YouVersion Logo
Search Icon

1 Píele 4

4
Gɛcóa na gɛpáa gá gobɔ́gɔ́lɔnɔ
1Aŋa bó lɔ́mɔ́ goŋaá Kilítusu a mbɔ ɔ́bɛ́gɔ́nɔ́ɔ naá nnyɔ́dɔ yɛhɛ́, bɛɛnyɔ́ɔ tɔ́nɔ bɛ́ɛmba nɔnɔ pɛnɛ́ɛ go go ɔ́bɛgɔnɔ aŋa mɔ́ɔ; mɔtɔ mɔ́ɔnyɔ ɔ́bɛgɔnɔmɔ́ naá nnyɔ́dɔ a á ádógáná na gɛlɔgɔ, 2go go ɔyɔ naá nnyɔ́dɔ yɛhɛ́ gɛcamɛna gɛ́ɛgɛ gɛ́ mo síeninemú aŋa Asaŋa a lɛ́galɛgamɔ́; caá akɛ́ naá mbɔ́dɔ ya gɛdɛ́mádɛ́má gá batɔ. 3Cóá no lɛ́ dúmbíelú gɛcamɛna makɔ́nɔ́ go go ɔyɔ naá mbɔ́dɔ yɛ́ɛyɛ bindiíyímé Asaŋa bɛ́ maamanamɔ́, ŋgáa bó súge nɔ́ɔnɔ. Cóá no mba lɛ́ no ɔyɔ gɛbɛ́ gá gɛɔyɔ, no ŋanana bɔ́ɔbɔ nnyɔ́dɔ sɛ́nyɔ́ sɛ́ nyó dómanamɔ́ go bɔ́, no gúenene mɔgɛ́bɔ, bɛcamɛna biimée no lɛ́ go bɛdágá na anyóa, no búlugenye tɔ́nɔ moɔcɔ, bɔ́ɔbɔ bó lɔ́mɔ́ gɛbɛ́ makɔ́nɔ́. 4Kɔ́ɔ godɔ́ɔdɔ, aŋa no lɔ́mɔ́ no do gɔnɔ́ bó fídefide gɛcamɛna gɛ́ɛgɛ bá lɔ́mɔ́ go bɛbɛ́ bábɔ́ bá moóma go ŋanana, bó bó fáanana giemésé, bá lɛ go ɛ́da go nyó sɛga. 5Kanɛ́ bá ná básáaga go meŋiigíe mábɔ́ naá busío bá mɔ́ɔnyɔ a lɔ́mɔ́ pɛnɛ́ɛ go go sómbana bagɔ́sɔ na begúe bɛsɛnɛ. 6Ɛɛ́ɛŋ, go busío moánɛ gɔ́ɔ bá mbaá dúményée gɛnɔ́gɔ́ gá cɔ́mɔ akɛ́ naá begúe, go goŋaá aŋa bá sómbanamɔ́ batɔ bɛsɛnɛ go meŋiigíe má nnyɔ́dɔ, go bogaaga bá Gimmúmpúu gá Giliíli, bɔ́ ɔyɔ gɛɔyɔ gá Asaŋa.
Aŋa boolímínyí bá háananamɔ́ go bɔ́gɔ́lɔnɔ bɔ́ɔ na bɔ́ɔ
7Gɛcamɛna gɛ́ á síéné sɔŋɛ, mamáná má cí má bola. Go busío moánɛ bɛáa nɔnɔ nciŋí, no gɛ́ga pɔnyɛ́ɛ, no bégumbenene odɛ́má go go bɛa bogaaga bá go bósógolonyo. 8Busío busío dómbáa nɔnɔ go maamanɛna na odɛ́má uŋkimée. Mammana, dɛ amɔ́ dɛ maamana basɔ́gɔ́ɔ, gɛmaamánɛ́ná gɛ́ɛgɔ gɛ́ úlene na ihéehinye há gɛcɛcá gá bɛlɔgɔ#4.8 Go ɛ́na naá Ncaba 10.12; ya Sáa 5.20.. 9Gɛ́ndɛ́gánɛ́náa nɔnɔ naá nnyaŋá sɛ́nyɔ́ kanɛ go bécíkilide odɛ́má. 10Bííŋénéemú nɔnɔ go go yɔgɔnɛnɔ basɔ́gɔ́ɔ onyɔ moánɛ go pááná yɛ́ɛyɛ Asaŋa a lɔ́mɔ́ mo fáalú. Bɛ́ɛmba nɔnɔ bɛnɔ́gɔ́ bá bebídígíní bá gitúu gitúu bá pááná sá Asaŋa. 11Asaŋa a amɔ́ a fáa mɔtɔ bogaaga bá dogálɔ, ŋgáa bó bɛ́ɛmba go go dúmbenye dogálɔ dɛ́hɛ́; a amɔ́ a bɛ́ɛmba naá odɛ́nɛ́ yá buelí, ŋgáa a bó yɔgɔnɔ na bogaaga bɔ́ɔbɔ Asaŋa a mo fáananamɔ́, bó húme goŋaá gá Yésu Kilítu, batɔ bɛ́ ɛ́da go gúmenye Asaŋa go buimée. Mɔ́ɔ a lɔ́mɔ́ na nigúmi, na bogaaga, go mannyómá aá mannyómá. Aamɛnɛ.
Besé yɛ́ɛyɛ ɛ gɛ́ganamɔ́ báaba bá bó séesenyemú
12Bámɛ bá odɛ́má, no do békúkée makɔ́nɔ́ aáŋa no lɛ́ naá golɔ́kɔ gá gɛɔ́bɛgɔ, bó do bɛ́ɛ́mbá aŋa boóma bofáa bɔ́ bó nyó bolɛnamɔ́. 13Kanɛ́ békelényéemú nɔnɔ go busío bá goŋaá no gɔ́lɔnɔ bodáŋɔ naá gɛɔ́bɛgɔ gɛ́ɛgɛ Kilítusu a mbaá bɛáa, gó húme aŋa no ŋgaá bɛ́ɛ́mbá tɔ́nɔ naá gɛantáanta gá bɛyaŋa naá buisí bɔ́ɔbɔ a ŋgaá loodío nigúmi nɛ́hɛ́ go batɔ biimée. 14Besé nɛnyɔ́ makɔ́nɔ́ bá amɔ́ bá nyó sɛga goŋaá no lɛ́ bá Kilítusu, goakɛ́ Giliíli ba Asaŋa mɔ́ɔnyɔ a lɔ́mɔ́ na nigúmi a lɛ́ nɛnyɔ́. 15Bá séesenye batɔ báaba bá lɔ́mɔ́ buúníní ɛ́ná lí biíbi, bepelípélí ɛ́na lí bá ágana ombɔ́gɔ naá bɛsɛnɛ bá basɔ́gɔ́ɔ. Bɛɛnyɔ́ɔ, no do bɛ́ɛ́mbá nɔ́ɔ. 16Kanɛ́ mɔtɔ a amɔ́ a lumene na gɛɔ́bɛgɔ goŋaá a lɛ́ ba Kilítusu, a dɛ nóá odóɛ go busío moánɛ, moatɛ́ ŋgáa a dómba go búlugenye Asaŋa go ufíno yá Kilítusu yɔ́ɔyɔ a lɔ́mɔ́ na yɔ́. 17Ɛɛ́ɛŋ, gɛcamɛna gɛ́ á háá gɛ́ɛgɛ Asaŋa a bayɛganamɔ́ go sómbana batɔ bɛsɛnɛ manɛ́ naá nnyaŋá yɛhɛ́ ya moatɛ́. Kɔ́ɔ, a amɔ́ a bayɛga gɛ́cɔ́, gosúgudinye gá báaba bá lɔ́mɔ́ bá dɛ olímónyóo Gɛnɔ́gɔ́ gá Cɔ́mɔ gá Asaŋa gó ŋgaá bɛ́ɛ́mbá nɛɛ́nɛ o? 18Gɔnɔ́ mɔtɔ ba gɛtɛ́nɛ́ɛ a amɔ́ a bɛa gisódio naá gɛantá gá gɛdɔmbɔ mmoɛná, ŋkádɛ gɛ́ gɛ́ ŋgaá bolɛ́ná mbɛ́ sá batɔ sɛ́ɛsɛ sɛ́ lɔ́mɔ́ sɛ́ dɛ olímónyóo Asaŋa#4.18 Ncaba 11.31. o? 19Go busío moánɛ, ŋgáa báaba bɔ́ ɔ́bɛgɔnɔmɔ́ go golɛ́galɛga Asaŋa, bɛ́ ɛ́dana naá busío na go ŋanana besé. Ŋgáa bá bííŋene uŋkimée uŋkimée babɔ́ naá Asaŋa ugedí babɔ́ mɔ́ɔnyɔ a lɔ́mɔ́ a dɛ súgénée tánɔ sɛ́hɛ́.

Currently Selected:

1 Píele 4: YAS

Highlight

Share

Copy

None

Want to have your highlights saved across all your devices? Sign up or sign in