ́ dambɛ́gáalú go nigúe go busío bá Yésusu; go goŋaá, bɛ́ ɛ́na gɛɔyɔ gá Yésusu naá nnyɔ́dɔ sɛ́cɔ́ sɛ́ɛsɛ sɛ́ ná gúenenemú. 12Gɔ́ɔ bó lɔ́mɔ́, bɛɛcɔ́ɔ dɛ lɛ́ na nigúe go boayá, bɛɛnyɔ́ɔ, gɛɔyɔ go boayá go busío moánɛ.
13Dɛ bɛanana gioliminyo gímmue eé gímmue aŋa Ŋgɔ́ŋɛ́ yɛ oya yɛ amɔ́: «Mbo olímínyóo, gɔ́ɔ mbaá gálágáláa#4.13 Ɛsagɔ 116.10..» Bɛɛcɔ́ɔ tɔ́nɔ dɛ olimonyo nɔ́ɔ caŋa mmue, gó moánɛ dɛ gálagalamɔ́. 14Ɛɛ́ɛŋ, dɛ íyimene dɛ amɔ́, mɔ́ɔnyɔ a mbaá fúfúné Daadáa Yésusu, a ŋga có fúfúné tɔ́nɔ caŋa mmue aŋa Yésusu, a có ága olɔŋɔ nɛnyɔ́ naá boayá bɛ́hɛ́. 15Gɔ́ɔ, buimée bɔ́ɔbɔ dɛ gɔ́lɔnɔmɔ́ gɛdɔmbɔ go bɔ́, bó lɔ́mɔ́ go busío bɛ́nyɔ́; dɛ ŋananamɔ́ nɔ́ɔ goŋaá niibo ná Asaŋa nɛ́ goma, nɛ́ báakɛna gɛcɛcá gá batɔ, bɛ́ ɛ́da go mo búlugeninye mbósógólí sá bibéhiigí go nigúmi nɛ́hɛ́.
Go ɔyɔ naá gioliminyo
16Go busío moánɛ, dɛ dɛ bósó go obana bɛnamá, akɛ́ bó húme goŋaá nnyɔ́dɔ yɛcɔ́ ya boɔtɔ yɛ ɛ́ya ya go sola, odɛ́má yɛ́cɔ́ yó ɛ́yana gɛpáa gɛcamɛna giimée. 17Mammana, bɛdɔmbɔ bɛ́cɔ́ bɛ́ɛbɛ bɛ́ lɔ́mɔ́ go gɛcamɛna, bɛ́ lɛ́ láhɔ láhɔ, dɛ amɔ́ dɛ eninye na gilúututu gá nigúmi ná kanɛ mmanɛ́náa nɛ́ɛnɛ bɛdɔmbɔ moánɛ bɛ́ có gedinye gedinyemú. 18Odóɛ yɛ́cɔ́ yá bosɔ́mɔ yó do báá boóma bɔ́ɔbɔ batɔ bɛ́ ɛ́nanamɔ́, kanɛ́ yó lɔ́mɔ́ bɔ́ɔbɔ bá lɔ́mɔ́ bá dɛ ɛ́nánáa; bɔ́ɔbɔ batɔ bɛ́ ɛ́nanamɔ́ bó lɛ́ go gɛcamɛna, kanɛ́ bɔ́ɔbɔ bá lɔ́mɔ́ bá dɛ ɛ́nánáa, bó gɛ́ga bɛcamɛna biimée.
Currently Selected:
2 Kɔlɛ́ntɛ 4: YAS
Highlight
Copy
Compare
Share
Want to have your highlights saved across all your devices? Sign up or sign in
